顯示具有 韓國追櫻攻略 標籤的文章。 顯示所有文章
顯示具有 韓國追櫻攻略 標籤的文章。 顯示所有文章

2013年4月21日 星期日

釜山首爾追櫻記(廿五):六天行程追櫻指數總結


*釜山櫻花代表:海雲台迎月路櫻花,近半櫻花已落,櫻花由盛轉衰。


*近觀海雲台櫻花,只見櫻花落下,只剩花托和長出新葉啦~


*鎮海海軍學校由於近海,天氣略涼,所以好多櫻花仍在盛放。


*近觀軍校的櫻花,朵朵開得仍燦爛!


*佛國寺外的櫻花公園,場面幾壯觀,株株皆怒放,真係好靚呀!


*佛國寺櫻花公園另一景,好多人影相和野餐,感覺真係好舒服。


*南山谷韓國村只見三幾株櫻花樹含苞待放,只有少部分花蕾開左花。


*近觀韓國村的其中一株櫻花樹,都唔錯呀。


經過六日五夜(4月7日至12日)追櫻之旅,由最南面的釜山、鎮海,到稍稍北上的慶州,最後抵首爾,完全見識到櫻花由將開未開、燦爛怒放,以至開到荼靡的情況,總算不枉此行。

就等我總結各地櫻花開花指數,等大家知道我呢次追櫻的心路歷程:

釜山櫻花(包括釜山西面周邊、海雲台、廣安里、龍頭山公園等)
追櫻日期:4 月 7 日 至 10 日
追櫻指數:**
最初以為釜山在4月上旬先開花,點知3月的天氣回暖,提早至3月底已密密開,以至我地抵埗後(4月7日),大部分櫻花樹已有近半落花並已長出新葉。

鎮海櫻花(包括鎮海市內、鎮海海軍學校、余佐川及慶和站)
追櫻日期:4 月 8 日
追櫻指數:**1/2
鎮海也跟釜山有類似的情形,余佐川、慶和站皆如是,幸好鎮海海軍學校近海較涼,所以櫻花未落得太多。

慶州櫻花(包括慶州市周邊如、佛國寺、石窟庵等)
追櫻日期:4 月 9 日
追櫻指數:*****
慶州在釜山的北面位置,天氣早晚仍較涼,所以街頭四周仍然盛放的櫻花樹,其中最令人嘆為觀止的係世界遺產佛國寺外的櫻花公園,數以百株的櫻花開得異常燦爛,大風吹時,櫻吹雪的場景煞是好看!

首爾櫻花(包括慶熙大學、汝矣島、梨花女子大學、新村、明洞、南山公園及南山谷韓國村)
追櫻日期:4 月 10 至 12 日
追櫻指數:*
雖然汝矣島在4月12日開始舉行櫻花祭,可惜我地4月11日去到,仍然唔多見櫻花的蹤影。同日遊慶熙大學、梨大等賞櫻勝地,都係失望而回。最後在南山公園步道和南山谷韓國村,亦只見一兩株稍稍開了部分花蕾的櫻花,相信要多三數天日子,先至可以等到櫻花怒放的壯觀情況。

2013年4月14日 星期日

釜山首爾追櫻記(十九):西面站紫菜包飯做KTX午餐


*紫菜包飯專門店在西面站的7號出口,好易搵。


*阿珠媽即叫即做,先在飯面放上不同的材料,再捲起飯團,
然後掃上麻油才切片,再用錫紙包住整條包飯。


*呢條紫菜包飯就係我在KTX吃的午餐。


*紫菜包飯專門店有座位可供堂食,食物除包飯外,仲有其他選擇。


*釜山火車站KTX售票處有韓文和英文顯示,唔使驚睇唔明。


*售票處的右面有另一個顯示牌,則顯示列車停靠站的站名和到達時間。


*買完票,可以坐在售票處左面的候車室等候。月台就在四周的出口。


*車廂有點舊,座位亦較窄。

臨離開西面站時,買定兩卷紫菜包飯,以便 KTX (Korea Train eXpress)上做午餐。

呢間位於西面站 7 號出口的紫菜包飯專門店,位於我地每日必經之路上,經常隔著玻璃見阿珠媽幫客人即叫即做包飯,好似好吸引!

每條包飯 2,000 韓圜,裡面有蛋、黃蘿蔔、紅蘿蔔、菜甫、火腿、蟹柳等,長長的一條,好粗大,後尾食落,一條都好飽肚,兩個人其實買最多三條已經好足夠。

由西面站坐到釜山站,再按指示上地面,即遠釜山火車站。下午三點幾去到,KTX 售票處正發售3:30pm,為左唔想太趕,我地買左下一班(4pm)的火車。

車廂有點舊(比起日本新幹線差少少!),座位亦窄,行李要放在車廂外。

由於呢班停幾個站,去到首爾已經係6:45pm,比一般話大約2個半小時略為長一些啦!


紫菜包飯專門店

前往方法:
地鐵西面站7號出口轉右,過第一絛斑馬線,對面就係呢間小店啦~


KTX (Korea Train eXpress)
網址:http://info.korail.com/2007/eng/eng_index.jsp
車資:53,300韓圜(釜山至首爾單程票)
*另有KTX Pass可選擇,不過因為我地只搭一次,就無謂買Pass,其實若一日之內多搭一次,再加接駁其他火車的話,買Pass會好抵,因為一日Pass的價錢只係52.400韓圜(二人以上團體價)!



釜山首爾追櫻記(十八):釜山市內名勝半天遊


*龍頭山公園三大地標:花鐘、忠武公李舜臣銅像和釜山塔,一張相一次過影晒。


*龍頭山公園內唯一一株仍怒放的白色重瓣櫻花!重瓣的櫻花,
在日本和韓國都比較少見,真的好靚呀~


*落山後轉右,不遠處便是國際市場。貨色普通,似二手貨多D,可以不看。


*BIFF 廣場原是南浦洞劇場街,1996 年開始舉辦釜山國際電影節(Pusan International Film Festival),於是命名為「PIFF廣場(現稱 BIFF)」。


*國際明星和導演的手印!搵搵搵,我搵到徐克導演的手印!


*BIFF廣場必吃的堅果黑糖餅!盛惠1,000 韓圜。
超多人排,有內地團友排排下隊,因為等唔切而被迫放棄,真可惜!


*BIFF 廣場直落,就係札嘎其市場,右邊的露天漁市場發售各式各樣海鮮。


*室內的札嘎其市場樓高多層,時間關係,我地只去二樓見識一下。


*二樓有不少食肆,提供不同海鮮套餐,統統幾萬幾萬圜架。


*後方位置則是海味乾貨店。我同朋友都有幫襯,
我買左即食魚乾和大大粒淡菜仔,每包都係10,000 韓圜,唔错!

遊完東萊,即乘地鐵往南浦站,打算半天遊勻南浦洞周邊多個景點:龍頭山公園、國際市場、BIFF和札嘎其市場,一來呢幾個景點集中在南浦站和札嘎其站之間,二來下午要坐高鐵(KTX)往首爾,所以要抓緊時間。

龍頭山公園 遇見白色重瓣櫻花

我地先遊龍頭山公園,由南浦洞站 1 號有電動電梯登山(注意:電動扶手電梯只供上不供落,落山時要自己用腳行架!)。龍頭山公園原本係賞櫻熱點之一,可惜櫻花又係落得七七八八,只有一株白色重瓣櫻花怒放,吸引好多人影相留念。公園內有鮮花砌成的花鐘和忠武公李舜臣銅像,另外就係著名的釜山塔。釜山塔高120 公尺,你可以在釜山塔上觀看整個釜山市,不過,時間和金錢關係,我地無上釜山塔,逛遊一會,就原路行樓梯落山,轉右行幾分鐘,便到達國際市場。

國際市場 二手貨多唔吸引

國際市場曾被稱為韓國交易規模最大的市場,只要進入市場一趟,就可以買齊日常必需品等。不過,我就覺得貨品質素一般,有些似香港的花園街貨式,不太吸引,行左兩三條通道,便出番大街,見Pizza Hut 轉入去,就去 BIFF 廣場。

BIFF 廣場 必食堅果黑糖餅

BIFF 廣場原是南浦洞劇場街,1996 年開始舉辦釜山國際電影節(Pusan International Film Festival),於是將此劇場街一帶正式命名為「 PIFF 廣場(現稱 BIFF )」。每年都會把刻有釜山電影節得獎人的手掌、腳印的銅盤和得獎作品的銅盤鑲在廣場地面。當日見到好多人包括我自己,都會蹲低同手印合照,不過不時會有車經過,要拍照人士緊記安全為上。

臨離開廣場,記得一定要吃堅果黑糖餅,其中一檔招牌寫著元祖的排晒長龍,就知係好野!每個糖餅 1,000 韓圜(7 蚊港幣)。堅果黑糖餅由搓粉、炸餅,再加入黑糖和堅果,整個過程唔算耐,但人龍實在太長,所以我地都等左  20 分鐘以上!黑糖餅食落軟中帶硬,內有堅果添加左口感,不太甜,幾好味。

札嘎其市場 買海味做手信

跟住直落碼頭附近,就係札嘎其市場,右面係露天漁市場,有各式各樣的海鮮和海味乾貨發售,旁邊有食店,門前有即煎魚,不過我地都係無幫襯。行左小段,便轉到室內的札嘎其市場去。二樓係海鮮食肆,有各式海鮮套餐供選擇,後面較後位置,則有海味乾貨店,我地買左魚乾、紫菜、淡菜等,價錢適中,雙方都無開天殺價!

行完札嘎其市場,終於完成釜山市內半天疾走遊,返回西面站酒店取行李,再轉往釜山火車站,搭 KTX 到首爾去。

釜山市內半天遊行程建議:
龍頭山公園>國際市場> BIFF 廣場(必吃堅果黑糖餅)>札嘎其市場(買海味乾貨做手信)

前往方法:
由南浦洞站1 號有電動電梯登上龍頭山公園,然後轉往右方遊埋其他幾個景點,時間大約四小時左右啦。

釜山首爾追櫻記(十二):慶州世遺佛國寺賞櫻花


*佛國寺外的櫻花公園,櫻花怒放,令我地都心花怒放,真開心呀~


*佛國寺入口。


*世界遺產佛國寺,係慶州必遊景點之一。


*大雄殿。


*無說殿。


*飲聖水的地方,有D似日本寺院。


*舍利塔。


第三日繼續跑遠途,今次的目的係到慶州睇世界遺產兼賞櫻花。

坐地鐵到總站老圃站下車,走 3 號出口直達慶州高速巴士售票處,往慶州票價 4,800 韓圜,指定座位,9 點 30 分開車。購票後搭 Lift 落樓下搵月台登車,車程大概50分至1小時,10點半便到達慶州總站。

慶州是韓國新羅王朝的古都(睇過韓劇《善德女王》的韓迷應該都知唔少有關新羅王朝的故事!),據旅遊書形容慶州為「沒有屋頂的博物館」,古蹟處處,一日之內根本無可能遊勻所有名勝,必須作出取捨,我地鎖定必遊的景點為佛國寺、石窟庵、大陵苑、雞林、瞻星台等,遊玩次序由遠至近。從高速巴士下車後,即可旁邊的旅客中心取慶州地圖,並詢問佛國寺的巴士路線和穿梭石窟庵巴士的班次。

由旅客中心過對面馬路乘搭 10 或 11 號,大約半小時便到達佛國寺。在寺外有一個種左數以百株櫻花樹的櫻花公園,係賞櫻野餐的好地方。由於慶州位置較北,天氣較釜山和鎮海清涼,櫻花仍開得好燦爛,亦係整個行程見得最多最靚櫻花的追櫻勝地!

在巴士上結識左兩個阿珠媽,佢地好熱情,居然提議我地一齊在櫻花樹下野餐,仲請我地食年糕、蘋果、番薯、柑,又教我地韓文點樣祈禱和講一至十的韓文,最後,仲驚我地無錢食飯,想俾一萬圜我地,叫我地到附近攤檔買野食。當然,我地梗係無要啦,但佢地的熱情真係令人感動。

離開佢地之後,我地直上佛國寺。據史書《三國遺事》記載,佛國寺為751年新羅景德王的宰相金大城為紀念父母所建立。整個工程在 774 年由新羅王室在金大城去世後完工,並命名為佛國寺。

寺內的多寶塔、釋迦塔、藍雲橋和兩座金銅大佛等7個文物被列為韓國國寶。1995年,佛國寺和石窟庵一同被列為世界文化遺產。在寺內,居然俾我地見埋佛舍利,真的好難得。

遊完佛國寺,見仍未石窟庵的巴士到達時間,便在佛國寺櫻花公園旁的小檔食左魚板等小吃當午飯,爭取多些時間繼續遊玩。

慶州前往方法:
坐地鐵到老圃站下車,走3號出口即達慶州高速巴士售票處,票價4,800韓圜,大概50分至1小時就到了。高速巴士班次好密,十幾分鐘一班。

慶州一天行程建議:
佛國寺>石窟庵>市內景點遊(大陵苑、瞻星台、雞林、半月城、石冰庫等)>晚飯品嘗韓國傳統菜包飯>必賣手信皇南餅

慶州遊玩貼士:

1. 慶州天氣較乾,而且全是戶外景點,建議戴帽或擔遮,並要做足防曬措施。另外,戶外好大風,上到石窟庵甚至會有d凍,大家要注意啦!

2. 慶州景點多而分布範圍廣,等車時間亦多,所以有人會踏單車遊走穿梭,又或在慶州宿一宵。大家可以考慮一下。

3. 由於慶州的古蹟分布較散,好多時需時轉巴士到不同景點,建議大家在市區幫 T Money 多多增值呀。

佛國寺(불국사)前往方法:
由高速巴士總站下車,過對面馬路乘搭10 或 11 號巴士,車程約半小時
門票:4,000 韓圜

慶州佛國寺來往石窟庵穿梭巴士班次(12 號巴士)(車費 1,500 韓圜):
8:40<->9:00(每小時一班)
9:40<->10:00
10:40<->11:00
11:40<->12:00
12:50<->13:05
13:40<->14:00(每小時一班)
14:20<->15:00
15:20<->16:00
16:40<->17:00
17:20<->18:20