首爾冬遊記（三）：東大門汗蒸幕Sparex玩足四個幾鐘，爽！

  

＊東大門汗蒸幕Sparex位於Good Morning City的地庫B3。

玩完汗蒸幕，記得去一樓找換店換錢，匯價好抵！

 ＊在櫃枱俾錢後（我地早上來到，只7,000韓元搞掂），店員會俾兩條毛巾、一套衫褲和鎖匙（鎖匙只用來開鞋櫃和儲物櫃，唔可以當電子錢包）。

＊先搵番自己鎖匙的號碼，再將鞋放在鞋櫃內，然後便進入更衣室同埋澡堂，

大家肉帛相見啦～

＊地下暖笠笠，大家攤在大堂內，就地眠一眠！爽！

＊＊整層都係中國式布置，好古色古香，

我地就入左前面一間女士專用的小房內訓覺啦！

＊ 呢間蒸房最熱，80幾度，輕輕入一入去都頂唔順！

 ＊仲有另外兩個唔同溫度的窰室，溫度較可接受，

裡面居然有人訓到打鼻鼾，真係佩服。

＊呢間冰房，入完去，醒晒神！

 ＊浸浴後，可到飯堂買食物飲料醫肚。

 ＊呢兩杯就係人人必飲的甜米汁（2,500韓元），

好大杯，正好用來補充水分。

由仁川機場坐機場巴士到達Western Coop Residence，只係朝早八點幾，未到Check In時間（下午二時），所以一早決定放低行李，到韓劇主角們好鍾意去的汗蒸幕體驗一下，順便訓番幾粒鐘！睇過網友推介，覺得東大門Sparex既近酒店兼且又夠新，價錢仲好抵（非繁忙時間只係7,000韓元）！Sparex位於Good Morning City商場地庫B3，由酒店步行約十零分鐘就到，好方便。

在櫃枱交了7,000韓元入場費後，店員就會俾一套衫褲、兩條毛巾和一條鎖匙（鞋櫃和儲物櫃共用呢條鎖匙）。先到鞋櫃放鞋，再到裡面的女更衣室放下行裝和除衫，就可以進入澡堂。澡堂內，大家記得先沖身和洗頭，然後先至跳入唔同溫度的浴池慢慢浸呀。呢度一共有六個池，有熱（30幾至42度左右）有凍（18度左右），仲有桑拿室和蒸氣室，單單在此已可以消磨一個小時。

浸完浴後，穿上店員俾的衣服，就可以落下一層吃東西和玩汗蒸幕～我地當然先醫肚，小食部只收現金，記得落去前帶定錢傍身！我地揀左呢度必飲的甜米汁（2,500韓元）再加炸醬麵（5,000韓元），兩者都係韓劇主角經常食用的東西，幾大要試試！甜米汁味道似薏米水，清清甜甜，幾好飲。炸醬麵甜甜的，完全唔辣，不過好大碗，實在食唔晒，而且味道不外如是。

飲飽食醉之後，就出去搵地方眠一眠。大堂布置好有中國Feel，古色古香，見到唔少人就咁攤在地上，又或捐入窿窿內休息，其實呢度仲有睡眠室（男女分開，不過係碌架床，無乜Feel！），亦有唔同的小房可以攤屍，我地揀左間女士專用小房，便直接搵個枕頭在地上大覺訓啦～

睡足覺後，可以到另一邊的窰室試下烤箱的滋味，其中最熱（標示：中溫！）的高達82度！我入去感受一下，已經立時要出番來，坐得耐的話隨時變烤雞！仲有60、50、40幾度三個熱的窰室，60幾度個間其實都好熱，但我居然見到有人訓著左，仲要拉鼻鼾，勁！我都係坐到幾分鐘，已經要起身！除左熱窰室之外，亦有一個冰窰室，三溫暖的滋味原來就係咁架啦！

結果，我地由八點幾玩到下午一點，玩足四個幾鐘，只係幾十蚊，真係好超值！

東大門汗蒸幕Sparex

地址：東大門Good Morning city商場地庫B3
備註：澡堂內沒有沐浴用品和洗頭水，所以記得自備啦。另外，商場一樓的找換店的匯率相當不錯，甚至俾明洞6號出口旁的更抵！