愉景灣酒店自助午餐冷盤甜品最出色

 各式沙律。

 海鮮選擇應有盡有，齋食幾款海鮮都幾夠皮。

 我的第一碟，當然主攻海鮮啦，海蝦尤其肥美出色。

 居然連七彩繽紛的軟糖都有，最啱中外籍小朋友啦～

 杯裝甜品超多款式，大大話話有二十款以上。

 我個人覺得除左cupcakes（因實在太漏）外，其他各款都好值得一試。

 呢碟甜品款款都好好味，甜度剛好，七款盡掃，正！後加楊枝甘露，同樣回味～

 在酒店門外等穿梭巴士時，見到有對新人坐馬車經過，幾浪漫～

愉景灣酒店外觀。

愉景灣酒店自助午餐冷盤甜品最出色

趁難得好天氣，尋日相約朋友到愉景灣喪食喪行半天遊。

第一站係先到愉景灣酒店嘆自助午餐。我地約在欣澳站坐巴士直達酒店，不過巴士的班次極疏，大約半個鐘先有一班車。結果我地坐11:35的班次，到達酒店差不多十二點，時間啱啱好。

可能係父親節前夕，餐廳的入座率都幾高，大約七成，而且大部分係外籍或本地的年輕小家庭，雖然都有好多中外籍細路仔滿場飛，但可能枱與枱之間好闊落，唔覺太嘈；加上餐廳一面係對著海景，所以感覺好開揚，陽光充足。

食物方面，種類很多，尤其冷盤的海鮮應有盡有，魚生（三文魚、八爪魚、吞拿魚）、小龍蝦、長腳蟹、青口、扇貝、海蝦，壽司，以及各式沙律，齋食呢Ｄ冷盤都值回票價。

不過，熱葷就較遜色，當然有魚類、羊架、炸雞、牛肉、蔬菜、湯類、意大利粉等，不過水準普通，唔食無損失。反而最緊要留肚食甜品。

甜品係整個自助午餐的亮點，全是小杯裝，賣相精緻吸引，我前後食左八款甜品，居然款款都好美味，難得在一Ｄ都唔甜，最令我回味的包括燕窩燉奶、楊枝甘露、藍莓芝士餅、芒果布甸，可以講得上可能係我食過最好味的自助餐甜品呢～

最搞笑係，我地入座無耐侍應不停問我地想飲咩，但我地想等到尾聲先飲，加上出面已經有熱飲的啡茶，所以不停拒絕。後來，發現左右枱都有鮮榨果汁或凍朱古力飲品，先多口問侍應，原來果汁或凍飲係包埋，而且係免費無限量添加。於是，我地就不停令蘋果汁，侍應又不斷添加，大大話話都飲左一公升～

兩個半小時的午餐，食得實在盡興又滋味。埋單，每人330元，唔算好便宜，但實在好有水準，值得再去。


Café bord de Mer
地址：愉景灣海澄湖畔路88號香港愉景灣酒店地下
電話：2295 8288
價錢：自助午餐$298（加一）（沒有信用卡優惠）

交通：由欣澳站A出口坐巴士可直達愉景灣酒店，不過班次約半小時一班，要吃自助午餐的話，坐11:35的車就最適合拉～