布拉格自由行（二）：Grandior Hotel Prague位置超方便

＊雙床房空間不大，每張床僅3呎，以5星級酒店來講偏細。

＊右面的L'Occitane洗頭水和護髮素是酒店送給客人的小禮物。不過，牙刷和牙膏欠奉。

＊從未見過浴屏只有右面短短的兩三呎闊，左面無遮無掩，

每次沖涼後，全地濕晒，滑倒就慘了。

＊酒店大堂。

＊酒店的自助早餐種類好多。

＊每朝有鋼琴伴奏，呢個伯伯當日居然彈出《月亮代表我的心》。

＊在酒店餐廳享用第一日的晚餐，非常豐富，送麵包又送有汽白酒。

＊晚餐的沙律和椰菜湯。

＊烤雞扒。

＊脆脆的炸豬扒。

＊酒店大門外，便是電車站，非常方便。

我地連續12晚入住的Grandior Hotel Prague，位於B和C線交匯的大站──Florenc地鐵站旁，酒店的後門不遠處是地鐵站，再步行多幾分鐘就係Student Agency巴士總站，在呢個總站坐車去機場或溫泉小鎮Karlovy Vary（卡羅維瓦利）最方便。酒店正門前的電車站（站名：Bila Labut），有三條電車和兩架巴士行走。若要步行前往舊城廣場，只需十幾分鐘即可以到達火藥塔，仲會途經百年咖啡店Café Imperial同Palladium購物商場和Albert超市。無論購物或觀光都好方便。

房間方面，以5星級酒店來講，雙床房的空間不大，每張床僅3呎闊，反而浴室極大。沐浴用品方面，只有沖涼,洗手液，潤膚露任用，另有L'Occitane洗頭水和護髮素各一小樽當禮物送俾房客，但就沒有牙膏和牙刷供應。浴室最大的問題係只有兩呎闊的浴屏阻擋沖涼的水濺出浴缸之外，結果當然係每次沖涼都會搞到整個浴室濕漉漉，場面不堪設想。

另外，可能連續住12晚的關係，好明顯發現打掃人員有偷懶的情況出現，例如有時忘記添加茶包、L'Occitane洗髮套裝、沐浴液、盒裝紙巾，最離譜係試過浴缸去水位內的毛髮並未有清理。沐浴液或盒裝紙巾就算再大支或滿滿一盒，連續多日使用，打掃人員也應該打掃時，順便檢視裡面是否足夠房客一晚之內使用。於是，翌日出門前，我便經常要留書給打掃人員，提他們要添加甚麼甚麼的，都幾煩人。

自助早餐方面，食物種類非常多，專人煎蛋和奄列外，仲有穀麥類，蔬果沙律、煙肉、腸仔、炒蛋、烚蛋、芝士焗番茄、焗薯、蛋糕、麵包、乳酪等，三部咖啡機和各類茶包和果汁，門口入口仲有兩種特色飲品供應。最難得係每朝8點後都有專人現場演奏鋼琴，有朝早居然聽到《月亮代表我的心》添，實在驚喜。

除早餐外，我地仲幫襯過酒店的餐廳兩次，都係吃晚餐。第一晚每人叫左主菜各一（炸豬扒和雞扒），再加一份沙律和例湯，便送左Sparkling Wine各一杯，又送左紅莓雪葩，麵包又唔收錢，最後埋單仲送朱古力。如此豐富的一餐，折實（ExpediaVIP會員有9折優惠），只係850克朗，折合約260港元，每人130元，實在太便宜。侍應再送85折優惠俾我地，於是又再食多一餐，埋單只係500幾克朗，好抵。

Grandior Hotel Prague

網址：www.grandiorhotelprague.com/‎

地址：Na Poříčí 1052/42, 110 00 Florenc

電話：+420 226 295 111