深圳宿一宵（一）：再吃金皇廷精緻點心

粟米墨魚餅

蜜汁叉燒腸

皇廷雪山包

蜜汁叉燒腸

魚湯鮮竹卷

酥皮杯燉奶

戳穿酥皮後，燉奶極熱辣兼滑溜！

朋友放假，相約到深圳宿一宵。今次又係透過Agoda預訂酒店，睇中的係位於會展中心站上蓋的深圳金中環酒店公寓。

由於酒店位於會展中心站的上蓋，我地先在酒店樓下的金皇廷食午餐，然後就可以施施然去check in。呢間日金皇廷酒家，以前去過一次，最深印象係室內設計活像羅浮宮一樣，無論牆上或天花都掛滿法國油畫，極盡氣派之能事（當然難免予人浮誇的感覺！），不過，點心的水準一點都唔差，精緻又好味。

＊鮮蝦豆角餃：香港未食過加入豆角的蝦餃，估唔到十分好味，皮薄而晶瑩外，餡有蝦和豆角混和蒜蓉調製，好惹味。

＊粟米墨魚餅：墨魚餅的肉質煙韌，而且粟米粒極多，減去油膩感覺，不錯。

＊皇廷雪山包：朋友在利苑食過雪山包，於是想試試呢間酒家的出品。不過，我覺得呢個包味道普通，似墨西哥包，不熱，透明白色的包餡唔太甜，但無特色，不吃無損失。

＊蜜汁叉燒腸：腸粉好薄，叉燒粒亦多，而且有五條咁多，好抵食。

＊魚湯鮮竹卷：用魚湯浸住上的鮮竹卷，超熱辣，咬落卷內極多蘿蔔絲金菇絲等雜菜絲，比香港的有水準！

＊酥皮杯燉奶：最值得推介的甜品，面頭用酥皮蓋住的小杯燉奶，戳穿酥皮後，燉奶極熱辣兼滑溜，相信女士必定超鍾意。

埋單計，由於酒家逢周六，周日及公眾假期有八折，今餐折實只係126元人民幣，實在好超值！

金皇廷酒家
地址：深圳市福田區金田路 3037 號金中環商務大廈 5 樓（在會展中心站 E 出口直達）
*逢星期六日及公眾假期有 8 折優惠