清邁自由行（四）：在Nakara Jardin的秘密花園開餐

＊通過Nakara Jardin的門外，再經過一條綠色小徑，才會到達白色餐廳所在。

＊用餐的地方有白色帳篷遮蔭，並在各處擺放了風扇，完全無冷氣都覺得好舒適。

＊用餐區的另一角。

＊兩杯飲品都超級好飲，左的Fresh Lime才95銖，右的芒果加熱情果沙冰特飲也只是120銖。

＊烤豬扒與白汁忌廉煙肉意粉。

＊心太軟配埋雪糕和忌廉雜果，同樣好味。

整個清邁行程中，除了Whole Earth餐廳令我們回味之外，Nakara Jardin餐廳的環境和食物水準更叫人驚喜。

Nakara Jardin餐廳位於河畔的小花園之內，餐廳入口到用餐區要經過綠色庭園，周圍種滿花草樹木，空氣清新。用餐的地方設於戶外，由於有太陽傘遮蔭，四周又放滿風扇，通風之餘，也沒有蚊蟲滋擾的問題，大家可以安心品嘗美食。我們點左一份烤豬扒（460銖） 、白汁忌廉煙肉意粉（290銖）、兩杯特飲、一客心太軟配雪糕，合共1,300銖（約325港元）。烤豬扒肉質夠腍又juicy，意粉軟硬適中，醬汁濃郁；朋友的Fresh Lime清新好飲，而我的芒果加熱情果沙冰特飲更加濃郁好味，附送的芒果肉和熱情果更加係錦上添花。

雖然呢餐係全程最貴的一餐，但論環境和食物質素，絕對物超所值，令我們超級回味。

Nakara Jardin Bistro & Salon de Thé Restaurant

地址：A, 11 Soi 9, Charoenprathet Rd, Mueang Chiang Mai District, Chiang Mai 50100泰國

營業時間：11:00至19:00（星期三休息）

電話： +66 61 370 6466

清邁自由行（三）：Dom Café超級無敵西瓜冰

＊西瓜冰的賣相好可愛，但太大份量兼且偏甜。

＊超級大壺冰桃茶，好好飲，足夠兩個人飲用。

＊冬蔭功鮮蝦意粉辣得好惹味。

＊餐廳一角。

＊餐廳以甜點聞名，多款精緻蛋糕好吸引。

＊餐廳就在Think Park大黑貓旁，好易搵。

清邁另一間人氣餐廳Dom Cafe位於尼曼區Think Park文創廣場旁，樓高三層，以甜點聞名，提供多樣主食、甜品及飲料，著名的有超級大大個西瓜冰。我們慕名而至，除點左西瓜冰之外，仲加點桃茶和冬蔭功鮮蝦湯意粉。

冬蔭功鮮蝦湯意粉辣得來好惹味，鮮蝦亦肉質煙韌，好味道。至於傳說的西瓜冰，大大個西瓜肉造型賣相的確可愛，難怪網上熱議。可惜份量實在太大，而且較甜，食極都食唔晒，挖下去仲發現原來有雜果和類似蒟蒻的物體，最後都難以消滅整個刨冰。再到朋友的桃茶，更是大得驚人，我們懷疑有超過一公升以上的份量，甜度適中，解渴消暑，同樣因為太多而難以消滅。下次再來，我們只會點一壺桃茶兩人分來飲，西瓜冰就怕怕了。

Dom Cafe

地址：165 Huaykaew Rd, Tambon Su Thep, Amphoe Mueang Chiang Mai, Chang Wat Chiang Mai 50200泰國

營業時間：08:30–20:30

電話： +66 53 215 250

清邁自由行（二）：Whole Earth人氣餐廳價錢相宜又美味

＊綠色庭園中的泰式建築物就是餐廳所在。

＊餐廳室內裝潢好雅致。

＊鮮蝦炒河。

＊炸豆腐炒雜菜。

＊雞肉春卷。

＊芒果印度特飲。

＊秘製梅子醬炸魚餅。

＊原味菠蘿炒飯。

＊醬油炒通菜。

我們酒店（Yaang Come Village）旁邊有間人氣餐廳Whole Earth，供應泰國、印度、素菜，好多網友推介，價錢中等，於是慕名光顧過兩次，分別幫襯了午餐和晚餐。

餐廳坐落在一個種滿樹木的庭院之內，四周綠油油，其中一幢兩層高的泰式建築物就是餐廳的所在，客人須先在地下除鞋，然後登上二樓用餐。二樓的用餐區分戶外走廊位置和室內兩部分。整間餐廳採用木建築，鋪設了木地板，布置充滿泰式情調。兩次光顧的時段都不見太多客人，而且都是三三兩兩的斯文客人，非常寧靜。

午餐方面，我們點左鮮蝦炒河、炸豆腐炒雜菜、雞肉春卷，價錢約700多銖 （約180港元）；晚餐則點左原味菠蘿炒飯、秘製梅子醬炸魚餅、醬油炒通菜，再加兩杯特飲，價錢約1,100多銖（約280港元）。兩餐的食物水準都很不錯，我的芒果印度特飲超濃郁，令人好回味。相信下次再來清邁，都會順道再幫襯。

Whole Earth

地址：88 Sridonchai Road, Chiang Mai

電話：+6653-282-463

時間：11:00 - 22:00

清邁自由行（一）：Yaang Come Village鬧市中的桃源

＊酒店由多幢兩層高的泰式尖頂建築物組成，每幢約有七八間房間。

＊我們住的雙床房，放落兩張大床後，仍有寬敞的空間走動。

＊房間外的露台可以看到種滿花草樹林的庭園，環境好清幽。

＊每天房間供應的水果。

＊早餐食物質素雖然唔係好高質素，但絕對唔差。

＊用餐時間唔多客人，可以在安靜的環境慢慢嘆。

＊酒店的接待大堂。

＊酒店泳池。

3月淡季，又飛一轉清邁。計埋今次，已經係第三次去清邁，貪佢機票便宜，酒店亦唔貴，市內交通方便，只要揮揮手就可以有雙條車任你搭，每程車費每人大約都係三四十銖，好過去曼谷坐Sky Train上上落落咁麻煩。

遊清邁純粹在市內（舊城區、尼曼區和夜市區）遊走，在酒店攤抖順便在午後游游水，搵間靚靚餐廳嘆個美味午餐或晚餐，再在晚間逛逛夜市，做做按摩，買買手信，三四日話咁快過去。

今次坐的都係香港快運，連寄艙行李，每人唔使1,200元。另外再在Expedia.com.hk訂Yaang Come Village三晚酒店，由於有積分和折扣，每晚才三、四百元，每人連機票加三晚酒店包自助早餐，唔使1,700元，平過去澳門。

Yaang Come Village位於河畔，鄰近夜市，步行幾分鐘即到，由機場坐雙條車（申費：150銖）大約20分鐘左右便到達。酒店雖然建成有一定的年份，有點老舊，但保養得很好，佔地都算廣闊，四周種滿花草樹木，好有度假FEEL，令人恍如置身園林般清幽閒適，完全想像不到五分鐘之外便是車水馬龍的街道，絕對旺中帶靜。酒店由多幢泰式建築小屋組合而成，每幢小屋兩層，各層有四五間房間，合共約有四、五十間房，面積由400呎到700呎，非常闊落。我地住的是雙床房，足有400呎，無論房間和浴室都好寬敞，每日除有兩支水外，仲有兩隻蕉一個芒果供應，好貼心。

每日供應的免費自助早餐也比想像中豐富，冷熱盤、穀物、水果、飲品、粥品等，一應俱全，仲有專人炮製煎蛋、烚蛋或炒蛋，由於房間所限，客人並不多，更加無旅行團入住，可以每天靜靜地享用早餐，實在賞心樂事。到下午回來，再在泳池游水消暑，同樣無人同你爭個泳池，實在超舒服。

值得一提的是，酒店旁邊有間人氣餐廳Whole Earth，供應泰國、印度、素菜，我地分別幫襯過午餐和晚餐，價錢中等，但味道很不錯，值得一試。

Yaang Come Village

地址： 90/3 Sridonchai Rd, Tambon Chang Khlan, Amphoe Mueang Chiang Mai, Chang Wat Chiang Mai 5010

網址：http://www.yaangcome.com/?lang=zh-hant

清邁自由行（七）：Big C Extra掃貨最後衝刺

＊Big C Extra係一個大商場，裡面有掃貨必去的Big C超市之外，仲有餐廳醫肚。

＊Big C超市超大間，亦都有超多折扣產品。

＊泰式零食當然唔少得。

＊Black Canyon Coffee的甜品－－－香蕉厚多士加雪糕，好正！

只係110銖，即25蚊！

清邁市區唔大，其實兩個全日都玩得差不多，加上天氣好熱，所以最後一日在酒店攤抖到中午check out為止，唔願再郁。最後諗到去老年咁遠的東面Big C Extra逛下。雖然河濱區已是東面，但坐篤篤或雙條車唔停咁開過去，都要20分鐘時間。

Big C Extra超級大，除有超市之外，仲有家居用品部，又有餐廳。呢間超市大過Maya商場個間，而且貨品的價錢亦便宜唔少。逛完之後，我地就順便在商場內的Black Canyon Coffee食個悠長午餐，最後食埋甜品先離開。

返到酒店，拎行李，並訂左酒店專車往機場，離開清邁。

整體來說，清邁市唔太大，若好似我地雖然話四日三夜，實際只有三天時間的話，齋玩市內已好夠，而且天氣太熱，實在唔適宜整日在露天活動，建議大家中午以後返酒店攤抖，黃昏再出動。不過，就算我地唔勞累，結果我都打敗仗，最後一日感冒發熱，返到香港仲咳到肺癆鬼咁款，真係好耐都未試過。

清邁自由行（六）：尼曼區逛街按摩一條龍

＊尼曼區好多小店外，按摩店也多，我地就幫襯呢間Trip Advisor都讚好的The Artist Spa。

＊我地做兩個鐘的泰式按摩只係500銖。

＊呢間Mont Blanc Sweet Cafe就係我地下午茶的地方。

＊Mont Blanc Sweet Cafe好大，無咩人，我地包場。

＊Mont Blanc Sweet Cafe好多糕點，但我推薦大家食窩夫好過。

＊我地的下午茶。右邊的窩夫即叫即做，好味道。

＊尼曼區的小店門外，經常出現好多大公仔，順道留影都幾得意。

＊尼曼區的小店。

＊創意市集Think Park。　

＊尼曼區的大型商場Maya，內裡的名牌店舖唔太值得看，超市亦貴，

B1樓層的小老板專門店有超多小老板出品的零食，記得唔好錯過。

玩完3D博物館，隨手就截架雙條車前往尼曼區消磨下半晝。尼曼區好大，我最初打算幫襯網友推介位於17巷尾附近的Crazy Noodle，點知行勻成條街都搵唔到，頂住大熱頭頻頻撲撲，真係好辛苦，結果唯有放棄。

幸好整個尼曼區有好多條橫街，每條橫街都有唔少cafe，終於搵到間有冷氣的小店食個簡單午餐後，就唔想再同太陽玩遊戲。去左間Trip Advisor都推介的平靚正按摩店The Artist Spa，做左兩粒鐘泰式按摩，舒展下筋骨。按摩店有幾層樓，我地上左二樓的房間，乾淨寧靜，師傅手勢好，力度又適中，似曼谷的Asia Herb格局，實而不華。兩個鐘的泰式按摩只係500銖，折合只係百零蚊港幣，實在好抵。

按摩完，已近黃昏，太陽熱度散去唔少，終於可以行下橫街小店，尼曼區好多精品創意小店，細心搜尋必搵到心頭好。不過，民以食為先，我地揀左Mont Blanc Sweet Cafe食下午茶。小店無論設計跟甜品都走東洋風格調，我地選左店員推介的栗子撻同雪糕窩夫（兩者都係119銖），另加一杯檸檬茶同梨茶。栗子撻味道無咩特別，同香港的分別不大，無驚喜；反而雪糕窩夫即叫即做，雪糕綿滑，窩夫暖又好味，絕對係必食之選。呢餐下午茶吾使100蚊港幣，抵！

食完下午茶，沿著尼曼路的南方前行，便會經過創意小市集Think Park，跟住就係大型商場Maya。黃昏時分，商場外擺放左唔少攤檔，價錢比夜市的略貴。至於Maya地下樓層佔地面積最大的超市RIMPING，類似citysuper檔次，較高貴，反而發現同一層有小老板專門店，老友最鍾意，買左超多零食做手信，滿足購物欲之後，再上四樓去Food court嘆個河粉，四五十銖有交易，食飽就坐雙條車打道回酒店。

清邁自由行（五）：Art in Paradise 3D 館影餐飽

＊Art in Paradise 3D博物館係我地進擊的第五間3D館啦！

＊呢間又有一隻大貓。

＊呢隻大手在曼谷分館未見過。

＊館內畫作好多，就算好多人都可以避到。

＊原本要除鞋的地區，呢Ｄ細路都唔理，又無工作人員提點，清潔度唔及曼谷分館。

清邁天氣熱到無命，最適宜室內活動，所以決定去Art in Paradise 3D博物館玩個上晝消磨時間。其實，自從2013年以來，我同老友已經係第五次踏足3D博物館了，之前去過的地區包括濟州、首爾、曼谷、新加坡，實行玩盡東南亞3D館！

Art in Paradise 3D博物館位於夜市區的下方，2013年7月正式落成，樓高三層，分成8區，超過100幅作品，館內每區有不同的主題－－上山、下海、大自然、抽象、歷史、世界名勝等等。相比曼谷的分館，呢間清潔情況無咁好，就算顯示要除鞋的地方，好多小朋友都唔理，又無工作人員嚴格執行，更加唔見有工作人員密密清潔。當日九點幾去到，最多的居然係當地人，而且多是一家大細，幸好館內畫作多，要避開人潮都唔太難。於是玩下停下，我地兩個老大人居然都玩左近三個鐘頭。

Art in Paradise 3D博物館

地址：199/9 Chang Klan Rd, Mueang Chiang Mai District, Chiang Mai 50200

電話：+66 53 274 100

營業時間：09:00–19:00

入場費：大人每位400銖

 網址：http://chiangmai-artinparadise.com/introduct.php

清邁自由行（四）：夜市區愈夜愈熱鬧

＊在Warorot Market附近落車，四周都係生果檔，價錢好便宜，

尤其士多啤梨，不過我地無幫襯。

＊黃昏時分，Warorot Market的店舖陸續收檔，不過都有售賣乾果雜貨的店繼續營業。

＊我地去Warorot Market對面的龍眼市場，同樣都係賣乾果雜貨，

買左好多龍眼乾，大粒又清甜，好抵！

＊咁多選擇，而且價錢便宜，做手信一流。

＊我地就係呢間Street Pizza食簡單晚餐。

＊Street Pizza位於二樓，充滿懷舊情調。

＊我地坐露台座位，好有情調。

＊呢個十吋薄餅只係48蚊！

＊夜市攤檔隨街可見，慢慢行慢慢睇，一定有收穫。

＊清邁草垛夜市（Ploen Ruedee Night Market International Food Park），

裡面主要係飲食攤檔。

＊逛到餓餓地，就地搵個芒果糯米飯當甜品，居然只係50銖，

只係曼谷一半的價錢，不過味道唔及曼谷咁好食。

＊又一個夜市－－Kalare Night Bazaar，裡面除左有攤檔外，仲有歌聽添。

＊買左兩件我愛清邁T恤，每件只係99銖，洗過唔甩色同縮水。

Warorot Market同各夜市區位於河濱區只係一河之隔的不遠處，所以今次我地只俾20銖就可以去到Warorot Market。Warorot Market是一個傳統市場，據講清邁人早上會來呢邊的菜市場買東西，種類非常豐富。我地黃昏到達，有些店舖已關門，未關的售賣乾果雜貨，對面的龍眼市場亦都係買類似的物品，我地就買左幾包Jumbo Size的龍眼乾，試食過好清甜，煲湯沖水淨食都得，又買埋芒果乾，賣相都好吸引。

行完呢兩個市場，趁夜市的攤檔未開晒，先搵地方醫肚。夜市區周圍其實唔多餐廳，行左十幾廿分鐘，俾我地發現一間二樓的薄餅店－－Street Pizza and The Wine Houzz，布置幾雅致，後尾先發現原來餐廳在Trip Advisor中排名極高（在1,434 家清邁餐廳中排名第 21）。我地唔太餓，只叫左一個10吋BBQ醬的烤雞薄餅（209銖），加一罐可樂一支水。烤雞薄餅配左帶微甜的BBQ醬，格外醒胃，果然好味。埋單只係200幾銖，即係唔使60蚊，抵到難以置信。

食完逛夜市，呢個區有好多個唔同的夜市，而且仲係天天營業，好似Kalare Night Bazaar同Anusarn Market，計計埋埋有數以百個攤檔，售賣各種各樣的泰式精品、工藝品、圍巾、紀念品等，價錢比曼谷的便宜。除兩大夜市外，仲有一個露天的清邁草垛夜市（Ploen Ruedee Night Market International Food Park），裡面主要係飲食做主打。想購物又想開餐的人士，必定大有收穫。逛到咁上下，又坐雙條車返酒店，每人30銖好過搭的士！

Street Pizza and The Wine Houzz

地址：15, 7 Thapae Rd Soi 5, Mueang Chiang Mai District, Chiang Mai 50100

電話：+66 85 073 5746