首爾追楓記（十五）：惠化洞人氣烤肉店做晚餐

＊惠化洞人氣烤肉店就在 Innifree 的斜對面。

＊醃好的豬扒放在烤爐上慢慢烤。

＊烤熟後的豬扒好入味。

＊韓國人必飲的大醬湯好濃味。

＊五花肉烤前，好似好肥咁。

＊五花豬烤熟後，夾埋菜同食，完全唔覺肥。

＊我地下午五點幾食晚飯，所以又係差不多包場。

由昌慶宮的側門離開，向惠化站方向前進，見旅遊書推介惠化洞大學路有間人氣烤肉店，於是決定又食烤肉做晚餐。

呢間烤肉店有好多間分店，好多網友盛讚，旅遊書推介豬肋骨和牛肋骨，我唔食牛，所以揀左豬扒同豬五花各一份，再加大醬湯同啤酒一支。

呢間烤肉店的最特別之處，係店員不斷幫我地換鐵板，烤唔夠十零分鐘，又換一次，換時又將Ｄ肉搬去新鐵板上，實在好認真！醃過後的烤肉味道好香濃，大醬湯亦係一貫濃味，好在有啤酒中和一下，整體食物水準都好唔錯！今餐盛惠 30,000 韓圜，折合約港幣 210 元，又係好便宜！

惠化洞人氣烤肉店
地址：鍾路區明倫4街173-1

前往方法：地鐵4號線惠化站4號出口，往 Etude House方向直走，見到 Innifree 後，在十字路口左轉，再步行40米即達（在你的左邊）

首爾追楓記（十二）：品嘗三清洞人氣年糕鍋

＊十二點半前到達，門外已排左十幾人。

＊門口貼滿受訪媒體的訪問，仲有韓國SBS年糕達人的認證，果然人氣極盛。

＊店內座位坐滿人，相當迫狹！

＊由於預先落左單，坐落無耐，店員即時送上年糕鍋，好快滾好有得食～

＊食完年糕鍋，店員會拎番個鍋入廚房，加入白飯、粟米、紫菜

撈埋年糕鍋湯底來炒飯，所以炒飯極香濃好味。

＊在 Olive Young 轉右，直走，見到 Family Mart 後右轉入小巷即達

（紅色招牌就係啦！）。

玩完立體畫，出番仁寺洞大街，即時截的士去三清洞的人氣年糕鍋店，一陣就到，只係 3,600韓圜（約港幣 26 元），慳番唔少腳骨力（若步行的話，應該要 20 分鐘以上）。

呢間年糕鍋店係韓國非常有名，很多韓國博客都強烈推薦，我地十二點半前到達，門外排左長長人龍，幸好翻枱快，十幾分鐘即可以入座。提提大家，排隊時，記得去門口拎定點餐紙點好想食的年糕鍋（年糕鍋有海鮮、火腿腸仔、烤肉牛肉、芝士、野菜等唔同口味），麵類可選泡麵、拉麵、粉絲或烏冬，我地揀的係火腿腸仔配拉麵，店員會時不時出來收集點餐紙。

當你入座後，年糕鍋便會即時送上，大家可以立時享用到美味熱辣的年糕鍋，最後唔好錯過俾多 2,000 韓圜點埋炒飯，炒飯其實用我地年糕鍋剩餘的湯汁加入紫菜，粟米粒和白飯炒拌而成，所以十分惹味。不過，由於人多環境狹窄，既要食得快，也要食得小心，結果唔使 30 分鐘，我地已經擦完火鍋兼炒飯！

單只係 12,000 韓圜，即折合港幣86元，兩個人每人唔使 50 蚊搞掂，抵到極！

三清洞人氣年糕鍋店（먹쉬돈나）

地址：鍾路區安國洞17-18

營業時間：11:00-21:00

前往方法：地鐵站 3 號線安國站1號出口往反方向直走，在 Olive Young 轉右，直走，見到Family Mart後右轉入小巷即達。

首爾追楓記（十一）：愛來魔相藝術館玩轉4D立體畫

＊兩個人一齊扮頭大身細的ET外星人！

＊俾瑪麗蓮夢露咬住的滋味會係點呢？！

＊一個唔小心，隨時跌落去，命仔都無埋！

＊大花臉。

＊小朋友玩倒掛雪糕杯！

＊隔住玻璃直望落去，都驚驚地！

＊非禮勿視！我唔係偷窺狂，所以我無揭起呢位韓國女子的裙襬偷睇呀！

＊認住呢個正門入口，落下面就係藝術館所在啦！

舊年在濟州跟本地團玩過立體畫，同老友回味至今，因此今次大家將愛來魔相 4D 藝術館納入必遊景點之一！第三天早上，見天色灰暗，正好進行室內活動，於是坐地鐵到仁寺洞本館玩轉立體畫。

2014 年 3 月 6 日開館的仁寺洞本館位於地下1、2層，總規模超過 3,000 平方米，係目前韓國最大的 4D 體驗美術館。場館由一館（世界奇幻穿梭盒）、二館、黑色任務（Mission in black）及甜豆所咖啡廳組成，從梵高、畢卡索的名畫，到瑪麗蓮夢露的誘惑之吻、奧巴馬等，自己就最喜歡幽默惡搞的場景，可以扮鬼扮馬亂玩一通。不過，剛巧遇著有幼稚園小朋友參觀，搞到要左閃右避，免得俾呢班小鬼頭入鏡。結果，我地都玩足兩個小時，影左近八成場景，夠晒盡興。

愛來魔相 4D 藝術館仁寺洞本館

地址：首爾特別市鐘路區仁寺洞 43 號大日大廈B1~2F 

前往方法：地鐵 5 號線鐘路3街站5號出口，步行5分鐘；地鐵1號線鐘路3街站1號出口，步行6分鐘）

營業時間：09:00~22:30

網址：www.alivemuseum.com

入場費：12,000 韓圜，列印韓巢優惠券慳 3,000 韓圜，即只係 港幣66 元便可以任玩。

韓巢優惠券（有效期至 2015 年 3 月 18 日）：http://cn.konest.com/contents/spot_map.html?id=6811