台中清境遊（七）：老英格蘭嘆高貴High Tea

＊三層架內放滿鹹甜糕點，再加前面一個芒果鮮奶酪，真係食唔晒！
旁邊係奉送的花茶。

＊除奉送一壺花茶之外，仲可以去出面自助添飲咖啡、茶和果汁。

＊維吉諾餐廳布置懷舊典雅。

＊餐廳的另一角。

＊據服務員介紹，整個莊園內的雕塑全由西班牙運來，

單係運送雕塑已經用上200幾個貨櫃。

＊老英格蘭莊園外貌好宏偉，有點似英式古堡。

老英格蘭莊園設計古典優雅，據講係都鐸式建築，以維吉諾餐廳（Virginal Restaurant）的英式下午茶（High Tea）聞名。前一日經過時，由於下午茶（只至到下午 4 點）時間已過，所以被拒諸門外。

今次遊完小瑞士花園，再沿著車路，驚險萬丈地向下繼續步行，大約十多分鐘，終於到達老英格蘭莊園，看看手錶，下午 3 點，哈！今次仲唔入到去嘆 High Tea！

價錢方面，每位 450 台幣（另加一，折合約 132 港幣），進餐時間一個半小時。三層架有 10 件糕點，甜比鹹多，再送一個鮮奶酪，配一壺花茶。餐廳中央另設自助飲品區，有果汁、咖啡、茶，可以自行無限次添飲。

坦白講，嘆呢個 High Tea 純粹係滿足虛榮心多過胃口，畢竟維吉諾餐廳（Virginal Restaurant）的環境設計有點似香港的半島酒店，充滿懷舊典雅風情，齋坐食環境也覺愜意！糕點的水準唔差，只不過太多，尤其最底一層的英式鬆餅和蛋糕，實在太漏了！最後，大家將剩下來的糕點打包，拎回去給民宿的工作人員品嘗，總算無浪費食物。

老英格蘭莊園（The Old England）
地址：台灣南投縣仁愛鄉壽亭巷 20 之 3 號
電話：+886 4 9280 2166
維吉諾餐廳（Virginal Restaurant）下午茶供應時間：上午 11:30 至下午 4:00
網址：www.theoldengland.com

台中清境遊（六）：風車滿園的小瑞士花園

＊遊玩青青草原，進入觀山牧區，再按指示向步道前往小瑞士花園。

＊在觀山牧區內有個七彩繽紛的大風車。

＊步道兩旁種滿樹木，行得好舒服。

＊較為吃力的是呢條487級棧道，唔想第二日小腿酸軟，都係慢慢行為上。

＊終於到達小瑞士花園。

＊七彩繽紛的風車，隨風轉動。

＊湖中有一座風車，在鮮花映襯下，景致格外優美。

＊小瑞士花園外面有貓行館，愛貓之人可以看看。

＊紙箱王郵局，幫你寄信俾知己良朋。

離開法國小鎮，繼續沿步道向下行，其中要直落 487 級棧道，行完都有少少腳仔軟。

由於小瑞士花園的水舞秀維修暫停，所以售票員問我地是否介意，而門票則減價至 60 台幣。一場來到，當然照舊入場，而且水舞秀不過係噴水 Show，看不看都沒有所謂啦～

坦白講，整個花園都好人工化，除左有一個不大不小的人工湖之外，四周放滿大大小小風車，起風時，數以百個唔同顏色的風車轉呀轉，煞是壯觀！不過，9月似乎唔係花開的季節，見唔到百花盛開的風景，步行往溫室，可惜又有維修工程進行，有點掃興。

遊完小瑞士花園，見到7-11便利店做緊中秋軟雪糕買一送一優惠，當然唔錯過。兩杯北海道哈密瓜軟雪糕，只係 45 台幣（折合12港幣），抵！

清境小瑞士花園
地址：台灣南投縣仁愛鄉定遠新村28號
門票：60 台幤（水舞秀暫停，門票減價）

台中清境遊（五）：品嘗台灣最高海拔鐵板餐

＊呢間餐廳號稱「台灣最高海拔1,780米的南法牛排簡餐」，當然要試試啦！

＊食物價錢好便宜，一個鐵板餐只係 150 台幣起，分分鐘平過香港的大家樂。

＊我的鐵板豬扒餐，大大塊，唔欺場，仲送意大利扁麵同雞蛋一隻。

＊加多 30 台幣的酥皮湯，雖然夠晒熱辣辣，但好多油，唔知會唔會係地溝油？！

＊格局似露天餐廳，只有風扇，無冷氣，好在坐落唔覺熱。

＊由青青草原沿步道往小瑞士花園，法國小鎮係必經之路。

＊食飽後，順便去氣味圖書館買手信。

遊完青青草原，跟著指示牌前往小瑞士，經過觀山牧區，沿著步路慢慢向下前行。

到達法國小鎮，差不多已近午飯時分，看到有間號稱「台灣最高海拔 1,780 米的南法牛排簡餐」──Shine 朝日生活餐廳，紫色的設計令人有點似去左法國南部的普羅旺斯，當然只係快餐版。餐飲的價錢不貴，鐵板套餐150台幣（約 40 港幣）起，已包括湯、麵／飯、飲品（自助式，甜麥茶），平過大家樂的鐵板餐，而且即叫即整，熱辣辣。我點的豬扒餐，大大塊，黑胡椒汁惹味十足，仲有一隻煎蛋，配埋意大利扁麵，好豐富。

我地部分人改粟米濃湯為酥皮湯，另加 30 台幣。湯底仍然係粟米湯，較稀，酥皮幾多油，希望唔係地溝油啦！

後尾發覺飲品放在中央位置，自助任取，飲左小杯，味道微甜，似麥茶。

我呢餐只係 48 港幣左右，實在好便宜。

吃完，我地過埋去隔籬的氣味圖書館，裡面有唔少商店，除左有香薰油外，仲有茶葉、鰻魚骨、章魚乾、護膚用品等發售。我就買左野薑花潤手霜（原價 250 台幣，買一送一）同埋章魚乾（原價 150 台幣，買三送一）做手信。

清境法國小鎮 Shine 朝日生活
電話：049-280-2121
地址：南投縣仁愛鄉大同村仁和路171號

台中清境遊（四）：天朗氣清遊青青草原

＊天公造美，能夠天朗氣清遊青青草原，真的好感恩呀！

＊入口處，大家記得在手背蓋印，以便可以無限次出入農場。

＊雖然當日無綿羊秀，但仍有好多羊咩咩在人群中穿梭，逗得大小朋友好開心。

＊一雙一對的小綿羊。

＊青青草原入口旁有攤販區，既有小食，也有手信，任君選擇。

＊烏卒卒的竹炭花生，你敢食嗎？

第二天，展開清境遊。民宿早上（上午 8 點半和 9 點）同黃昏（下午 5 點、6 點、7 點在小瑞士花園旁的星巴克咖啡店）有穿梭車接載住客往返青青草原同小瑞士，所以就算無包車服務都唔使驚。

早上 9 點，我地一行7人坐上民宿穿梭車，10 分鐘即到達海拔 1,800 公尺的青青草原。天公造美，天朗氣清，陽光普照，遊走在一片連綿不盡的青青草原，偶有綿羊經過，絕對係最佳拍照勝地。我地邊行邊影相，抖下坐下，行到近最高點便折返，回到攤販區，稍事休息。

提提大家，高原的太陽好猛烈，最好做足防曬措施，配埋太陽眼鏡和兩傘，否則曬足一日隨時變黑面神！

清境農場青青草原
地址：南投縣仁愛鄉大同村定遠巷25號
票價：平日全票160台幣（因參觀當日沒有綿羊秀，所以較便宜），假日全票200台幣
青青草原營業時間： 每日上午8:00至下午5:00
網址：www.cingjing.gov.tw/

台中清境遊（二）：清境峰情民宿溫馨又原始

＊原木設計的清境峰情民宿，充滞原始風味。

＊民宿前的小花園放有搖搖椅，方便住客日賞花草夜觀星，係知己談天的好地方。

＊民宿內有好多小動物，其中呢隻肥鴨斤兩十足。

＊嬌小可愛的約瑟爹利人見人愛！

＊肥貓吉吉日光浴下眠一眠！

＊我住的雙人房，樓底極高，三角屋頂配楓木板牆，

恍如置身卡通片《飄零燕》的海滴木屋中。

＊單邊露台，視野開揚，夜賞月亮，日賞雲海，正！

＊由露台左邊望出去，可以遠眺老英格蘭莊園。

＊清晨時分，遠處的雲海將散未散。

＊清境峰情民宿位置圖

我地坐香港快運的 11 點 30 分起飛航班，然後下午2點坐包車前往清境峰情民宿。下午三點半左右抵達民宿，接待的小姐熱情親切，五個朋友住五人房，我和老友則住二人房。

我地係101號房，有個單邊小露天，視野好開揚，左面可以遠眺著名的老英格蘭莊園民宿，右面則可遙望遠山雲海；全房楓木設計配樓底極高的尖頂，原始風味十足，仲有點似卡通片《飄零燕》裡面的小屋，感覺溫馨舒服。沐浴用品係依必朗的台灣品牌，質素普通。

提提，整間民宿沒有冷氣設備，不過清境天氣清涼，只開風扇也足夠。另外，山區地方，昆蟲小動物難免，帶埋防蚊用品最妥當。另外，房間的 WiFi 極唔穩定，時得時唔得，反而在飯堂就接收得好好多！

民宿有個小花園，有幾張搖搖椅，又有好多花花草草（入口處仲有個好大的百合花農圃），加埋養在欄內的肥鴨，又有貓貓狗狗經常出現穿梭，喜愛小動物的朋友應該好開心。

另外，民宿的工作人員非常親切友善，除接待小姐外，廚師、廚師大嬸都笑容可掬。最後一天的早上，我同朋友在小花園坐搖搖椅談天之際，廚師大嬸經過將洗好兩個熱情果請我地品嘗，實在窩心。

我地的二人房每晚住宿連兩食（早餐加晚餐），只係 2,198 台幣一晚，折合約 580 港幣；住左兩晚，包足四餐，都只係 1,200 港幣，真在幾超值。

清境峰情民宿
電話：049-2801123　
傳真：049-2801843 
地址：南投縣仁愛鄉大同村榮光巷46號
網站：http://taomt.cingjing.tw/

台中清境遊（一）：七人平遊豪食四天行程

＊清境的小瑞士花園。

＊清境的青青草原係行程亮點之一。

＊住左兩晚的清境峰情民宿。

難得搵到多個朋友結伴同行，又難得買到香港快運直航台中的平價機票（連稅只係 1,275元），於是能夠七人成行，度過愉快的四日三夜（9 月 9 至 9 月 12 日）台中清境遊。

今次由老友一手一腳安排行程，兼且預訂好酒店和包車服務，四日三夜行程大致如下：

第一日：乘坐香港快運＞下午抵達台中清泉崗機場＞坐包車到清境峰情民宿（車程 1.5 小時）＞在民宿享用晚飯（住宿：清境峰情民宿）

第二日：青青草原＞小瑞士花園＞老英格蘭莊園High Tea（住宿：清境峰情民宿）

第三日：坐包車離開民宿＞彩虹眷村＞心之芳庭＞新社莊園＞（住宿：台中火車站新驛旅店）

第四日：20號倉庫＞坐包車前往台中清泉崗機場（車程  45 分鐘）

至於包車服務，我地七人坐九人車，包左三段時間，費用相當便宜，九人車亦簇新舒適，值得推介：

1）第一天：台中清泉崗機場＞清境峰情民宿（車程 1.5 小時，收費 3,000 台幣）

2）第三天：清境峰情民宿＞彩虹眷村＞心之芳庭＞新社莊園＞台中新驛旅社（車程 8 小時，收費 5,500 台幣）

3）第四天：台中新驛旅社＞台中清泉崗機場（車程 45 分鐘，收費 1,200 台幣）

換句話說，我地全程合共9,700台幣，每人折合港幣平均只係約 366 港幣。

玩足四日，機票住宿膳食交通再加手信，我只係用左 3,400 港幣左右，真係抵到極！

台灣小客車租賃有限公司

網址：www.gotw-travel.com

電郵：info@gow-travel.com

電話：0977-141669（唐銘煌聯絡人）
*提提，逾時的話，以我地呢間九人車為例，每小時只係500台幣，抵過分兩架的士玩！