濟州釜山自由行（十）：濟州辣雞辣到呵呵叫

住在濟州W Hotel，最方便就係四周圍有唔少食肆可以選擇，其中一晚，我地就幫襯左酒店斜對面的一間家庭式的辣雞小店，食左一餐好味的晚餐。

家庭式經營的小店門面細細，門外居然顯示左中文

對照的菜式照片，當中仲有鹽燒雞翼添呀！

由於小店外有中文對照的燈箱餐牌顯示，所以就放膽入去幫襯！我地叫左招牌－－菜呵呵辣雞，再加紫菜飯和鍋巴。

先上蒸蛋（應該係叫辣雞奉送的吧？！）加白飯，我地立時掃清，蒸蛋真係純粹蒸蛋無加配料，但好滑溜！（後尾店主好似話我地應該等埋辣雞上枱，用來送飯，可惜已太遲了！）

 

紫菜飯本來的面貌。

我用玉手親自拿捏兼撈勻的紫菜飯，超好味！

跟住紫菜飯送上，飯上面鋪滿紫菜絲、蟹籽同埋黃色蘿蔔碎，附埋一隻透明膠手套，原來係要自己徒手撈勻白飯和配料，由我親手撈勻兼捏好的紫菜飯，我同朋友都讚好，仲好味過一般的紫菜包飯（2,000韓元，即只係14港元），超正！

呢度的辣雞同春川辣雞好唔同，而且辣好多好多！真係辣到呵呵叫！

跟住主角上枱──呵呵辣雞（20,000韓元），最初以為好似春川辣雞咁，原來係用錫紙奉上已炒好的辣雞柳，初食一啖唔覺得辣，愈食就愈辣，食多幾啖直頭食到呵呵聲咁伸住脷飲水，真係好辣！！不過好惹味兼香口，嗜辣人士一定好鍾意！

呢煲鍋巴，湯底無乜味道，唔叫無損失。

最後來的係鍋巴（4,000韓元），即係上湯飯焦，不過湯底無乜味道，完完全全係好清淡的飯焦，用來中和辣雞的辣度都有Ｄ幫助，齋食就真係覺得太淡口，早知叫兩個紫菜飯啦！

呢餐合共26,000韓元，唔算貴，難得係家庭式經營，全部即叫即整，好熱辣辣！另外，提提大家，我地曾經常第二日中午再食多一次，點知小店同蓮洞其他好多食肆一樣，午間時份唔開門營業，好可惜呢！

呵呵辣雞小店

前往方法：在濟州市蓮洞W Hotel的正門斜對面。

濟州釜山自由行（九）：Mango Six免費派《海陸濟州》

第一日的豐富早餐：火腿雞蛋軟身麵包圈、

方形芝士麵包粒、熱朱古力和凍咖啡。

咖啡店有各式各樣的甜品，賣相好吸引！

星期日的早上唔係太多顧客。

呢本《海陸濟州》在咖啡店內的一角擺放，

大家可以免費取閱，千祈咪錯過！

邊嘆咖啡之餘，大家不妨大家回味一下張東建和金荷娜

隔著咖啡店玻璃對望的經典一幕！

韓國咖啡店出名多，濟州島都唔例外，在我們酒店前面大街就有幾間，包括星巴克；而新羅免稅店的對面，居然俾我搵到Mango Six咖啡店！呢間咖啡店正是《紳士的品格》的拍攝場地之一（不過當然唔係濟州島呢間分店啦！），大家記唔記得張東建和金荷娜隔著咖啡店玻璃對望的經典一幕？又或幾位主角好鍾意飲的芒果飲品呢？取景地就係Mango Six咖啡店！估唔到在濟州都可以遇上！

我地叫左火腿雞蛋軟身麵包圈、方形芝士麵包粒、熱朱古力和凍咖啡我地叫左火腿雞蛋軟身麵包圈、方形芝士麵包粒、熱朱古力和凍咖啡，合共15,000 韓元（約110港元）。兩款食物都好好味，朋友的熱朱古力尤其賣相精緻，我試飲一啖都覺得唔錯，反而凍咖啡居然唔俾奶，飲得我好辛苦，我實在唔慣咁樣飲凍咖啡，下次都係叫熱朱古力穩陣Ｄ。

最值得一提的係店內的一角，放在免費取閱的海陸濟州旅遊書，呢本係濟州自助遊月刊，專為到訪濟州的中國遊客而設，裡面內容極清晰同詳盡，濟州島內熱門地區（七星路‧中央路地下商街、新濟州寶健路、中文旅遊區、西部旅遊區、東部旅遊區以及城市旅遊區六大區）統統有介紹，最正係附有區內的清晰地圖（中韓對照！），至於市外長途客運路線圖仲要係跨頁製作，我地簡直係如獲至寶！尤其搭的士出入時，打開呢本旅遊書顯示的地圖，司機大佬已經好清楚點樣去！憑著呢本旅遊書，我地去舊濟州市的東門市場、中央洞地下街同埋黑豬肉一條街，都非常方便，絕對值得推介俾大家！

所以，大家在濟州島嘆咖啡時，不妨留意下有無呢本免費索取的旅遊書啦！

Mango Six 咖啡店

地址：濟州市蓮洞253-1（新羅免稅店對面，即濟州市格蘭酒店十字路口附近）

電話：064-743-7266

營業時間：10:00-24:00

濟州釜山自由行（五）：黑豬肉一條街嘆黑毛豬烤肉

在短短一條小街上，有十多間烤黑毛豬肉店，

我地就揀左呢間（豬肉的香味 豚향기）來開餐！

店員推介我地食的二人套餐，除左唔同部位的豬肉外，

仲有香辣八爪魚、蒸蛋、大醬湯，同埋唔少泡菜！

好快就烤熟食，好惹味！



熱辣辣的大醬湯好好飲！

餐後奉送冷麵，朋友太飽無食，

我就食晒成大碗，不過又凍又酸，其實味道麻麻地！



餐廳有傳統盤膝而坐的部分，我地當然揀坐椅子啦，唔使屈住坐，食得舒服Ｄ。

濟州島的黑豬肉最聞名，我地當然要試試啦。由地下街坐的士唔跳錶（2,800韓元），就到達黑豬肉一條街，呢條係濟州市政府為推廣濟州名產──烤黑豬肉而專門設立的街道。街道兩旁全都係充滿碳烤肉香的黑豬考肉店，我地揀左blogger推薦的豬肉的香味 豚향기開餐。

呢間店有中文餐牌，店員推介我地食兩人套餐（32,000韓元，即460港元），已經包括各款豬肉、蒸蛋、大醬湯、辣味八爪魚同埋冷麵，價錢比在首爾便宜。

烤好的豬肉香濃惹味（雖然食唔出同普通豬肉有咩分別！），熱辣辣夾住新鮮菜葉和泡菜辣醬同吃， 一Ｄ都唔油膩，好味道！辣八爪魚烤好後，辣味入口後微微散發出來，真係幾辣。大醬湯滾熱辣上檯，橙色的湯底極濃，內有海鮮同豆腐，亦係帶微辣。蒸蛋清清地夠滑溜，中和油膩最好不過。臨尾，朋友太飽，所以只叫一碗冷麵，冰凍兼且酸味近醋的湯底，唔太啱我口胃，不過都一樣照食晒落肚！飽晒！

 豬肉的香味（韓文字：豚향기）

電話：(064) 724-0228

地址：觀德路 15街 30 號

營業時間：1500~0200

濟州釜山自由行（三）：Hotel W方便就腳又大間

呢間Hotel W唔同全球其他W Hotel，級數只係三星左右！外觀似motel多Ｄ！

大堂入口的小玄關，同樣似旅館多Ｄ！

呢間雙人床房包括一張單人床一張Queen Bed，空間極大！正！

浴室亦極大，沐浴露，洗頭水及護髮素大大支，慢慢用！

今次又係上網訂酒店，見網友大力推介呢間濟州Hotel W Jeju，就決定揀佢住三晚。事實上，呢間Hotel W Jeju唔同全球其他W Hotel，級數只係三星左右，不過，交通真係好方便，由機場坐的士只係十分鐘車程，去舊濟州市又係十零分鐘車程，而且一出酒店轉右就係寶健路步行街，不遠處的大街之上，就係新羅免稅店，蓮洞購物商圈亦在附近，購物開餐都無難度。

除左地點方便就腳之外，酒店房間亦超大間，放落一張Queen Bed床同一張單人床之外，仲有大把位走動，而且乾淨整潔，浴室設施（沐浴露、洗髮水、護髮素大大支任你用）一應俱全，房間wifi亦相當強勁，唯一缺點係唔包早餐，但以每晚房價只係600元來計，真係無得挑剔！

Hotel W Jeju

地址：273-36, Yeon-dong, Jeju-si（濟州市蓮洞內）

濟州釜山自由行（二）：六天行程安排

呢張就係trolley Bus的東部和西部線行程安排，一日遊七八九個景點，由朝九晚七玩足十個鐘，真係好抵！

寶健路步行街位於我地濟州W Hotel的旁邊，係我地晚晚搵食的重要街道！

由於可以免費停留，我地當然一次過玩兩個城市，先玩濟州後玩釜山，六天行程（9月1日至6日）安排如下：

第一天：經釜山轉機到濟州＞坐的士入新濟州市＞午後遊東門市場＞中央地下商街＞濟州牧官衙＞黑豬一條街（住宿：新濟州市Hotel W Jeju）

第二天：參加濟州Trolley Bus東部路線一日遊（住宿：新濟州市Hotel W Jeju）

第三天：參加濟州Trolley Bus西部路線一日遊（住宿：新濟州市Hotel W Jeju）

第四天：上午坐的士到濟州Loveland＞下午坐機返釜山＞南浦洞（札嗄其市場及BIFF）遊走＞晚飯：札嘎其市場鮑魚海鮮鍋（住宿：南浦洞鳳凰酒店）

 第五天：溫泉場站HomePlus＞釜山大學購物街＞明倫站樂天超市＞南浦洞遊走（住宿：南浦洞鳳凰酒店）

第六天：太宗臺＞南浦洞光復路樂天百貨＞晚上返港