清邁自由行（四）：夜市區愈夜愈熱鬧

＊在Warorot Market附近落車，四周都係生果檔，價錢好便宜，

尤其士多啤梨，不過我地無幫襯。

＊黃昏時分，Warorot Market的店舖陸續收檔，不過都有售賣乾果雜貨的店繼續營業。

＊我地去Warorot Market對面的龍眼市場，同樣都係賣乾果雜貨，

買左好多龍眼乾，大粒又清甜，好抵！

＊咁多選擇，而且價錢便宜，做手信一流。

＊我地就係呢間Street Pizza食簡單晚餐。

＊Street Pizza位於二樓，充滿懷舊情調。

＊我地坐露台座位，好有情調。

＊呢個十吋薄餅只係48蚊！

＊夜市攤檔隨街可見，慢慢行慢慢睇，一定有收穫。

＊清邁草垛夜市（Ploen Ruedee Night Market International Food Park），

裡面主要係飲食攤檔。

＊逛到餓餓地，就地搵個芒果糯米飯當甜品，居然只係50銖，

只係曼谷一半的價錢，不過味道唔及曼谷咁好食。

＊又一個夜市－－Kalare Night Bazaar，裡面除左有攤檔外，仲有歌聽添。

＊買左兩件我愛清邁T恤，每件只係99銖，洗過唔甩色同縮水。

Warorot Market同各夜市區位於河濱區只係一河之隔的不遠處，所以今次我地只俾20銖就可以去到Warorot Market。Warorot Market是一個傳統市場，據講清邁人早上會來呢邊的菜市場買東西，種類非常豐富。我地黃昏到達，有些店舖已關門，未關的售賣乾果雜貨，對面的龍眼市場亦都係買類似的物品，我地就買左幾包Jumbo Size的龍眼乾，試食過好清甜，煲湯沖水淨食都得，又買埋芒果乾，賣相都好吸引。

行完呢兩個市場，趁夜市的攤檔未開晒，先搵地方醫肚。夜市區周圍其實唔多餐廳，行左十幾廿分鐘，俾我地發現一間二樓的薄餅店－－Street Pizza and The Wine Houzz，布置幾雅致，後尾先發現原來餐廳在Trip Advisor中排名極高（在1,434 家清邁餐廳中排名第 21）。我地唔太餓，只叫左一個10吋BBQ醬的烤雞薄餅（209銖），加一罐可樂一支水。烤雞薄餅配左帶微甜的BBQ醬，格外醒胃，果然好味。埋單只係200幾銖，即係唔使60蚊，抵到難以置信。

食完逛夜市，呢個區有好多個唔同的夜市，而且仲係天天營業，好似Kalare Night Bazaar同Anusarn Market，計計埋埋有數以百個攤檔，售賣各種各樣的泰式精品、工藝品、圍巾、紀念品等，價錢比曼谷的便宜。除兩大夜市外，仲有一個露天的清邁草垛夜市（Ploen Ruedee Night Market International Food Park），裡面主要係飲食做主打。想購物又想開餐的人士，必定大有收穫。逛到咁上下，又坐雙條車返酒店，每人30銖好過搭的士！

Street Pizza and The Wine Houzz

地址：15, 7 Thapae Rd Soi 5, Mueang Chiang Mai District, Chiang Mai 50100

電話：+66 85 073 5746

清邁自由行（三）：清邁熱辣辣古城遊

＊金碧輝煌的帕邢寺建立於1345年

＊參觀當日，有高僧在講道。

＊帕邢寺外的新建金色佛塔。

＊出左帕邢寺，沿著直街左逛右看，呢間精品店Indra Outlet

好多旅遊書同網友都有介紹。

＊買的主要是掛飾同精品，都好精緻。

＊Herb Basics係清邁當地出品的香薰用品專門店。

清邁機場二樓都有一間分店，價錢同區內分店一樣。

＊老友幫襯Herb Basics的產品，最上面的潤唇膏（Lip Balm）只係29銖，抵都極。

＊古城太熱，結果都係返河濱區去呢間Comedara Restaurant River Terrace餐廳醫肚。

＊Comedara Restaurant River Terrace餐廳都係靠河而建，布置都好雅致舒服。

＊太熱，食個泡飯易入口。

＊難得有清炒菜，夠清。

＊烤豬排，即係Ribs，好正。

來到清邁，當然先要逛逛古城區，古城區內最多的係寺廟，我地參觀左最著名的一間：帕邢寺（Wat Phra Singh）。金碧輝煌的帕邢寺建立於1345年，是清邁古城面積最大的寺廟，亦是整個清邁歷史最悠久的佛寺，香火最為鼎盛，而帕邢寺所在的朝代恰好是最具代表性的蘭納Lanna王朝。當日參觀時，殿內正有僧人講道，善信則細心聆聽。

參觀完帕邢寺，我地沿著拉查當儂路（Rachadamnoen Road）左看看右看看，其中Indra Outlet售賣精品掛飾，好多旅遊書同Bloggers都有推介，不過我就興趣不大。另一間位於十字路口的售賣香薰用品的Herb Basics，亦都係清邁必買手信之一。結果我地就在此買左超級抵買的潤唇膏（Lip Balm）（29銖）、潤手霜（99銖）、沐浴液等，非常便宜，送禮自用都咁好。提提大家，Herb Basics在清邁機場二樓都有分店，買唔夠可以臨走時再去補倉。

由於天氣太熱，中午過後，決定離開古城區，返回河濱區的Comedara Restaurant River Terrace餐廳食個午飯。天氣熱無咩胃口，我地叫左個清菜、烤豬排同鮮蝦泡飯，簡簡單單，味道都唔錯，盛惠700銖，價錢中上啦。

醫飽個肚，步行約五分鐘便返回酒店，一於養足精神，到黃昏再戰夜市區。

清邁自由行（二）：Rarinjinda wellness spa resort超值又舒適

＊check in後，奉上的welcome drink就係椰青兩個，超清甜解渴。

＊我地住的Pool Access Room，打開落地窗就可以跳落泳池。

全間酒店只有七間Pool Access Room。

＊我地露台有兩張靠椅，可以游完水攤抖又或晒太陽。

＊房間的浴室超大。

＊浴室用品全是酒店Spa的產品，香噴噴。

＊自助早餐在Deck 1餐廳進食，食物質素普通，但勝在種類多，

房客又唔多，唔會有搶食的情形出現。

＊鮮榨西瓜汁同甘筍汁外，仲有蘋果汁、番石榴汁、橙汁、牛奶。

＊坐在河畔嘆早餐好寫意。

＊餐廳戶外的座位就係咁，超舒服。

＊酒店仲有健身室。

＊介紹酒店歷史的展板。

呢間位於清邁河濱區以Spa聞名的Rarinjinda wellness spa resort，由機場坐的士，大約20分鐘即到，收費200銖，非常方便。晚上八點幾checkin時，由於酒店無法安排單人床俾我地，upgrade左我地入住一樓的Delux Pool Access Room。甫入到房間，打開落地窗，即可跳入泳池，實在超正。房間面積亦非常大，達500幾呎，單浴室面積差不多就等於一間房咁大。

酒店除左送上兩個椰青做welcome drink之外，每日仲會添加兩支水、兩個蘋果同兩隻香蕉，連水同生果都唔使俾錢買，認真貼心。

酒店包自助早餐，就在酒店對面馬路的Deck 1餐廳進食。馬路車來車往，但有保安24小時幫手開路截停往來的車輛，十分安全。早餐食物的質素唔算好高，普普通通，大路的食物如腸仔、炒粉麵、點心、粥、炒菜、麵包、穀物、乳酪、果汁等，仲有專人煎蛋、pancake，難得係咖啡可以揀Cappuccino，好有誠意。最正係戶外座位對正護城河，望住河景嘆早餐，實在賞心樂事。不過，樹上久唔久會有不明物體掉下來，同埋多蚊，要做足預防措施呀。

由於酒店位於河濱區，前往夜市區、古城區、尼曼區都要坐篤篤或者雙條車，我地主要坐雙條車出入，在馬路等三兩分鐘即有雙條車經過，收費大約20銖至50銖不等，每次將佢開的價講低10銖就可以成交，然後就上車，落車先俾錢，方便又便宜。

大致上，酒店無論設施、服務、位置以及價錢（我在expedia訂，連稅每晚900元），都係理想之選，唯一稍為不滿意的是房間的木地板，當踏上去就會滋滋作響，晚上若起身去廁所，隨時嘈聲另一半。另外，房門的隔音欠佳，遇著深宵返酒店唔顧公德的人在外面大聲走動喧嘩時，房內完全聽得一清二楚，睡著都被嘈醒。

Rarinjinda wellness spa resort

地址：1, 14 Chareonraj Rd., T. Wat Kate, A. Muang, Chiang Mai（距離機場約20分鐘車程）

電話：053-247000

網址：www.rarinjinda.com/

清邁自由行（一）：清邁四日三夜行程安排

＊我地住的度假酒店：Rarinjinda wellness spa resort位於河濱區。

＊清邁寺廟林立，古城區尤甚。

＊清邁夜市攤檔超多飾物，而且價錢便宜。

＊尼曼區內的Think Park係創意小市集。

今次買左香港快運平價機票，只係1000元左右飛清邁，於是住宿方面就豪少少，揀左位於河濱區以Spa聞名的Rarinjinda wellness spa resort，四日三夜合計2550元。

由於我地係晚機去（下午5點半飛）晚機返（晚上8點20分），只有三天時間遊玩，加上清邁天氣超級熱（高達40度），唔想太舟車勞頓到清萊或金三角遊玩，純粹只在市內遊走，行程極為簡單。

第一天：晚機抵達＞晚餐在酒店的Deck 1餐廳進食（入住：Rarinjinda wellness spa resort）

第二天：古城區遊覽＞返酒店攤抖＞黃昏遊夜市區（Warorot Market、龍眼市場同各個夜市攤檔）（入住：Rarinjinda wellness spa resort）

第三天：清邁Art in Paradise 3D博物館＞尼曼區按摩兼閒逛（入住：Rarinjinda wellness spa resort）

第四天：酒店check out＞Big C Extra購物兼午膳和下午茶＞到機場禁區內順路再按摩＞返港

提提大家，清邁勁多蚊，就算酒店房間或餐廳都充滿蚊蹤，一定要搽定蚊怕水先好出動去玩呀。