釜山首爾追櫻記（廿五）：六天行程追櫻指數總結

＊釜山櫻花代表：海雲台迎月路櫻花，近半櫻花已落，櫻花由盛轉衰。

＊近觀海雲台櫻花，只見櫻花落下，只剩花托和長出新葉啦～

＊鎮海海軍學校由於近海，天氣略涼，所以好多櫻花仍在盛放。

＊近觀軍校的櫻花，朵朵開得仍燦爛！

＊佛國寺外的櫻花公園，場面幾壯觀，株株皆怒放，真係好靚呀！

＊佛國寺櫻花公園另一景，好多人影相和野餐，感覺真係好舒服。

＊南山谷韓國村只見三幾株櫻花樹含苞待放，只有少部分花蕾開左花。

＊近觀韓國村的其中一株櫻花樹，都唔錯呀。

經過六日五夜（4月7日至12日）追櫻之旅，由最南面的釜山、鎮海，到稍稍北上的慶州，最後抵首爾，完全見識到櫻花由將開未開、燦爛怒放，以至開到荼靡的情況，總算不枉此行。

就等我總結各地櫻花開花指數，等大家知道我呢次追櫻的心路歷程：

釜山櫻花（包括釜山西面周邊、海雲台、廣安里、龍頭山公園等）

追櫻日期：4 月 7 日 至 10 日

追櫻指數：＊＊

最初以為釜山在4月上旬先開花，點知3月的天氣回暖，提早至3月底已密密開，以至我地抵埗後（4月7日），大部分櫻花樹已有近半落花並已長出新葉。

鎮海櫻花（包括鎮海市內、鎮海海軍學校、余佐川及慶和站）

追櫻日期：4 月 8 日

追櫻指數：＊＊1/2

鎮海也跟釜山有類似的情形，余佐川、慶和站皆如是，幸好鎮海海軍學校近海較涼，所以櫻花未落得太多。

慶州櫻花（包括慶州市周邊如、佛國寺、石窟庵等）

追櫻日期：4 月 9 日

追櫻指數：＊＊＊＊＊

慶州在釜山的北面位置，天氣早晚仍較涼，所以街頭四周仍然盛放的櫻花樹，其中最令人嘆為觀止的係世界遺產佛國寺外的櫻花公園，數以百株的櫻花開得異常燦爛，大風吹時，櫻吹雪的場景煞是好看！

首爾櫻花（包括慶熙大學、汝矣島、梨花女子大學、新村、明洞、南山公園及南山谷韓國村）

追櫻日期：4 月 10 至 12 日

追櫻指數：＊

雖然汝矣島在4月12日開始舉行櫻花祭，可惜我地4月11日去到，仍然唔多見櫻花的蹤影。同日遊慶熙大學、梨大等賞櫻勝地，都係失望而回。最後在南山公園步道和南山谷韓國村，亦只見一兩株稍稍開了部分花蕾的櫻花，相信要多三數天日子，先至可以等到櫻花怒放的壯觀情況。

釜山首爾追櫻記（十）：慶和站櫻花樹下火車軌上漫步

＊慶和站原只係位於慶尚南道鎮海市慶和洞的火車沿線上的簡陋車站，

並於2006年起已停止載客服務。

 ＊火車每當經過此站時便會慢駛，等遊人可以捕捉列車

刮起的風而櫻花紛飛飄落的情景。

＊沒有火車經過時，遊人可以迎著落下的櫻花瓣漫步在路軌上。

＊月台上仍保存左慶和站的指示牌。

遊完余佐川橋，在鎮海驛對面馬路坐 107 號巴士到慶和站下車。

慶和站原只係位於慶尚南道鎮海市慶和洞的火車沿線上的簡陋車站，並於 2006 年起已停止載客服務。沿著鐵道兩旁生長的櫻花樹形成一條景致絕美的櫻花路，火車每當經過此站時便會慢駛，等遊人可以捕捉列車刮起的風而櫻花紛飛飄落的情景，我地在短短半小時之內，便見到兩次不同方向前來的火車駛過，櫻吹雪的壯觀場面真的令人讚嘆！

沒有火車經過時，遊人可以迎著落下的櫻花瓣漫步在路軌上，幻想自己係童話故事裡的主角，發發白日夢也不錯。

慶和站前往方法：

在鎮海驛對面坐107號巴士直達。

備註：由於慶和站為火車運行之鐵路，凡當火車行經時，請務必留意列車警報音提示及聽從工作人員的指揮引導。

釜山首爾追櫻記（八）：鎮海明太魚湯鍋好滋味

＊魚湯鍋內有明太魚、雲吞、豆腐、大豆芽等，湯底鮮甜唔腥。

＊冷麵太大碗，凍冰冰，我唔太欣賞，朋友話好味。

＊海鮮煎餅，主要係魷魚鬚，點埋醬料更滋味。

＊典型韓式食店，大家坐在地上開餐。

＊在前往余佐川的途中，見到呢間咁大間的食店，果然不錯。

出左軍校直走，又返回北原圓環，一直向前走就係另一個必遊的櫻花景點──余佐川。我地先在途中午飯。

幫襯的韓式小館在馬路旁，甫坐下，即有普通話侍應招呼我地。見全店所有食客都點魚湯鍋，我地當然唔執輸，另加冷麵和海鮮煎餅。

魚湯鍋內有明太魚、雲吞、豆腐、大豆芽等，原先驚魚湯太腥，但飲落湯底鮮味帶微辣，味道不錯，試食左一件明太魚，唔太多骨，肉質鮮甜。

海鮮煎餅的材料主要係魷魚鬚，沾埋醬汁同食先夠味道。

冷麵就實在太大碗，魚湯鍋加煎餅已經食到個肚撐住，加上冷麵實在唔係我杯茶，再加埋已發到腍身的麵條，結果我只食左一小碗就算。

埋單合共 23,000 韓圜（161港元），真係超值得緊要。

魚湯鍋韓式小館

前往方法：由軍校出口步出，一直向住余佐川方向前行，大約十分鐘腳程左右即見。

釜山首爾追櫻記（七）：鎮海軍港祭登上軍艦見識

＊鎮海軍校入口。唔好同佢地影相，佢地唔會啋你架～

＊軍校兩旁種滿櫻花樹，幸好櫻花仍然開得好燦爛！

前面不遠處就要坐巴士入去基地，唔可以立亂行。

＊總站下車後，見到好多紀念相片和軍機，後面就係博物館。

＊近海邊有幾棵櫻花，開得好靚，大家爭住拍照。

＊上面係海士卒業生戰死者追墓碑。

＊依實際大小製作而成的龜船（李舜臣打造的鐵甲船）。

＊再上巴士，轉往碼頭上軍艦。

＊難得上甲板參觀，大家又爭住影相，連吉祥物都唔放過。

第二日的追櫻目的地係鎮海，因為聽講櫻花時節整個鎮海幾乎都會被櫻花覆蓋，處處都是賞櫻景點，加上當地正舉行櫻花慶典──鎮海軍港節（진해군항제）（由4月1至10日），海軍基地可以開放俾遊人參觀，當然要見識下啦！

坐地鐵沙上站（227）轉乘長途巴士前往鎮海，巴士車程約一小時（回程車較多，需時近一個半小時），11 點前便到達鎮海市外巴士站。原本想先遊余佐川，不過在迴旋處轉左，反而先去左鎮海軍校。錯有錯著，軍校入口附近的櫻花反而仍盛放，兩旁密密麻麻，非常壯觀，不過行左小段路，就俾警衛叫我地搭穿梭巴士直接前往，車資1,100韓圜，在終點站下車。

下車處的大片空地放左海軍紀念圖片、軍機，旁邊則為博物館和海士卒業生戰恐者追墓碑。四處種左唔少櫻花，可能近海位置較涼，櫻花仍未見散落，實在太好。

另外，仲上左依實際大小製作而成的龜船（李舜臣打造的鐵甲船），裡面展示左好多歷史文物。睇完龜船，再坐穿梭巴士（又收 1,100 韓圜），到下一個站下車，呢度有巨型輸送艦獨島艦開放，可以登上甲板參觀同拍照留念，機會實在好難得。

參觀完軍艦，又再坐穿梭巴士（又收1,100 韓圜）返回軍校入口。

鎮海（진해）（Jinhae）

前往方法：坐地鐵沙上站（227）下車，由 5 號出口步出。上到地面，麥當勞的左面商場（商場外牆有大大個 Food Court 字眼，好易認）便是前往鎮海的巴士購票和登車處。進入大堂，就會見到售票處，鎮海的車票 5,100 韓圜，不設劃位，買完就可以去指定的月台登車。

鎮海大半日行程建議：

鎮海海軍學校＞魚湯鍋午飯＞余佐川＞慶和站

海軍士官學校

到達鎮海市外巴士站，從北原圓環的李舜臣銅像沿著美麗的櫻花道一直走，即可以抵達金鳥海軍士官學校。

鎮海軍港節（진해군항제） 

舉行日期：每年4月左右（2013年的舉行日期則為 4 月 1 日至 10 日）

網址（有櫻花實況直擊）：http://gunhang.changwon.go.kr/2013/main.jsp (Korean)

小貼士：由於經常要俾錢坐巴士，大家最好預先將T Money 增值，費時無散錢俾車錢！

釜山首爾追櫻記（一）：釜山遊玩貼士 + 行程

＊西面站內有地下街，要血拚的朋友記得晚上八點前出動呀～

＊西面愈夜愈熱鬧，恍如香港的旺角，要搵食有好多選擇。

＊釜山的地鐵比首爾更深，同樣唔多電梯，上上落落，好考腳骨力。

＊要保持實力，都係搭Lift上落最舒服，呢個位於7號出口的Lift留低唔少我地的腳毛。

＊從釜山金海機場坐呢架往西面及南浦的機場巴士，第一站係樂天酒店兼樂天百貨，車程約20分鐘，落車後往右邊第一條橫大街直走200米左右就係我地的皇后酒店。

1 月去完首爾，意猶未盡，趁櫻花盛開的季節，再約朋友到韓國追櫻去。

今次的出遊日期係4月7日（日）至4月12日（五），合共 6 天 5 夜，由釜山入（港龍），首爾（國泰）出。釜山住 3 晚，首爾住 2 晚。由於今次只買機票，酒店就自己上網（Agoda）訂。今次係第一次去釜山，所以有些少旅遊小貼士可跟大家分享。

＊帶定韓圜傍身：釜山跟首爾唔同，市區無乜找換店，就算我地住的係西面站旺如旺角的中心地區，四周都無，唯一一間在我地住的酒店附近晚間營業的找換店，只兌換美金，而樂天百貨就只唱人民幣，銀行則要星期一先營業，搞到我地都好徬徨，好在我地各自有十零萬韓圜傍身，夠用一兩日有餘。所以，若大家係周日到埗，建議在香港唱定一千幾百，又或在釜山金海機場（機場價約 1:139 左右，市區價則 1:143 ）兌換。

＊住宿西面站最就腳：西面站非常熱鬧，食肆又多，儼如香港的旺角，由機場坐機場巴士約坐20分鐘車程，有地鐵1號線和 2 號線到達，前往各個主要旅遊點（海雲台、札嘎其市場、龍頭山公園、釜山火車站等，就算轉車去沙上站西部巴士前往鎮海或老圃站坐高速巴士往慶州）都只係十幾分鐘至半小時的時間，超方便！

＊汗蒸幕唔多且較Local：由於晨早機到達，所以又打算好似上次咁去汗蒸幕攤摙幾粒鐘，點知西面站周邊無乜汗蒸幕，問左好幾位本地人，搵左成個鐘，先搵到一間本地人幫襯的 24 小時營業的汗蒸幕，內裡的設備較首爾的簡陋，不太建議幫襯啦！

＊釜山地鐵深不見底：同首爾一樣，釜山的地鐵又係無乜電梯而且更深，經常上落樓梯的話，都要好好腳骨力，否則建議又搭Lift為上。

＊T Money釜山也適用：上次遊完首爾，無退回T Money，今次在釜山可以繼續用，而增值就去GS 25 便利店便可以，好方便。

＊釜山購物要趁早：雖然地面的食肆愈夜愈熱鬧，但西面站內的商業地下街和樂天百貨在晚上八點關閉，要血拚的話，要注意時間啦！

至於今次 6 日 5 夜行程，由於係晨早機去，晚機返，所以可以玩足近 6 天，我地的行程如下：

第一天：晨早抵金海機場＞西面站汗蒸幕＞下午往海雲台＞廣安里夜景（住宿：西面站 Goodstay Queens Motel）

第二天：沙上站坐長途巴士往鎮海（1 小時至 1.5 小時）＞參觀鎮海軍校＞余佐川＞慶和車站＞坐長途巴士返釜山＞西面商業地下街購物（住宿：西面站 Goodstay Queens Motel）

第三天：在老圃站坐高速巴士（約1小時）到慶州＞佛國寺＞石窟庵＞市內世遺景點（大陵苑＞天馬塚＞瞻星台＞雞林＞半月城＞石冰庫）＞晚飯（韓式傳統菜包飯）＞買皇南餅做手信＞坐巴士返釜山（住宿：西面站 Goodstay Queens Motel）

第四天：東萊溫泉川＞龍頭山公園＞國際市場＞BIFF＞札嘎其市場＞坐KTX高鐵到首爾＞夜遊明洞（住宿：忠武路站 Dalkom Guesthouse）

第五天：慶熙大學＞汝矣島＞新村＞梨大＞明洞樂天免稅店（住宿：忠武路站 Dalkom Guesthouse）

第六天：南山公園步道晨運＞南山谷韓國村＞明洞午飯兼最後血拚＞坐 6015 號機場巴士往仁川機場＞晚上 11 時抵港