首爾追楓記（四）：梨花洞壁畫村畫意處處見

＊左邊可以看到馬羅尼矣公園

＊見到呢個可愛壁畫唔好入巷，記得左邊轉上去。

＊一直向斜坡前進。

＊見到駱山公園入口，唔好進入，靠右邊步道前行！

＊呢條步道的右邊好多好可愛公仔雕塑，可惜西斜，影得唔係好靚。

＊入到壁畫村，處處見壁畫，呢幅金魚畫係經典之一，好多人爭住影！

＊跟著佢嘟嘴影番張啦！

＊呢條花花石階有Ｄ剝落，影出來唔太吸引。

＊呢幅天使之翼係另一幅經典作。

＊左看看右看看，居然又搵到多一張。

下午出動，坐兩個站到梨花洞壁畫村閒逛。梨花洞壁畫村有「街頭美術館」的別稱，因為村內有數以十幅藝術作品繪畫於街頭巷尾的牆壁上，令到藝術作品在各個角落和街頭融為一體。

從惠化站2號出口一直往駱山公園方向前行，左邊可以看到馬羅尼矣公園，繼續往前走，看到Slow Garden咖啡廳之後會經過一條小巷，在呢個小巷左轉進去，巷子右邊出現可愛壁畫。快到底之前，會在十字路口看到這個壁畫和釣魚雕像，記得在這十字路口左轉。然後向鈄坡前進，見到駱山公園入口，唔好進入，靠右方的步道行走，步道放左唔少有趣人形公仔雕塑。

入到村後，正是壁畫村的精華區所在，左看看，右看看，就會發現唔少令人讚嘆的壁畫，包括金魚石階、花花石階、天使之翼等，我地大約搵到十幾幅，於是忙住搶位影相擺甫士，幸好係平日的下午時分，遊人唔算好多，唔使等太耐，已經影到好多有趣得意的相片。

影完相後，沿著原路下山，然後轉往惠化站的另一邊大學路閒逛，發現街上好多咖啡店、化妝品店，非常熱鬧。

梨花洞壁畫村

前往方法：地鐵4號線惠化站2號出口，向駱山公園步行10分鐘

首爾追楓記（一）：五天觀賞紅葉行程安排

＊今次首爾五天遊，最大目標係追楓！

＊東大門設計廣場（DDP）係今次新景點之一。

＊適逢東大門設計廣場（DDP）舉行LED玫瑰燈展覽。

＊昌慶宮的紅葉好靚！

＊石村湖追到黃色巨鴨！

＊奧林匹克公園內的紅葉也很美，值得花半天時間漫步閒逛。

＊剛好遇上在清溪川舉行首爾燈節。

11月4日，又出發去韓國啦！

今次係兩年內第四次韓國遊，目標係追楓，希望唔重複上兩次首爾行程，盡量在市內尋找一些觀賞楓葉的最佳景點，當然唔少得搵美食同掃特價護膚品啦！由於目標明確清晰，所以安排每日都有一個戶外郊遊地點，希望捕捉楓葉同銀杏的最美景致！

另外，難得撞正黃色巨鴨駕臨首爾，又遇上第6屆首爾燈節亮燈，所以今次八九成行程都係全新體驗，加上天公造美，天氣清涼但唔凍（4至19度），過左一個絕對盡興又開心的首爾五天遊！

首爾追楓行五天行程安排（2014年 11月 4 日至 8 日）

第一天：乘搭大韓客機清晨五點到達 ＞ 東大門 Sparex 汗蒸幕 ＞ 午餐：東大門挪夫部隊鍋 ＞ 梨花洞壁畫村＞晚飯：東大門Two Two炸雞店 ＞ 東大門設計廣場賞兩萬LED玫瑰燈海（住宿：東大門華美達酒店）

第二天：一山湖水公園賞紅葉 ＞ 午餐：八色五花烤肉店 ＞ MBC電視台大樓Dream Centre ＞ 高陽新韓流宣傳館 ＞ Home Plus（全部在同一個車站：鼎鉢山站）（住宿：東大門華美達酒店）

第三天：愛來魔相4D藝術館（仁寺洞本館） ＞ 午餐：三清洞人氣年糕鍋店 ＞ 三清洞路逛閒 ＞下午茶：三清洞 Bean Bins Coffee 窩夫 ＞ 昌德宮及昌慶宮賞楓 ＞ 晚飯：惠化洞人氣烤肉店（住宿：東大門華美達酒店）

第四天：奧林匹克公園 ＞ 石村湖追黃色巨鴨（蠶室）＞ 樂天世界大廈店樂天超市（蠶室）＞ 清溪川夜賞首爾燈節（住宿：東大門華美達酒店）

第五天：逛中部市場 ＞ 東大門最後血拚＞ 離境兼退稅