墨爾本自由行（十）：蒸汽火車+企鵝島一日遊

＊同超級大隻白色鸚鵡影相

＊超級大隻白色鸚鵡靚就靚，但太大隻，有點嚇人，遠觀好Ｄ！

＊Johnny見得樹林中有紅葉和黃葉，特登停車俾我地影影墨爾本的秋色。

＊在丹頓農山上小鎮Sassafras有唔少精緻特色小店。

＊Sassafras上的一間燈飾小店。

＊Pie in the Sky的批非常好食，Johnny果然好介紹。

＊Puffing Billy蒸氣火車來了，入站了！

＊圖中左下角就係Johnny，舉機同我地拍短片！

＊Candy傳來的短片，為呢個行程留下美好回憶！

＊紀念火車票。

＊Warrook Farm內的小動物

＊Warrook Farm內呢隻羊咩咩Ｄ毛長到對眼都睇唔到，好搞笑！

＊朱古力廠內好多有趣互動遊戲。

＊在菲力浦島觀日落。

＊墨爾本的日落好靚！

＊企鵝館內的展品，看完就出去等企鵝回巢，不過出面唔俾拍照，以免嚇親小企鵝。

第五天，又係跟Candy Tour的本地團，今次係蒸汽火車（Puffing Billy）+企鵝島（Phillip Island）一日遊。呢個團行程好豐富，幸好景點距離唔算好遠，所以Johnny約我地上午9點在酒店門外集合。

第一個景點係墨爾本出名的丹頓農山，又被稱為鸚鵡山，除左有大樹外，仲有野生的白色大鸚鵡任你餵，因為前兩日的一團已餵過鸚鵡，加上呢種白色鸚鵡太大隻有點嚇人，所以只遠觀拍拍照就算，唔敢太接近！

然後再去山中小鎮Sassafras閒遊，小鎮沿街有唔少精品店和茶室，可以慢慢逛逛甚至坐低喝本茶，不過聽Johnny推薦，寧願等下一站去Pie in the Sky，品嘗美味的批做外賣午餐，果然好介紹，我買左一個蘑菇忌廉雞批加一個印式烤雞批，超級熱辣辣，又極大個，咬落好燙口，但好好食，餡料新鮮又豐富，兩種雞批各有唔同，蘑菇忌廉雞批creamy，而印式烤雞批則帶微辣，甚啱口胃，正！每個10.5澳元，雖然貴貴地，但絕對值得品嘗！

在車上食批當午飯後，終於輪到坐Puffing Billy蒸氣火車，Johnny安排我地坐由Menzies Creek至Belgrave一站。呢架澳洲最古老的蒸氣火車最特別之處，係乘客可以坐在車廂邊，將手同腳伸出車外，沿途在森林之間穿梭，睇住火車過木橋來個轉彎，非常有趣，短短半小時的車程，真係好舒服又過癮。坐完後，仲會送番張紀念車票俾大家做紀念。

跟住再去Warrook Farm餵小動物，包括羊咩咩、馬、袋鼠、草泥馬、袋熊、天笠鼠等。之後再參觀朱古力廠（Panny's Amazing World of Chocolate），品嘗朱古力之餘，仲有好多互動遊戲可以玩玩，不過朱古力產品就偏貴，亦都唔多吸引。

最後就係呢日的另一重頭戲──菲力浦島自然公園欣賞企鵝回巢的有趣場面。趁日落時分，Johnny帶我地到島的盡頭欣賞落日美景，慢慢繞行一圈，睇住太陽緩緩落下，景致一流。

大約五點半左右，我地走出企鵝館後，原先在海灘邊排排坐等企鵝，但坐坐下覺得唔對路，天色咁黑又咁遠，點都睇唔到企鵝啦！於是走回行人木棧道上，跟其他人企埋一邊靜心等候，終於神仙小企鵝聯群結隊回來啦，十幾廿隻搖頭擺腦慢慢行過來，好得意！可惜，由於之前太多人用閃燈影企鵝，嚇親小企鵝以致迷路變成孤兒，所以公園內不准人拍照（無論使用閃燈與否）！不過，能夠在短短大半小時睇到上百隻小企鵝回巢的有趣場面，實在好興奮！

回程到墨爾本市已經9點，Johnny推介我地到市內著名希臘餐廳Stalactites Restaurant買Chicken Souvlaki（雞卷）外賣返酒店當晚飯。雞卷超級大條，味道濃，而且非常多雞肉，我估足足有一隻春雞咁多，其實一個人根本食唔晒，我最後食左大半都要放棄，實在有點可惜。

Stalactites Restaurant

地址：177-183 Lonsdale St, Melbourne VIC 3000

電話：+61 3 9663 3316

Candy Tour

網址：http://melbournecandy.com/

蒸汽火車（Puffing Billy）+企鵝島（Phillip Island）一日遊：http://melbournecandy.com/puffing-billy-phillip-penguins/

蒸汽火車（Puffing Billy）+企鵝島（Phillip Island）一日遊收費：180澳元（網上須預繳60澳元訂金）（不包膳食）