首爾冬遊記（四）：Western Coop Residence位置就腳，鄰近東大門商場

＊酒店位於乙支路5街，機場巴士直達到門口，真係好方便。

＊酒店大堂好細，但職員服務態度好！

 ＊牆上有層架和檯，方便放戰利品。我和朋友就晚晚將戰利品放上去，

到最後一日已擠滿整個層架啦～

 ＊床較細，每張只有兩呎半。

＊只有企缸，不過有沐浴用品（洗頭水和沐浴露）供應，牙刷和牙膏則要自備！

玩完汗蒸幕後，便返酒店Check in。我地住的Western Coop Residence（西方高爺公寓酒店），屬於service apartment，位置好方便，由機場坐6001號機場巴士直達，免卻坐地鐵（地鐵站的石級真係行到怕，日日上上落落都好吃力！）將行李搬上搬落的麻煩，步行往東大門幾個大型商場（Doota、Good Morning city、Hello aPM等）都只係十零分鐘腳程，而且有地下街可以直通東大門歷史文化公園站（地鐵路線包括2、4和5號線）12號出口，去邊度都咁就腳。酒店旁邊有CU 同埋GS 25便利店，要買T Money和增值都好方便。

房間方面，比想像中大，甫進入房門，先有一個方形廳，左面牆上有層架和檯椅，方便拽放和點算戰利品，廳的右邊則有廚櫃和鋅盤，並有少量家電（雪櫃、微波爐、電水煲等），想買東西返酒店下廚話咁易。

至於床鋪的確比較窄，只有兩呎半闊，肥人可能感覺迫狹，不過，我覺得尚可接受啦。

最初以為房間唔提供沐浴用品，結果發現居然有洗頭水和沐浴露，都算唔錯。不過，牙刷牙膏就要自備啦！

唯一唔方便的係鎖匙只有一條，若兩個人要分頭行動時，就有少少麻煩啦～

Western Coop Residence（西方高爺公寓酒店）
網上訂房（大約：1,000港元一晚）：透過Agoda網上預訂Western Co-op Residence
網址：http://rent.co-op.co.kr/rent_coop/chn/body09.htm
電話： 82-2-2279-4500
地址：77-2, Uljiro-5ga, Jung-gu

備註：在仁川機場坐6001號機場巴士可以直達，車程約1.5小時，費用為14,000韓元，列印優惠券減1,000韓元。
若坐地鐵的話，可在東大門歷史文化公園站（地鐵路線包括2、4和5號線）12號出口，通過地下體育用品購物街到17號出口上地面，再步行約幾分鐘即到酒店。