跟團追韓楓（四）：高麗大學、南山公園、三清洞、仁寺洞

＊高麗大學。

＊高麗大學的校園內好多楓葉。

＊高麗大學的歐洲式建築。

＊南山公園。

＊南山公園。

＊南山谷韓屋村：居然見到穿韓服男女正在拍攝廣告片或海報之類，驚喜～

＊o'sulloc茶室：綠茶特飲裡面有綠茶雪糕再加綠茶沙冰，超濃郁；

再配綠茶蛋糕，絕對可以用「濃滑綿軟」四個字來總結。

＊人人廣場Ssamziegil位於仁寺洞大街，今次都係第一次來。

＊人人廣場Ssamziegil內全是手作小店。

由於連續兩晚住仁寺洞IBIS，最方便散水自由行，加上朋友作病，更加有借口離團。

第四天早上，我地先遊高麗大學。高麗大學係韓國最大的私立大學，韓國私立大學排名第一，被韓國人簡稱為「高大」，這簡稱在不經意間表現出了高麗大學在韓國人心目中的地位。校園的建築採用古典的歐洲式風格，校園內種滿楓樹，秋天時係賞紅葉的勝地。

一出高麗大學站，右邊就係大學的所在。上午11點，校園好靜，我地兩個香港人當然好守規矩，慢慢行靜靜影，唔會亂闖課室或教學大樓。果然，校園內好多楓葉已變成火紅，有部分甚至開始枯謝，配上歐洲式風格的建築物，令人恍如置身歐洲之中。可能高麗大學稍遠離明洞、東大門，外面又無好似梨大購物街的旅遊熱點，所以在遊客心目中的名聲唔及梨花女子大學，亦令佢暫時唔會出現人滿之患。12點多，各個課室相繼放飯，三五成群大學生充斥大學校園，又係時間我地呢Ｄ外人要撤退啦！

轉往忠武站，到南山環迴步道賞經葉，然後返回南山谷的韓屋村閒遊。呢個行程，我在2013年的春天來過。上次係櫻花季節睇春色，今次就睇秋天楓葉，各有美態。南山北面環迴步道（North circuit）的兩旁，同樣出現顏色深淺不一的楓葉，遊人唔算好多，逛得寫意，也遊得開心。反而落番去韓屋村，就充滿著遊人，尤其內地旅客，所以稍微停留就去吃午飯啦～

下午坐車到安國站，先遊三清洞。雖然舊年11月已遊過一次，不過朋友無來過，而且我都好鍾意呢個地方，所以繼續翻炒舊景點。逛到咁上下，居然見到o'sulloc茶室，當然要吃個下午茶。呢幾年來過四五次韓國，今次先幫襯o'sulloc！我揀左杯綠茶特飲，裡面有綠茶雪糕再加綠茶沙冰，超濃郁；再配一件綠茶蛋糕，絕對可以用「濃滑綿軟」四個字來總結，雖然兩樣盛惠12,000韓圜，但實在令人回味無窮！

黃昏時分，我地行番落仁寺洞，反而係朋友出擊的大好時機，因為佢最心儀的韓式小袋通街有得賣，令佢心花怒放。

晚飯後，行番入橫街，就係我地酒店所在，好方便。

高麗大學

地址：首爾城北區安岩洞5街高麗大學  

交通：首爾地鐵6號線高麗大學站

南山谷韓國村及南山公園步道

前往方法：忠武路站3、4號出口，一出即有指示牌顯示，轉入橫街約100多米即到韓國村。再從韓國村往上前行約15分鐘，就可以到達南山公園步道。

三清洞路

前往方法：只要搭乘地鐵 3 號橘線，在「安國站」1 號出口下車，在安國洞很大的十字路口右轉，一直往上行就是，走到三清洞路入口約10分鐘腳程左右。

跟團追韓楓（三）：內藏山國立公園（白羊寺、內藏寺、秋楓大道）

 

＊白羊寺

＊白羊寺：古建築加紅葉映襯，靚！

 ＊白羊寺一瞥。

＊白羊寺的大雄寶殿。

＊內藏山必影的湖中亭。

＊內藏山：原來紅葉真係有唔同深淺的紅色架！

＊之前落過雨，遍地黃色銀杏葉，另有一番景致。

＊你在橋上看「楓」景，橋下的人則排排影「楓」景！

＊秋楓大道。沿途滿秋色，慢慢行半小時，完全唔覺累。

第三天，終於到左今次行程最期盼的景點－－內藏山國立公園（白羊寺、內藏寺、秋楓大道）。內藏山有「南韓第一楓葉山」之稱，名字包含有「山內所藏無窮無盡」之意。每逢秋天，滿山紅葉染上天際，吸引超多遊客同龍友慕名而至。我地當日上午先遊白羊寺，遊玩個多小時，然後再坐車到內藏山國立公園的山腳食過午飯，再跟導遊入公園，俾1,000韓圜坐穿梭巴士上內藏山國立公園的牌坊下，然後自由閒遊影相留念。

聽導遊講，今年天氣太暖，內藏山的紅葉往年係10月底全紅，而我地錯有錯著，今年剛好還撞正內藏山的紅葉全盛期，所以無論白羊寺或內藏寺，漫山遍野盡是顏色深淺不一的紅色楓葉，再加金黃色的銀杏點綴，咁靚的秋色真係咁大個女第一次見，比起舊年去過的首爾奧林匹克公園或一山湖水公園，實在完全唔可以相提並論。

欣賞完內藏寺之後，再沿著秋楓大道（楓葉隧道）慢慢行番落山腳，大約要行大半小時，但沿途的楓葉靚景令你覺得時間好快過，因為你仍然會唔捨得唔影，唔捨得唔睇。咁遠水路來到內藏山，果然好值得！

內藏山國立公園

地址：南韓全羅北道井邑市內藏洞 59 - 10   

從首爾前往方法：在首爾站或龍山站乘湖南線往井邑的火車、有一般及快速（KTX）兩種，再由井邑巴火車站轉乘市內巴士171號、171-1號，在內藏車站下車–內藏山國立公園事務所（需約1小時）（就係因為咁煩，所以我決定跟團都值得！）

網址：http://naejang.knps.or.kr (韓英日中)

跟團追韓楓（二）：寶城茶園、順天灣自然生態公園蘆葦林、竹綠苑、潭陽水杉道樹林

＊寶城茶園入口附近。

＊寶城茶園的紅葉似火。

＊層層綠茶田。

＊順天灣自然生態公園蘆葦林一望無際。

＊順天灣自然生態公園蘆葦林，真係比人身高更高！

＊順天灣自然生態公園蘆葦林的另一邊。

＊竹綠苑。

＊竹綠苑的鳳凰樓。

＊竹綠苑外，遠看盡是秋色，果真處處是楓景。

＊潭陽水杉道樹林的前半段，左邊仍是青翠綠色，右邊則全變黃了。

＊潭陽水杉道樹林，以為去左南怡島。

第二天開始，正式欣賞秋色。

第一站係寶城茶園。茶園佔地廣達150萬坪，甫進入口處，一字排開、鬱鬱蔥蔥的杉樹林與層層綠茶田即映入眼簾，加上紅葉襯托下，景色極其秀麗。可惜天公不造美，落著雨之下，有點掃興。行完後，仲包一杯綠茶雪糕。茶園內仲有唔少茶葉產品出售，豐儉由人，由幾千至幾萬韓圜不等，有團友買左大量的綠茶做戰利品。

第二站係順天灣自然生態公園。順天灣擁有廣闊展開的泥灘和蘆葦林，營造出神秘的美景。沿著40公里海岸線成形的順天灣，為世界5大沿岸濕地之一，2006年被列入拉姆薩爾公約，其生態保存價值為世界所公認。裡面的70萬坪(約210公頃)延展的蘆葦林比人身高更高，密密麻麻，一望無際，非常壯觀，實在好值得遊覽。

第三站係竹綠苑。從竹綠苑入口沿著石階一步步往上走，有一條能夠享受竹林浴的2.2公里步道，在竹林間穿梭都幾寫意。不過，由於時間關係，紅葉同杉樹比竹林緊要，團友決定早早集合，趕去最後一個景點－－潭陽水杉道樹林。

最後一站係潭陽水杉道樹林。兩旁的水杉齊天聳立，真係好似南怡島。頭一段的水杉，左邊仍是青蔥翠綠，右邊則全變成金黃色，綠黃交織，影出來的效果好有趣。一邊行一邊影相，慢慢前行，就見到兩邊的水杉全都變成金黃色，哇！如此秋色實在無得頂，幸好我地早少少到達，大半小時後，天色已全黑，真好彩！

幸好有旅遊巴招呼，一日四遊雖然好緊湊，但自然風景咁靚，乜都抵番，好滿意！

寶城茶園
地址：全羅南道寶城郡寶城邑綠茶路763-43 (寶城邑)

順天灣自然生態公園
地址：全羅南道順天市順天灣街513-25 (大垈洞)

竹綠苑
地址：全羅南道潭陽郡潭陽邑竹綠苑路119 (潭陽邑)

潭陽水杉道樹林
地址：全羅南道潭陽郡潭陽邑水杉路12 (潭陽邑)

跟團追韓楓（一）：五天賞楓行程安排

 

＊內藏山國立公園的秋色

 ＊順天灣自然生態公園蘆葦林

＊寶城茶園

＊潭陽水杉道樹林

＊南山公園

在魔鬼朋友的誘惑之下，剛跟完個五天團（11月8至12日）到韓國追楓去。

今次最大的誘惑係可以衝出首爾，跑長途到內藏山同全羅南道睇紅葉，車程大大話話四五小時無走雞，要自己安排的話，真係好花時間，所以被說服做鴨仔跟團去。

今次跟的五天團，連保險加領隊導遊使費5200元左右，航班時間亦理想（第一日坐國泰機上午9點30分去，最後一天坐晚上8點機回港，唔使坐凌晨機，我最Like！）其中一日我地仲可以散水自由行，實在好滿意：

第一天：下午三點幾抵仁川＞坐車四小時抵酒店（住宿：和順錦湖度假村）

第二天：寶城茶園＞順天灣自然生態公園蘆葦林＞竹綠苑＞潭陽水杉道樹林（住宿：和順錦湖度假村）

第三天：內藏山國立公園（白羊寺、內藏寺、秋楓大道）＞下午四時坐車返首爾＞晚上八時抵酒店（住宿：仁寺洞IBIS酒店）

第四天（自己離團）：高麗大學＞南山公園＞南山谷韓屋村＞三清洞閒遊兼吃o'sulloc綠茶下午茶＞仁寺洞（住宿：仁寺洞IBIS酒店）

第五天：化妝專門店＞手信店＞麻浦農水產物市場＞梨大購物街＞晚上八點機返港

在呢五天行程之中，有三天睇到紅葉，而且仲係全盛期的紅葉，顏色深淺不一的紅葉應有盡有，再加埋茶園、蘆葦林、水杉道，難得跟團都跟得過癮，實在係人生難得的一次！

今次真係多謝魔鬼朋友的引誘～

首爾追楓記（二十）：戰利品與仁川機場退稅

＊在 Etude House 和 Nature Republic 買回來的戰利品。

點解得呢兩間？因為呢兩間有特價！

＊Nature Republic：

Eye Cream（30,000 韓圜）買一送一

紙面膜（10,000 韓圜）十送十

男士爽膚水（7 折後：5,950 韓圜）（幫細佬買）

（其他是贈品）

＊Etude House：

城堡 Hand Cream 禮盒裝（一盒四款）

（7折後：16,520 韓圜，即115元左右，香港賣236元）

BB Cream（7折後：10,500 韓圜，即74元，香港賣148元）

洗面膏（7折後：5,250 韓圜，即37元，香港賣98元）

Body Lotion（8,500 韓圜，買一送一，即30元一支，香港賣98元）

潤唇彩（7折後：2,450 韓圜）

＊東大門 Good Morning City 商場買的冷背心，原價 48,000 韓圜，

連埋下面的白 T 恤（15,000 韓圜）一併買，

最後以 52,000 韓圜成交，慳左 11,000 韓圜。

＊白 T 恤（15,000 韓圜）

＊在三清洞路上，除有咖啡店外，更有不少小店正進行大減價，

以上的特價襪每對只係 700 韓圜，即折合 5 蚊港幣一對！

今次韓遊，除左買左兩件衫和幾對襪之外，買得最多又係護膚品！其實，我已經堅持唔減價唔買護膚品呢個原則，不過見到 Etude House 同 Nature Republic 剛剛減價，結果抵受唔到折扣的吸引力，尤其部分貨品低至半價，計番起來，平過香港門市近半有多，好似 Etude House 的 BB Cream，香港門市賣 140 元，而家 7 折後，只係 10,500 韓圜，約 75 元，點可以唔買呢？！

買埋買埋，當然要退稅。下午近 4 點半（我地坐大韓 8 點機）到達機場後，大家記得唔好辦登機手續，應該先拎晒全部填好個人資料的單據到海關櫃位（在大堂入口直行轉左手邊）蓋印，跟著旁邊會有工作人員教我地點樣用部自助機器 scan 護照同單據，完成所有程序後，先至好去辦登機手續。提提大家，退稅程序都幾快，但排隊辦登機手續就排足 45 分鐘，所以最好預鬆時間到機場。

過關後，再到 28 號閘口的退稅櫃位取回現金，由於我地的貨品在藍色和橙色兩間公司都有得退稅，所以排完藍色公司櫃位，再過隔籬排橙色櫃位，終於退回合共 9,000 韓圜（折合 63 元）的稅金，足夠食個下午茶！

五天首爾追楓玩樂遊，順利完成，期望下年再去過！

首爾追楓記（十九）：中部市場買海味

＊中部市場環境好整潔光猛。

＊各式各樣的海味。

＊魷魚零食也有唔少。

＊紅棗、合桃、果仁也有出售。

＊我買的淡菜，半公斤，好大粒，10,000 韓圜，煲左兩次來食，味道好香！

踏入最後一天，吃完自助早餐，見時間尚早，東大門各大商場又未開門，於是同老友到酒店附近的中部市場行行。中部市場位於華美達酒店正門的斜對面，過馬路後，見好多生果檔的街口直入便到達市場。

中部市場做海味批發兼零售，比一般市場便宜 20 至 30% 左右，因此唔少遊客甚至本地人都會來買海苔、魷魚、明太魚等韓國小菜用到的乾魚食品，亦有合桃、紅棗、果仁甚至人參等物品發售，聽聞好多人最鍾意買雞泡魚乾。不過，我地嫌呢度的海味份量太大，好難食得晒。結果，問到一個店主，肯將一公斤的淡菜拆開兩包，平均分俾我地，而且由原價 22,000 韓圜，減到 20,000 韓圜；淡菜好大粒，半公斤只係 70 蚊，真係好便宜，比舊年去釜山札嘎其市場更抵買！

中部市場

地址：首爾中區乙支路36街35（五壯洞）

前往方法：地鐵 2、5 號線乙支路 4 街站 8 號出口

首爾追楓記（十七）：石村湖追黃鴨兼逛樂天世界大廈（蠶室站）

＊石村湖上的黃色巨鴨。

＊相比海港城的追鴨人潮，石村湖的人群實在好疏落。

＊在樂天世界大廈六樓設有黃鴨的Pop-Up Store。

＊黃色巨鴨大解構。

＊揭示黃色巨鴨的世界遊蹤，右下角就係過境香港時的盛況。

＊位於同一層仲有星光大道（Star Avenue），不過要俾錢先可以入場。

門外放左李敏鎬、金秀緊同張根碩的蠟像。

＊樂天世界大廈地庫樓層的水族館已經開幕。

＊樂天超市有兩層，都有好多特價產品發售。

＊超市下一層有化妝品街，其中 Etude House 產品低至 5 折起，

售價平過東大門分店。

遊完奧林匹克公園，由夢村土城站搭一個站，返回蠶室站，呢度除左有樂天世界之外，仲有韓國最高摩天大樓兼複合文化空間－－樂天世界大廈及樂天世界購物城（高 555米、123 層樓）的所在。摩天大樓在 2014 年 10 月 13 日起，開放地下 6 樓至地上 11 樓，共計有樂天世界購物城、名品館、樂天超市、電影院、免稅店、水族館等約 1,000 餘間賣場。

第一個目標景點就係去石村湖追黃色巨鴨。由即日至11月14日，巨鴨會在樂天世界大廈旁的石村湖上現身。我地從蠶室站的 2 號出口直走，到蠶室路轉左即到。地鐵出口有指示巨鴨的所在，教埋你點行，唔驚搵唔到。

相比上次在海港城追鴨，石村湖的觀賞人數唔多，既可以近距離拍照，又可以走上幾級石級離遠少少取景，巨鴨仍然清晰可見。

若意猶未盡，大可以上樂天世界大廈的 6 樓，參觀黃鴨的Pop-Up Store，詳細了解呢隻巨鴨的結構圖和世界遊蹤。同樣位於 6 樓的仲有星光大道（Star Avenue），門外有李敏鎬、金秀賢同張根碩的蠟像歡迎你。不過，想入場就要俾錢，所以我地只在門外影兩三張相便算，無謂徙錢啦。

跟著，我地亦落埋樂天地市逛街，行行下，發現超市也有韓妝店，包括 Etude House、Innifree、Skin Food、Beyond等店舖，部分貨品居然有低至 5 折優惠，結果逛超市變左買護膚品，滿載而歸！

石村湖（석촌호수）追黃色巨鴨（蠶室站）

日期：即日至2014年11月14日

地點：首爾蠶室石村湖東湖（서울 잠실 석촌호수 동호）

前往交通：搭乘首爾 2 號線，於蠶室站下站，2 號出口直走，到蠶室路轉左即到

樂天世界大廈（蠶室站）

前往交通：搭乘首爾2號線於蠶室站下車直達