九州自由行（四）：博多運河城嘆地道拉麵

＊坐100日圓巴士可以直達博多運河城。

＊商場內真係有條運河！

＊運河城有唔少店舖，係博多購物熱點之一。

＊五樓的拉麵運動場（Ramen Stadium），有日本全國多間唔同拉麵店舖任你選擇。

＊我地揀左呢間博多拉麵代表。

＊拉麵同炒飯做我地晚餐，右面的炒飯真係值100分！

放下行李，稍事休息後，就在站內的綠色窗口店購買JR九州鐵路周遊券（九州北部地區適用的三日券，售價7,200日圓）兼劃好三日搭乘班次的指定席座位，由於我預早睇定所有火車的時刻表，所以不用十分鐘便搞掂。

完成後，在中央口出口外的A號巴士站坐100日圓循環線巴士，在博多運河城（Canal City Hakata）下車。呢個大型商場有齊娛樂、美食、購物、影院、劇場、酒店等商業設施，面積極大，裡面既有名牌商店（agnes b.和GAP，其中GAP仲有4折起推廣，出示passport再減5%），也有特色小店，人流唔多，行得好舒服。

不過，我地主要的目的係到五樓的拉麵運動場（Ramen Stadium）醫肚，呢度有幾間來自日本不同地方的拉麵店，包括北海道、福岡、東京、宮崎、檳濱等地的代表，我地幫襯人氣旺盛的博多拉麵店──初代 秀ちゃん。我地先在店外的售賣機揀選心水食品，我地揀左一款拉麵和一款炒飯，合共只係千多日圓。店員便會安排座位，拉麵屬幼身，配料有叉燒、芽菜、紫菜、醃菜同溫泉蛋，湯底偏油，味道不錯，但唔算好有驚喜。炒飯則炒得極好，飯粒軟硬適中，配料極多，粒粒有味道，而且完全不油膩，我和朋友都俾滿分，500日圓的價錢抵到極。

Ramen Stadium的營業時間至晚上11點，大家大可先在運河城購物，待商店關門後才醫肚也不遲！

博多運河城（Canal City Hakata）

地址：福岡市博多區住吉1-2

營業時間：10:00-21:00（各店不同）

Ramen Stadium（拉麵運動場／拉麵競技場）（博多運河城五樓）

營業時間：10:00-23:00

九州自由行（三）：博多Green Hotel Annex超級方便又舒適

＊Green Hotel Annex在博多站的築紫口方向轉左入橫街即到，徒步只需2分鐘。

＊房間好乾淨舒適，面積尚算闊落。

＊電視機一角，房間的WIFI極佳。

＊浴室和廁所也算大。

＊沐浴洗髮用品全是資生堂出品。

Green Hotel Annex在博多站的築紫口方向轉左入橫街即到，徒步只需2分鐘，實在好方便。靠近博多站和博多巴士總站大樓，方便我地每日移動之外，站內有阪急百貨、手信店、Tokyu Hands、本地超市、地下街以及不同食肆等，實在係掃貨的好地方。

酒店方面，工作人員的英語不俗，絕對可以英語溝通。房間方面，呢間別館較同街上的Green Hotel 1和 Green Hotel 2為新，房間都幾大，放下兩張單人床之外，仲有好多地方走動和擺放行李。浴室亦算闊落，沐浴用品全部齊備，其中洗髮水、護髮素、沖涼液都係大大支資生堂任用。

由於酒店不包早餐，每日落街搵食也好方便，既有Family Mart便利店外，街旁的DEITOS別館有咖啡店和日式料理店選擇，早餐由300至500多日圓不等，甚至站內亦有不少外賣店舖供應早餐。我就偏愛其中一間對著街外的小咖啡店，吃個簡單早餐（一隻烚蛋、一片牛油多士加一杯咖啡）只係300日圓（唔使20元），比過香港的消費。食飽再坐車出發，時間剛剛好！

Hakata Green Hotel Annex (福岡)

地址：福岡県福岡市博多区博多駅中央街4-32

電話：092-451-4112

網頁：http://www.hakata-green.co.jp/annex/

九州自由行（二）：福岡機場及九州遊玩交通安排

＊過關後，在出口可以見到呢架免費穿梭巴士坐去國內線航廈，然後轉地鐵到博多站。

＊我地則選擇在2號巴士站坐機場巴士直接去博多站，車程只係十五分鐘。

＊在博多站大堂搵到呢個綠色窗口，即可以購買JR Pass。

＊三日的列車班次全部劃好指定席，放心晒。

在往返福岡機場的交通，由於博多市非常靠近福岡空港，所以車程極短，車費也極相宜，大家可以坐免費穿梭巴士往國內線航廈轉乘地鐵往博多站，或在機場直接坐巴士往博多站。抵達時，我地在機場出面的2號巴士站坐機場巴士，車程只係15分鐘，車費260日圓，即到達博多巴士總站大樓，非常方便，唯一要注意的是班次較疏，一小時只兩班，而且巴士沒有行李位，遇上人多行李又多，都好論盡。

回程時，一來有Pass在手可以免費坐機場線，二來行李太多，決定由博多站坐機場線，兩個站即到福岡空港站，然後再在地面轉免費穿梭巴士（車程12分鐘）到達國際線航廈，合共需時約半小時有多，車費差不多，但比機場巴士慢。

至於六日五夜的交通安排方面，六天買左三款唔同的Pass，第一款當然是JR九州鐵路周遊券（九州北部地區適用的三日券，售價7,200日圓），另外兩款則是方便在博多市內移動的福岡悠遊卡（Fukuoka Tourist City Pass：一款市內適用的820日圓Pass，一款是包太宰府交通的1,340日圓Pass），用齊呢三款Pass，再加散坐100日圓巴士，交通費完全有預算，好方便。

JR三日乘搭班次：

2/6/2015：博多＞別府（：Sonic13（9：57）

3/6/2015：別府＞小倉：Sonic22（10：:20）

3/6/2015：小倉＞博多：Sonic44（17：05）

4/6/2015：博多＞小倉＞門司港：Sonic13（9：:57）

4/6/2015：門司港＞小倉＞博多：Sonic50（18：41）

九州自由行（一）：九州六日五夜行程安排

＊別府的海地獄係國家指定名勝之一。

＊歷史悠久的小倉城。

＊香蕉超人係門司港的地標公仔。

2015年人上半年真係驛馬星動，一月沖繩，二月曼谷，五月新加坡，六月九州遊，實在都幾敗家。雖然名為九州，實際上只集中玩福岡縣加大分縣的別府，所以好悠閒，就算有兩天落雨，也對行程沒有太大影響。

九州六天行程安排如下：

第一天：香港（港龍：11:20飛）＞福岡博多＞博多運河城逛街兼吃Ramen Stadium拉麵（住宿：Green Hotel Annex博多綠色附樓飯店）

第二天：博多＞別府＞別府地獄遊（住宿：別府新松實酒店海薫る宿ホテルニュー松実）

第三天：別府＞小倉半天遊（魚町銀天街、旦過市場、小倉城、小倉城庭園、松本清張記念館）＞博多天神晚飯（住宿：Green Hotel Annex博多綠色附樓飯店）

第四天：博多＞經小倉轉往門司港站＞唐戶市場＞門司港烤咖喱午飯＞門司港市內遊（九州鐵道記念館、舊門司港三井俱樂部、海峽廣場(海峡プラザ) 、北九州市立國際友好紀念圖書館、藍翼門司吊橋）＞門司港一夢庵下午茶 （住宿：Green Hotel Annex博多綠色附樓飯店）

第五天： Marinoa CityOutlet＞福岡塔＞中洲川端一蘭總店晚飯（購買820日圓福岡悠遊卡）（住宿：Green Hotel Annex博多綠色附樓飯店）

第六天：太宰府＞中洲川端午飯＞博多乘機場線離開（購買1,340日圓包太宰府福岡悠遊卡）（港龍：16:40飛）

在六天行程中，乘坐港龍直航，上午機去，黃昏機返，時間不錯，可以玩足近五天，回程因延誤一小時，仲送500日圓的餐飲券俾我地，結果用來再買零食。

住宿方面，第一及三至五晚都是住在博多站旁的Green Hotel Annex，第二晚則住別府的別府新松實酒店海薫る宿ホテルニュー松実，兩間酒店都方便且舒適，真的不錯。