＊我的戰利品之一。
＊我的戰利品之二。
＊博多DEITOS裡面有大量九州特產，尤其唔可以錯過超市呀！
＊博多運河城部分商店仲提供退稅。
＊天神地下街走中高檔路線，唔係我杯茶。
＊唐戶市場的河豚產品五花八門，做手信都好！
＊門司港有大量香蕉製品，我買的香蕉蛋糕超好味！
今次六日五夜九州行，主要集中玩福岡，而掃貨血拚的地方亦都係福岡。可能因為日圓創新低，覺得九州的物品同餐飲都好便宜，所以無論日用品或零食都買左唔少，包括一件T恤、三件外套、一條褲、三對、兩把雨遮、三盒娥羅納英藥膏同埋膠布（因行程時撞傷，所以順便買盒）之外，仲有大量零食，其中幾個購物熱點值得跟大家分享下：
＊博多DEITOS（博多）
位於博多站筑紫口側地下1樓至2樓，1樓是網羅博多知名特產、點心的「土特產市場」（包括熊本熊產品、明太子），最正係超市，價錢平過阪急個邊好多，雖然唔係好大，但絕對值得掃貨，我除左買零食外，仲即場買左大大粒新鮮無花果（三大粒只係580日圓）來吃，超清甜。
出血指數：＊＊＊＊＊
出血目標：食物、餐飲
＊博多運河城（博多）
飯店、劇場、電影院、商店、餐廳、專賣店、展示廳等環繞著運河（Canal)而建的複合型商業設施。裡面有小店，亦有著名品牌如GAP、agnes b.等，GAP甚至低至4折起，小店物品價錢相宜，也有折扣，其中一間大型藥店提供退稅，慢慢行一定有收穫。而且五樓的拉麵運運動場（Ramen Stadium）當然唔可以錯過之外，姆明迷也可以幫襯地下的姆明餐廳。部分商店仲提供退稅。
出血指數：＊＊＊＊＊
出血目標：衣服、藥物、餐飲
＊天神地下街（博多）
位於九州最大的商圈天神，全長約600公呎貫穿南北的天神地下街。1~12號街中有流行服飾店、美食店、書店等150多家店面。不過，我地行過一圈，物品中高檔，無乜折扣，所以空手而回。而且餐廳選擇唔夠博多DEITOS的多，個人覺得唔值得花時間逛。
出血指數：＊＊
出血目標：衣服、書店、餐飲
＊Marinoa City Outlet（博多）
Marinoa City Outlet係九州最高級的名牌特價商品購物中心，從時尚的服裝到運動、裝飾用品、室內裝飾等各種類型的店舖大約有170多家。裡面的店舗的確好多折扣，面積好大，最好地圖中從中搵自己心水品牌，我就在GAP買左作運動外套，4,990日圓，折實2,990日圓。行到累，可以去Marine Side搵間餐廳醫肚或飲杯咖啡。
出血指數：＊＊＊＊＊
出血目標：衣服、床上用品、家庭用品、餐飲
＊魚町銀天街（小倉）
魚町銀天街就在小倉卜站旁，差不多係前往小倉城或旦過市場必經之地，成條街有好多商店，包括100日圓店DAISO，小型時裝店，大部分的貨品價錢好相宜，幾百至幾千日圓都有交易，我就在呢度買左一件褲一件外套。
出血指數：＊＊＊＊＊
出血目標：衣服、日用品、食物、餐飲
＊旦過市場（小倉）
典型的地道市場，售賣唔同類型的海產、土特產、蔬果，最吸引係其中一間海鮮飯的店舖，超級新鮮又相宜的魚生飯，實在係力推之作。
出血指數：＊＊＊
出血目標：海產、蔬果、餐飲（必吃魚生飯）
＊唐戶市場（門司港）
唐戶市場平日主要作為鮮魚批發及零售地的唐戶市場，每逢周五到周日（及國定假日），唐戶市場1樓會變成海鮮屋台街，吸引唔少人前來嘗鮮。我地當日係星期四去，主要見到售賣土特產和零食的乾貨，買來做手信都值得。
出血指數：＊＊＊
出血目標：土特產（必買河豚產品）
＊海峽廣場（門司港）
海峽廣場是集雜貨店、美術館、餐飲店為一體的綜合性購物娛樂設施，分為東館和西館。東館1層是海鮮市場，2層是餐飲店；西館內有各種土特產和雜貨店，出售北九州的土特產、和式點心、工藝品、紀念禮品等旅遊商品。
出血指數：＊＊＊＊
出血目標：土特產（必買香蕉蛋糕）、音樂盒、衣服
