廣島自由行（四）：閒逛岩國錦帶橋和岩國城

＊日本三大名橋之一－－岩國錦帶橋。

＊錦帶橋上。橋兩旁種滿櫻花樹，春天花開時，絕對是賞櫻名所。

＊坐纜車上山到岩國城。

＊居高臨下的岩國城。

＊岩國城內的錦帶橋模型。

＊在岩國城瞭望台上俯瞰岩國市全貌，錦帶橋清晰可見。

＊錦帶橋多間商店都聲稱出售100種口味雪糕，可惜天氣太凍，無試啦！

＊秋葉谷公園的紅楓落得七七八八，呢棵已經係代表作。

＊京香公園的鳥居。

＊我的岩國午餐：兩大作方形岩國壽司，再加一碗大烏冬，飽肚，但味道普通。

第三日天色終於好轉，雖然密雲，但已適宜到戶外賞風景。今日的目的地係到岩國逛日本三大名橋之一的錦帶橋同岩國城。由廣島站搭JR山陽本線直接至岩國站，車程大約51分鐘。到達岩國站後，在站旁的錦帶橋巴士站有來回錦帶橋的巴士紀念票，單程250日圓，來回500日圓。紀念車的班車好疏，一日只有五六班，我地九點幾到，最快的一班係10:25，我地坐的係昭和復古型紀念車，大約20分鐘就到達錦帶橋。

錦帶橋流經市內的錦川上，是岩國的象徵。橋長約 200 米、寬 5 米，是一座5孔木製拱橋，採用組合式的建造技法，不用一根釘子，係日本三大名橋之一。上橋前，可以買套票（錦帶橋門票 + 岩國城纜車 + 岩國城入城券），盛惠940日圓。過橋時，記住唔使急著將錦帶橋門票撕下來，因為回程從另一邊走回來時，工作人員先至撕落來架！

過左橋，周邊幾間商店都係雪糕店、食店同手信店，間間都聲稱有100種口味的雪糕出售，而著名的岩國食品就首推岩國夀司同蓮藕餅。經過商店往左面行大約十零分鐘，就到達登山纜車（ロープウエイ）前往岩國城。

岩國城於1608年興建完工，隨後在1615年江戶幕府頒布一國一城令，岩國城因而被廢城。現在的岩國城是日本100名城之一。纜車站位於錦帶橋附近的吉香公園，單程3分鐘，可供30人同時搭乘。到達後，行10分鐘左右即見到岩國城。岩國城內展出最多的係劍同刀，令人好易聯想到日本古代武士的切腹同戰爭，有少少不安，除此之外，亦展出錦帶橋的建造經過同模型。登上最高一層，從瞭望台上可以將岩國市盡收眼底，尤其見到錦帶橋的全貌，非常壯觀。

行完岩國城，坐纜車落山，再遊山下的吉香公園同秋葉谷公園，可惜紅葉唔多，滿足唔到追楓的願望。

午飯時間，在其中一間雪糕店樓上開餐，我點左岩國壽司定食（1350日圓），有兩大件方形岩國壽司再加一大碗烏冬麵。坦白講，方形的岩國壽司上鋪滿蛋絲，再加冬菇同蓮藕，味道帶酸，真係試過就算。

食完午餐，兩點多，在巴士站見有前往岩國站的普通巴士，唔理三七廿一，直接登車，無再等紀念車就返回車站，坐JR回廣島市，完成大半天的岩國遊。

岩國市（錦帶橋和岩國城）

前往方法：廣島站搭JR山陽本線直接至岩國站，車程大約51分鐘；或廣島巴士中心搭高速巴士，車程56分鐘，直接在錦帶橋站下車。出岩國站後，左手邊即是前往錦帶橋的巴士站，由岩國站坐巴士到錦帶橋約20分鐘。

＊若在假期時間，在岩國站的巴士站內可以買到類似周遊錦帶橋的套票：來回巴士 + 錦帶橋門票 + 岩國城纜車 + 岩國城入城券，只要1,150日圓。