深圳打卡必去：《平行世界》藝術展過癮好玩又好影

*樂光：中間的燈柱把字投射在四周的牆壁上，

當觸碰牆上的歌詞時就會播放唔同的歌聲。

*霧都：每隔90秒便會噴出漫天霧氣泡沫，意境淒美浪漫。

*氣味魔盒：將個頭伸入頂部的盒子內，可以感受美妙的氣味與整體視聽感受的碰撞。

*粉紅色的萌監獄內，大家記得挨埋牆影番張過癮的嫌疑犯照片。

*萌監獄內全部道具都係粉紅色，坐監都要扮紅粉佳人。

*女士們見到呢道粉色羽毛牆，必定大影特影。

*色界：只要站在原地，顏色識別感應就能測試出平行世界屬於你的顏色，

度身打造適合你的配搭。

*出口外的雨傘牆，不同顏色的燈光打在雨傘上營造出浪漫效果，

又係拍照的好地方。

*平日入場費80元，二人特價140元。

鍾意玩又鍾意影相的朋友來講，至少玩足一小時，呢個價錢唔算貴。

老友報料，話深圳萬象天地舉行《平行世界de非分之想》藝術展，既互動好玩，又可以影古靈精怪的造型照片，於是決定在萬象天地落腳，先到唐宮嘆茶，然後入場體驗下平行世界有幾過癮，玩完再去奈雪之茶嘆下午茶。

《平行世界de非分之想》藝術展，超過1,000平米的互動體驗空間，由10個大型互動分展館串聯而成，包括氣味魔盒、暗夜棲息地、霧都、幻妝、樂光、萌監獄、色界、異空等，在唔同場館裡面，大家可以隨意觸碰牆壁、擺件、服裝等，就會有意想不到的互動效果，帶來視覺和嗅覺的有趣體驗，部分光影交融的效果跟舊年舉行的《TeamLab舞動藝術展&未來遊樂園》有些類似，同樣令人驚喜。

難得星期五下午，入場費便宜（二人價人民幣：140元），參觀人數唔多，我地玩左一個多小時，又玩又影，擺足唔同甫士，我覺得最有趣的係霧都和萌監獄，前者每隔90秒便會噴出霧光泡沫，人在其中，既可以觸碰一觸即破的泡泡，又可以影張霧氣飄飄的浪漫靚相；後者就可以一嘗做紅粉佳人坐牢的滋味，粉紅色監獄裡面全部道具（槍、手扣、嫌疑犯照片牆、馬桶、浴缸、傻豹等），單是呢兩個場館都玩左半小時有多。

《平行世界de非分之想》藝術展

展覽時間：2018年9月23-11月27日每週一至週末開放時間

開放時間：10:00 - 22:00

地點：深圳萬象天地W5藝術空間（地鐵新高園站A出口，步行約5分鐘即到萬象天地）

票價：工作日票：單人/80元；雙人/140元

通票：單人/100元 雙人/180元

深圳網紅熱店：奈雪の茶嘆霸氣果茶加軟歐包

＊我地的下午茶：霸氣楊梅再加一個抹茶芝士紅豆。

＊下午茶時段座無虛席。

＊大大個的軟歐包，一定要試。

＊蛋糕的式又可愛。

＊奈雪の茶是網紅熱店，在全國有幾十間分店。

＊萬象天地的戶外大象藝術裝置「抱抱象Bubblecoat Elephant」。

在桃園站的逸塔．花園餐廳嘆過東南亞美食，坐地鐵兩個站到高新園站的萬象天地（Mixc World）。呢個2017年9月開幕的新商場，共有23萬平米，打造「街區＋mall」的概念，近300家商店，逾千家品牌，商場最大的標誌就係AllRightsReserved聯同霍夫曼創作的戶外大象藝術裝置「抱抱象Bubblecoat Elephant」。

我在4月來過，只在商場內的唐宮嘆午飯，後尾經過奈雪の茶已被店內的麵包和飲品吸引，所以今次決定要幫襯一下，嘆個「一杯好茶 ，一口軟歐包」的美味下午茶。估唔到星期五的下午茶時段，店內店外都坐滿客人，排隊亦見人龍，果然係網紅熱店。店舖右邊有麵包櫃，裡面有餅房，定時新鮮出爐各式麵包。店舖採取自助形式，自己搵位，揀完麵包，再排隊一併買飲品，然後俾錢。

店舖的口號是「一杯好茶 ，一口軟歐包」，我地揀左時令限定的霸氣楊梅（30元人民幣），再加一個抹茶芝士紅豆（15元人民幣）。楊梅為5月應節水果，加入上等的茉莉毛尖茶底、果醬、冰塊一起攪製而成，霸氣楊梅酸中帶甜，非常濃郁多料，絕對真材實料，非常解渴。抹茶芝士紅豆超級軟熟又大個，餡料的芝士紅豆甜中帶微鹹，好好味。飲品和麵包質素都咁好，難怪客似雲來啦。

奈雪の茶（萬象天地分店）

地址：深南大道9668號萬象天地NL115（高新園站A出口，直行3分鐘直達）

電話：0755-86525129

深圳網紅熱店：逸塔．花園餐廳嘆東南亞美食

＊餐廳入口已見繽紛花束。

＊花園部分的座位，完全被大大小小盆栽包圍。

＊我地就揀左坐靠窗的卡位，非常闊落。

＊據講好多人鍾意坐鳥籠座位坐，

我坐過就覺得唔多舒服，盪來盪去唔多定，而且太陽光直曬唔多盞。

＊書店內有各類圖書，內有不少座位任坐。

＊泰式小食拼盤配左三種唔同醬汁。水果茶的水果唔少，味道偏淡，不太甜。

＊泰式炒金邊粉，有大小蝦和魷魚等海鮮，味道偏辣。

前幾日，同老友北上尋歡，在深圳來個一日遊。今次為補祝老友生日，特登揀左兩間網紅熱店湊熱鬧。

第一間就係位於桃園站的逸塔．花園餐廳（ETA Garden Restaurant）。餐廳集音樂、花舍、餐廳和書店於一店，環境非常寬敞，空間感十足，座位又大又舒適，樓底尤其花園部分，大大小小的盆栽擺放在各個角落，非常雅致，絕對係呃LIKE的必去熱店。

餐廳主要售賣東南亞美食，再加各式水果茶。我地揀左一個泰式小食拼盤，一個泰式炒金邊粉，兩杯水果茶，盛惠176元人民幣。味道方面，泰式小食拼盤熱辣即整，有炸蝦餅、雞翼、春卷和雞肉串燒，炸蝦餅最好味，春卷和雞翼亦唔差，最差係雞肉串，雖然好大串但肉質偏鞋，若換做魚餅就完美。泰式炒金邊粉有大小蝦和魷魚等海鮮，味道偏辣。水果茶較淡，比我地飲過的Lady 7 café或Hello Kitty café略為遜色。

醫完肚兼埋完單後，我地就在餐廳每個角落慢慢影相，最鍾意就係花園和書店兩個部分，星期五午飯時間人唔算多，可以大影特影過足癮。

整體來講，餐廳環境好舒服，布置的確好花心思，食物的質素就普普通通。

逸塔．花園餐廳 ETA Garden Restaurant（南山店）

地址：金雞路田廈翡翠明珠七巧國2樓（KFC旁）（桃園站B出口直行，見金雞路轉左，約10分鐘）

營業時間：9:00-22:30

電話：0755-33151836

歡樂海岸半天遊（三）：Hello Kitty Secret Path嘆下午茶

＊繽紛水果茶

＊秘製雞翼

＊黑白戀人

＊Hello Kitty Secret Path的下午茶時段唔多人，大把位任你坐。

＊餐廳當然唔少得吉蒂的影子

＊穿過呢條綠色小徑就係餐廳的入口

＊整幢都係Hello Kitty Secret Path主題餐廳

睇完TeamLab舞動藝術展&未來遊樂園，又係下午茶時間，我地揀左歡樂海岸的Hello Kitty Secret Path餐廳慢慢坐。呢間主題餐廳又係一整幢，在創展中心附近的石橋下方，經過綠色小徑轉入去，就是餐廳的入口。用餐區設在二樓，下午茶時間，客人唔多，座位任坐。我地點左兩份下午茶套餐，一份揀秘製雞翼，一份揀甜品──黑白戀人，飲品就揀繽紛水果茶。秘製雞翼雖然唔夠熱，但幾入味，點埋泰式酸辣醬，好惹味；黑白戀人中的白朱古力慕絲唔太甜，幾滑，圓形塊狀的朱古力蛋糕輕盈而不太甜，不錯。繽紛水果茶同Lady 7 Café的水果茶一樣大，又係充斥著各式各樣的新鮮水果，好好飲。埋單合計128元，價錢同樣算合理。

Hello Kitty Secret Path

地址：歡樂海岸曲水灣12棟

電話：0755-86578042
前往方法：深圳灣公園站E出口可直達歡樂海岸

歡樂海岸半天遊（二）：TeamLab舞動藝術展光影互動效果嘆為觀止

＊TeamLab舞動藝術展的光影效果令人嘆為觀止。

＊Forest of Resonating Lamps - One Stroke（呼應燈森林——一筆）：人站在燈盞附近時，燈盞會明亮地照耀著，釋放出能夠形成共振的色彩。

＊Crystal Universe（水晶宇宙）內累積光點所創造的特別效果。

＊在Crystal Universe（水晶宇宙）拍出來的剪影都好有趣。

＊Animals of Flowers, Symbiotic（與花共生的動物們）：身上長滿花朵的動物在長長的通道中來回走動。當人們碰觸動物時，花朵會凋謝散落。

＊Hopscotch for Geniuses（天才跳房子）：當雙腳跳落在○△□ 形狀的符號上時，就會發出聲音，並出現不同的顏色。

＊在白紙上幫車子填色後，工作人員會將你的作品投影在牆上，車子變成立體後，仲會走來走去，非常有趣。

＊Universe of Water Particles（水粒子的世界）：根據超主觀空間理念在虛擬3D空間中打造的虛擬瀑布。

＊呢隻巨蛋就係深圳歡樂海岸創展中心。

在Lady 7 Cafe吃過午飯後，就走到銀色巨蛋旁的售票處購票入場。平日票價為199元人民幣，不收現金，大家記得帶信用卡，尤其銀聯卡可免收附加費。

TeamLab舞動藝術展&未來遊樂園有多個不同展區，包括：Forest of Resonating Lamps - One Stroke（呼應燈森林——一筆）、Universe of Water Particles（水粒子的世界）、Crystal Universe（水晶宇宙）、Animals of Flowers, Symbiotic（與花共生的動物們）、Gold Waves（金浪）、Crows are Chased and the Chasing Crows are Destined to be Chased as well, Transcending Space（被追逐的八咫鳥、追逐同時亦被追逐的八咫鳥、超越空間）等，當中仲有一些互動遊戲和工作坊等，參觀者除左拍照之外，仲可以用手觸碰甚至繪畫自己的作品，有趣又有意義。

我最鍾意係第一個的Forest of Resonating Lamps - One Stroke（呼應燈森林——一筆）同埋最後的Crystal Universe（水晶宇宙），前者在一個不大的空間內出現無數盞吊燈，燈光不停幻變出唔同顏色，非常震撼；而在Crystal Universe（水晶宇宙）的光點由數碼控制，會根據觀賞者與作品的互動而變化，參觀者在3D燈光空間中走動，造成千變萬化的剪影，效果好特別。

要玩勻各區，尤其係鍾意拍照和玩互動朋友，大約至少花1個半小時，我地就玩左兩小時，感覺都好像走馬看花咁，要細心玩味和感受展覽的真義，絕對值得再花長一些時間。

TeamLab舞動藝術展&未來遊樂園

時間：10:00-22:00

展覽會場：深圳歡樂海岸創展中心（中國深圳市南山區白石路8號歡樂海岸）

價錢：成人（平日）199元；成人（周末，假期）229元

網址：https://www.teamlab.art/cn/e/shenzhen/

展期：即日至2017年11月30日

前往方法：深圳灣公園站E出口，向著歡樂海岸裡面走，見銀色巨蛋就係展覽會場

歡樂海岸半天遊（一）：Lady 7 Café嘆優雅午餐

＊我同老友都好鍾意飲的水果茶，大大杯又多水果，超級正，

不過價錢唔便宜，要39元人民幣。

＊明太子大蝦意粉。

＊厚切焗豬排飯，即叫即焗，夠惹味，但豬排較鞋口。

＊餐廳設戶外用餐區。

＊餐廳以白色做主調，走典雅路線。

＊整幢餐廳設兩層，空間闊落。

前兩日，又約老友北上遊玩。今次的目標係參觀TeamLab舞動藝術展&未來遊樂園，而展場位於歡樂海岸內的創展中心，所以半日行程都集中在歡樂海岸。

由車公廟站轉9號線到深圳灣公園站，從E出口出來就係歡樂海岸。我地揀左Lady 7 Café嘆優雅午餐。相比深圳大劇院站的分店，呢間Lady 7 Café就大得多，整幢餐廳分兩層，地下一層仲有戶外和戶內用餐區兩部分，裝修色調仍然係白色為主，部分牆身綴滿繽紛的花草，樓底又高，典雅舒適。

今次點左明太子鮮蝦意粉和厚切焗豬排飯，再加兩杯冰凍水果茶。明太子鮮蝦意粉雖然只有一隻大蝦，但味道鮮而肉韌，而意粉亦韌度適中配以明太子醬汁，惹味而不膩。等待需時的厚切焗豬排飯終於上來，溶化的芝士令到飯味更香濃，不過豬排太厚而且較鞋口，令到整體味道打左折扣。冰凍水果茶充滿各式水果，仍然無令我地失望。埋單合共205元人民幣，價錢合理。

Lady 7 Café

地址：歡樂海岸曲水灣7棟

前往方法：在深圳灣公園站E出口，進入歡樂海岸看位置圖即會找到餐廳。

深圳大劇院站Lady 7 Cafe嘆精緻下午茶

＊Lady 7 Cafe位於KK Mall二樓

＊餐廳入口放左個大大個厚多士。

＊必飲的招牌水果茶。

＊秘製照燒雞翼。

＊花生鬆餅份量唔簡單。

＊餐廳的裝修以白色為主調，樓底極高，雅致清新。

＊餐廳好適合閨蜜歡聚，甜品尤其令女士著迷。

逛完荷蘭花卉小鎮，改往大劇院站的Lady 7 Cafe。餐廳位於KK Mall的二樓，由地鐵站的通道可以直達商場，非常方便。

Lady 7 Cafe裝修好雅致清新，以白色為主調，座位闊落，樓底亦高，最適合一大班閨蜜聚會聊天、情侶拍拖約會「撐枱腳」享受二人世界！

食物方面，有飯類、小吃、甜品、飲料等，最吸引我地的當然係甜品同飲料啦。我地點左兩杯招牌水果茶，一客秘製照燒雞翼，一客花生鬆餅（即窩夫）。招牌水果茶果然材料充足，大大杯之餘，裡面仲有多達七八種水果肉，甜度適中。照燒雞翼共五隻，秘製醬汁帶微辣。花生鬆餅有四塊，附送花生醬、煉奶同忌廉，即烤出來的鬆餅暖笠笠又夠厚，極富質感，搽埋花生醬同忌廉，非常美味。

埋單合共155元人民幣，約港幣175元，完全跟香港的消費水平睇齊，但以環境和食物質素而言，就絕對合理，相信下次我地都會再幫襯。

Lady 7 Cafe (KK Mall 店)
地址：深南東路5016號KK Mall京基百納空間 L227/227a/228a號舗
電話：0755-2227987
營業時間：早上10點至晚上10點
前住方法：羅寶線大劇院站B出口直達