釜山首爾追櫻記（廿四）：南山晨運後遊南山谷韓國村

＊有清晰指示牌上南山或落南山谷韓國村，唔驚唔識路。

＊南山環迴步道好幽靜舒服，晨運一流。若櫻花盛開，相信一定擠滿人。

＊抬頭見 N 首爾塔近在咫尺。

＊南山谷韓國村入口。

＊N 首爾塔映襯下，古與今，新與舊，一大對比。

＊入口旁放在公仔牌，等大家可以扮扮韓國古裝人。

 ＊N 首爾塔映襯下，古與今，新與舊，一大對比。

＊韓國村廣場正中央放左呢個木棚，木棚旁展示好多古代藤或草製用具，包括拖鞋。

＊韓屋村內的一些展示品，呢Ｄ應該係古代人用的織布工具吧。

歷史重演，上次首爾遊，因為同行朋友腸胃不適，最後一日我自己遊清溪川和光化門；今次同另一個朋友遊釜山加首爾，佢居然又話腳痛支持唔到，最後一日我又一個人出動，輕輕鬆鬆獨遊首爾小半天。

由於我地住在忠武路站附近，步行去南山谷韓國村只係十零分鐘腳程，再遠少少就係南山公園，所以就鎖定呢兩個景點慢慢行。

一個人在酒店大堂食左早餐後，由於八點半已到韓國村，見未開門，於是膽粗粗繼續往上直走，行下行下，居然見到南山北面環迴步道（North circuit）的指示牌，於是繼續行，原來係南山公園的一條步道。天朗氣清，沿途見到好多晨運客散步和慢跑，兩旁更種左好多櫻花樹，可惜又係未開花，幸好有黃色小花點綴，令步道更賞心悅目，難得 N 首爾塔就在頭頂，一抬頭就望到，行左半小時，見差不多到南山纜車站，就無謂繼續行，原路折返落番韓國村。

估唔到不過一個小時的時間，韓國村由無人到人聲鼎沸，村內充斥小學生和唔同國籍的遊客，尤以內地人和香港人最多。

韓國村好大，大門入口有小山坡，山坡左側的蓮花池中央，設有泉雨閣，係傳統表演的主要舞台。一旁的五間傳統韓式建築，在朝鮮時代稱為韓屋，係必遊的景點之一，因為韓屋村內的建築都是首爾市內其他地方的住宅，為左保存呢Ｄ文化古物，先將這些傳統住宅遷移到韓屋村裡。韓屋內擺放左好多韓國古時的物品和用具，令人眼界大開。當然，影相留念更正，彷彿時光倒流，進入古裝韓劇裡面，扮演一個半個小腳色～哈哈！另外，韓國村有好多免費體驗活動，大家若有時間的話，不妨參加一下。

逛到十點幾，就打道回酒店！兩個小時的首爾晨運活動就此結束，真係有Ｄ唔夠喉！

南山谷韓國村

前往方法：忠武路站3、4號出口，一出即有指示牌顯示，轉入橫街約100多米即到。

門票：免費 

網址：http://www.hanokmaeul.org（韓英日中）

開放時間：4 至 10 月：上午 9 點至晚上 9 點；11 至 3 月：上午 9 點至晚上 8 點

休息日：每周二

釜山首爾追櫻記（廿三）：明洞濟州家烤肉味道普通唔惹味

＊豆腐湯除有豆腐外，仲有菜絲蛋花等，微辣，係最好味的一道菜啦！

＊煎餅同樣係魷魚鬚做主打材料，點埋醬料入味好多。

＊今次呢間店用的係呢個傾斜的平鐵板烤肉類，味道無咁香口，

結果相都懶得影，可想而知幾唔好食呢！

＊由那度香的橫街直行幾步，試另一間叫濟州家生牛排的烤肉店。

午後遊埋梨大，繼續無櫻可賞。黃昏到明洞樂天免稅店加超市，可能有過上次血拚經驗，兼且護膚品仲有一大堆未用，所以好克制，最後只埋三幾支潤唇膏就閃，連卡都無簽！

晚上，由那度香的橫街直行幾步，試另一間叫濟州家生牛排的烤肉店。

呢間店主打係本地人，賣的是濟州牛肉，可惜我唔食牛，所以由朋友一力承擔，佢食的叫調味牛排（30,000韓圜），而我揀左濟州生豚三枚肉（應該即係五花腩）（11,000韓圜），再加一個豆腐湯和煎餅。

今次的烤肉唔用那度香的內陷龜背鍋，而係一個傾斜的平鐵板，然後將牛肉和豬肉放在鐵板上烤，烤出來的油慢慢沿斜斜的鐵板滴落長鐵盤內。不過，用呢塊無孔的平鐵板烤出來的肉唔夠香口，無乜燒烤味。朋友直頭佢烤得過熟先俾佢食，須知牛肉烤兩下都可以食，但店員居然等到豬烤好後，先一次過叫我地可以開餐，牛肉唔老就有鬼！而且佢地提供的包肉的菜葉又細又少，加上又無醬料，我真係唔覺得好味。

至於豆腐湯除有豆腐外，仲有菜絲蛋花等，微辣，都不錯！煎餅同樣係魷魚鬚做主打材料，點埋醬料入味好多。

埋單要加一，好似要六萬幾韓圜（折合約400幾港元）（上次那度香只係四萬幾，仲有益力多和明星相送！！！），係全程最貴的一餐，但我真係唔覺好好味！

濟州家生牛排

前往方法：

由明洞地鐵站15號出口靠右的一條橫街，先見那度香，再行多三幾步就見呢間濟州家架啦！（不過唔食無損失！）

釜山首爾追櫻記（廿二）：春川辣雞辣得好滋味！（新村站）

＊春川辣雞專門店好大間又有漢字，唔驚搵唔到。

＊店員先炒熟晒所有食材：新鮮配菜、魷魚鬚、雞肉，再加埋辣醬同炒。

＊再加我地後追的麵條。

＊一鍋新鮮熱辣的春川雞肉章魚炒麵完成，辣而不嗆喉，好惹味！

＊過左午飯時間，所以全店無人，後尾就來多一檯講普通話的女遊客。

遊完慶熙大學兼汝矣島，追櫻失敗後，到新村先醫肚。在新村大街（好似係 4 號）出左後，往左面的橫街走去，有好多唔同食店任你揀。

今次嘗新口味，試試春川辣雞專門店。呢間店除左有炒辣雞、炒辣雞加章魚（其實係魷魚鬚），仲有炒海鮮。我地揀左雞肉加章魚，只見店員將所有新鮮配菜、魷魚鬚、雞肉、辣醬統統放落我地面前的鐵鍋內，加蓋焗一焗，然後再開蓋係咁少炒炒炒（之前見店員在旁邊食的鐵板有拉麵，所以叫佢照辦煮碗，幫我地加麵），然後，加入麵條，再炒一陣間，熱辣辣又惹味的春川辣雞加麵即時食得啦！

一試之下，真係超好味！係就係辣左少少，但都可以接受得到，只覺惹味而不過嗆喉。雞肉嫩，連魷魚鬚都唔韌，加埋麵條就超飽肚。

呢餐埋單只係16,000 韓圜，即只係 112 港元，真係好超值！絕對值得向大家推薦！

春川辣雞專門店

前往方法：

在新村站4號出口出，大街旁的左面小橫街有好多食店，春川辣雞專門店就在其中，好大間，相片又大又精美，門口字又係漢字，唔怕搵唔到。

釜山首爾追櫻記（十）：慶和站櫻花樹下火車軌上漫步

＊慶和站原只係位於慶尚南道鎮海市慶和洞的火車沿線上的簡陋車站，

並於2006年起已停止載客服務。

 ＊火車每當經過此站時便會慢駛，等遊人可以捕捉列車

刮起的風而櫻花紛飛飄落的情景。

＊沒有火車經過時，遊人可以迎著落下的櫻花瓣漫步在路軌上。

＊月台上仍保存左慶和站的指示牌。

遊完余佐川橋，在鎮海驛對面馬路坐 107 號巴士到慶和站下車。

慶和站原只係位於慶尚南道鎮海市慶和洞的火車沿線上的簡陋車站，並於 2006 年起已停止載客服務。沿著鐵道兩旁生長的櫻花樹形成一條景致絕美的櫻花路，火車每當經過此站時便會慢駛，等遊人可以捕捉列車刮起的風而櫻花紛飛飄落的情景，我地在短短半小時之內，便見到兩次不同方向前來的火車駛過，櫻吹雪的壯觀場面真的令人讚嘆！

沒有火車經過時，遊人可以迎著落下的櫻花瓣漫步在路軌上，幻想自己係童話故事裡的主角，發發白日夢也不錯。

慶和站前往方法：

在鎮海驛對面坐107號巴士直達。

備註：由於慶和站為火車運行之鐵路，凡當火車行經時，請務必留意列車警報音提示及聽從工作人員的指揮引導。

釜山首爾追櫻記（九）：余佐川橋櫻花飄散時

＊向余佐川前行，沿途有好多慶祝活動和表演，好熱鬧。

＊在鎮海驛的左面再步行多幾分鐘，即到余佐川橋。

＊噢！櫻花落得七七八八，好可惜！

＊著名的余佐川橋。

＊賞完櫻花，可以在途經的攤檔試食和購物。

＊朋友買左呢Ｄ綠色珠珠，據經理講，只需將佢放入微波爐加熱幾分鐘，

即可放在肩膀或痠痛部位紓緩不適。

食飽繼續向前往，下一站係余佐川。沿途見四周舉行不少表演慶祝活動和路邊攤檔。見到鎮海驛，再繞左面後行不遠處到鎮海女子高中，旁邊就係余佐川橋，亦係韓劇《羅曼史》的拍攝地。

余佐川橋若兩旁種滿櫻花樹，盛放時會形成白茫茫的櫻花隧道，係鎮海最佳的賞櫻景點。可惜，我地見到的大部分櫻花已剩下花托和新葉，大風吹時，又見到櫻吹雪的淒美場面。不過，下著櫻花雨的的步道和下方的河川道，仍然很美，尤其在美麗的橋上以櫻花為背景更是指定動作，故此遊人絡繹不絕。 

行完余左川橋，不妨順便幫襯路邊販售的韓國街頭小吃，朋友就買左發熱按摩珠，只需將裝滿綠色小珠的包包放微波爐或熱水中加熱幾分鐘，即可將包包放在肩膀或痠痛部位，紓緩肌肉不適感。

余佐川橋

由軍校直行向上走，到達鎮海驛，左轉步行幾分鐘即到。

釜山首爾追櫻記（八）：鎮海明太魚湯鍋好滋味

＊魚湯鍋內有明太魚、雲吞、豆腐、大豆芽等，湯底鮮甜唔腥。

＊冷麵太大碗，凍冰冰，我唔太欣賞，朋友話好味。

＊海鮮煎餅，主要係魷魚鬚，點埋醬料更滋味。

＊典型韓式食店，大家坐在地上開餐。

＊在前往余佐川的途中，見到呢間咁大間的食店，果然不錯。

出左軍校直走，又返回北原圓環，一直向前走就係另一個必遊的櫻花景點──余佐川。我地先在途中午飯。

幫襯的韓式小館在馬路旁，甫坐下，即有普通話侍應招呼我地。見全店所有食客都點魚湯鍋，我地當然唔執輸，另加冷麵和海鮮煎餅。

魚湯鍋內有明太魚、雲吞、豆腐、大豆芽等，原先驚魚湯太腥，但飲落湯底鮮味帶微辣，味道不錯，試食左一件明太魚，唔太多骨，肉質鮮甜。

海鮮煎餅的材料主要係魷魚鬚，沾埋醬汁同食先夠味道。

冷麵就實在太大碗，魚湯鍋加煎餅已經食到個肚撐住，加上冷麵實在唔係我杯茶，再加埋已發到腍身的麵條，結果我只食左一小碗就算。

埋單合共 23,000 韓圜（161港元），真係超值得緊要。

魚湯鍋韓式小館

前往方法：由軍校出口步出，一直向住余佐川方向前行，大約十分鐘腳程左右即見。

釜山首爾追櫻記（六）：嘆便宜晚餐兼賞廣安里大橋夜景

＊廣安站 4 號出口直走，沿途可見好多水果攤檔，

大大盤士多啤梨只係 5,000 韓圜，真係抵！

＊廣安市場係本地人的市場，都係售賣水果雜貨，我地無行入去。

＊再折返轉向 6 號出口的橫街食店開餐，呢條紫菜包飯即叫即做，好好味。

＊阿珠媽即叫即捲紫菜包飯。

＊包飯內的各樣材料，幾豐富！

＊再來一碗拉麵，其實係辛字麵，不過加左雜菜絲和蛋花。

＊店舖細細，全是當地人幫襯，質素反而有保證。

＊門外貼滿不同食物相，吸引左我地幫襯。

＊廣安里浴場入口處。

＊燈光映照下的廣安里大橋。

由海雲台站坐地鐵到廣安站（209）下車，車程十分鐘左右。在 4 號出口出，沿路直走至廣安市場的馬路旁都有好多水果攤檔，售賣士多啤梨、番茄、柑等，大大盤統統由 5,000 至 10,000 韓圜，最後鎖定一間，老闆肯將士多啤梨減半分量賣俾我地，2,500 韓圜（17.5 港元）有一大袋真係好抵。

由於想睇廣安里大橋夜色，所以我地先食晚飯，在折返 6 號出口附近的橫街，誤打誤撞入左一間家庭式經營的小食店。雖然餐牌全韓文，幸好牆上有大相顯示，再加手指指其他食客所點的菜式，總算同老闆溝通到～

我地前後叫左兩條紫菜包飯，再加兩大碗拉麵。紫菜包飯即叫即整，好新鮮，內有紅蘿蔔、菜甫、蘿蔔和雞蛋等，唔使點醬都好有味道。拉麵其實係辛字麵，不過加入左雜菜絲和蛋花，熱辣辣食亦好滋味。除包飯和拉麵外，亦食左人地唔少泡菜！埋單居然只係 7,000 韓圜（35 港元！），真係便宜到唔信！！

飯後，向海邊方向走大約十零分鐘，遠遠即見廣安里海灘和廣安大橋。海灘全長約 1.2 公里，至於璀璨燈飾映照下的大橋則果然好靚，難怪不少人不停拍照留念，海灘的左面遠處則是 Centum City（大型購物商場）。大家若想慢步海灘，旅遊書建議可以在金蓮金站出，悉隨尊便。

廣安里家庭式小食店
前往方法：廣安站 6 號出口附近的橫街內
消費：紫菜包飯每條 1,500 韓圜，拉麵 2,000 韓圜

廣安里浴場

前往方法：由廣安站 6 號出口，向海灘方向步去，大約 15 分鐘即見廣安里海灘以及廣安里大橋