濟州釜山自由行（十六）：閒遊樂天百貨光復店

樂天百貨光復店11樓的展望台可以見到真假釜山塔，幾有趣！

遠眺龍頭山公園上的釜山塔。

天雨關係，展望台完全無遊人，我地可以任影唔嬲！

釜山海港景致。

聲光幻彩水舞Show（Aquatique Show）每日有四至五場，大家不妨留意時間。

噴射而下的水柱隨著音樂起舞，燈光亦變化多端！

樂天百貨地庫有food court，水準不錯！朋友吃的牛肉石鍋飯。

我的辣八爪魚石鍋飯，同樣惹味。

短遊太宗臺之後，坐車返回樂天百貨光復店，先在地庫的food court醫肚。food court的食肆好多，中西日韓以至快餐，通通有得揀，我地各自都揀左韓式石鍋飯，朋友吃的牛肉石鍋飯，我就吃辣八爪魚石鍋飯，價錢都只係7,000至7,500韓元（折合約50港元左右），奉上來的石鍋飯熱辣辣香噴噴，即時撈勻來食，微辣但勁惹味！

食完石頭鍋飯後，就登上11樓的頂樓花園和展望台。展望台居高臨下，與位於龍頭山公園上的釜山塔遙遙相對，另一面則可以欣賞釜山大橋和釜山港口。難得係展望台完全免費，有時間絕對值得來看看。

遊完展望台，原本想去免稅店買護膚品，點知呢間樂天百貨不設免稅店，幸好 5 樓有本土化妝品店（Tony Molly、The Face Shop、Skin Food等），朋友可以掃下貨。

跟住等到差不多 3 點，我地轉到地庫搵靚座慢慢坐，因為要欣賞聲光幻彩舞Show（Aquatique Show）。呢個Show類似音樂噴泉咁，噴射而下的水柱伴隨音樂起舞，甚至噴灑出英文字來（包括LOTTE、BUSAN、SALE等），背景燈光的顏色亦變化萬千，15分鐘左右時間，睇得都幾開心。

釜山樂天百貨光復店

營業時間：10:30~20:00

前往方法：地鐵南浦洞站有出口直接連結而至

＊聲光幻彩水舞Show平日有四場，假日則有五場，大家可以留意時間觀賞，在地庫霸定靚位坐定定慢慢欣賞了。

韓國樂天百貨中文官網：http://www.lotteshopping.com/chinese/lotte/about/index.jsp

濟州釜山自由行（十五）：微絲細雨漫遊太宗臺

太宗臺位於影島，是釜山市的保護文物，名列釜山十大勝景之一！

呢架可愛的觀光車，微雨就已經唔開，

好在我地都坐到一圈！否則一場來到就好掃興啦！

其中一站展望台，最多人落車。不過，佢地落左車之後，

就無可能再上車啦，因為觀光車行完一圈就停駛左！

無得再坐車，唯有姑且行入去第一個站（若原礫石灘）睇睇，當到此一遊啦！

若原礫石灘旁可遠眺無敵大海景，亦可以睇埋岸邊的懸
崖奇岩風景，不過天色昏暗，有點可惜了！

正門外的紀念碑。

最後一天以觀光為主，近近地遊影島的太宗臺。由樂天百貨光復店門外坐巴士（8、 30、66、 88號）終站下車，車程約20分鐘，就到達太宗臺。

太宗臺位於影島，是釜山市的保護文物，名列釜山十大勝景之一，島上長有松樹等200多種茂密的樹木。遊太宗臺最方便就係五顏六色的卡通觀光車，車票全日有效，園內設有好幾個觀光車停車點，大家可以在途中自由地上下車，大約每隔20分鐘就會發一趟車。

我地最初打算先坐一圈看看環境，然後在第二次乘坐時才落車睇某一兩個景點。

點知，再想搭車時，觀光車居然因天雨關係而停駛，仲要係無限時停駛，兼且售票處即時關閉！當時只不過係微微細雨都唔開車，有無搞錯！搭左一次又唔可以退票，要我地徒步遊園又太吃力，結果我地只漫步第一個景點──若原礫石灘，遠觀海岸同埋懸崖奇石等景致便算，實在有Ｄ可惜！不過都總好過部分在展望台落左車，觀光完發現要自己徒步出返大門咁慘！畢竟太宗臺環境唔細，要走返出來，我諗至少一個鐘（仲要極快步個隻添！）無走雞！

太宗臺（태종대）

地址：釜山廣域市影島區展望路24 (東三洞)

前往方法：南浦洞 (남포동) 地鐵站6號出口坐公車8、 30、66、 88號終站下車

太宗臺小火車（DANUBI觀光車）：1,500韓元

夏天（3月～10月）運行時間9:30～20:00（微雨暫停開動）

濟州釜山自由行（十四）：超市掃貨＋釜山大學購物

Homeplus的超市面積好大，有好多特價品發售，包括熱門的紫菜。

Homeplus樓高有好幾層，要行勻各層都幾花時間和氣力。

釜山大學站一出，就係釜大購物街。

釜山購物街四通八達，好多時裝小店，十足十似梨大購物街！

明倫站一出，就係樂天超市和百貨公司。

坐地鐵到釜山大學站，從3號出口步出，就係購物街。

飾物小店包保女孩子喜歡。

橫街內好多小店，千萬咪錯過。

bistro L係一間小西餐廳。

店內設計溫馨雅致。

套餐包餐湯和自助汽水。

我的吉列豬扒配炒飯，好好味！

朋友的忌廉磨菇意粉同樣有水準。

門外顯示不同美食，若店員唔諳英語，可直接拖佢出去門外，然後指俾佢睇！

第五日早上，原本想到溫泉場站虛心廳內的Trick Eye 3D Museum，再影3D立體畫，點知去到先發現博物館已閉門大吉。於是，轉往HomePlus超市購物，幸好呢間超市同樣在溫泉場站，而且在3號出口直達，好方便。

HomePlus好大，樓高幾層，我地只行左超市和服裝部，超市好多特價食物，尤其多1+1推介，即買一送一的優惠，不過我地稍後要去釜山同樂天超市，無謂拎得太多東西，所以差不多空手而回。

然後，再坐多一個站，到釜山大學站的購物街，呢條街同梨大購物街差不多，時裝和化妝品店充斥大街小巷，年輕人的流行服飾甚多，價錢5,000韓元起就有交易，難怪街上見到好多年輕人士啦！

到中午時分，我地揀左間位於右手面小橫街內的西式小餐廳－－bistro L落腳。店舖小小，設計好溫馨雅致，不過，餐廳全韓語，幸好最後搵到一名略懂英語的服務員介紹，最後我點左吉列豬扒配海鮮炒飯，套餐奉送忌廉湯醃菜，仲有自助汽水。吉列豬扒熱辣辣，炸得好鬆化，海鮮炒飯亦炒得不錯。朋友的忌廉磨菇意粉亦整得好味，絕對水準之上。呢餐合共100港元左右，每人50港元左右已經食到捧腹，抵！！

午飯過後，我地再轉戰另一間位於明倫站的樂天超市。呢間超市就在地鐵站旁，天橋直達，同樣好方便。今次只係買左少量零食同粟米茶，畢竟今年已是第三次遊韓國，實在無乜特別好想買的東西啦！

 HomePlus
前往方法：溫泉場站3號出口即到

釜山大學購物街
前往方法：釜山大學站3號出口即到

bistro L

前往方法：釜山大學站3號出口步出，前行約一分鐘右轉，即見小店在橫街尾。

樂天超市
前往方法：明倫站1號出口即到（旁邊有樂天百貨，不過裡面無免稅店）

＊其實呢三個地方位於三個相連地鐵站（明倫站＞溫泉場站（虛心廳旁有免費露天足浴場）＞釜山大學站），半日之內可以一次過行晒。

濟州釜山自由行（十三）：札嗄其市場嘆美味鮑魚海鮮鍋

鮑魚套餐除有主菜六粒鮑魚外，仲有好多小碟，

包括前面呢條煎魚，好味！

套餐的小碟有薯仔、南瓜、冷豆腐、凍蟹仔、雜菜絲沙律等。

套餐仲有煎葱餅。

4月遊釜山無食過札嗄其的海鮮，在濟州又無食過鮑魚，所以今次無論如何都要在札嗄其市場嘆番夠本。

由酒店過對面馬路，5分鐘即到札嗄其市場。二樓就係海鮮餐廳和海味乾貨店舖。我地揀了右面第二間的海鮮餐廳，一來因為有椅子可坐（最怕席地而坐，屈住雙腳好唔舒服），二來招客的妹妹仔較老實，佢提議我地食生魚片套餐的話，唔食生魚片的話，可改為鮑魚（一碟6隻），套餐包多達近十碟涼拌小菜、煎蛋葱餅和煎魚等。另外，提議我地再加一個海鮮鍋。

＊鮑魚套餐（小：50,000 韓元）：前後來左近十小碟，涼拌的有豆腐、泡菜、薯仔、南瓜、醃小蟹、雜菜絲沙律等，熱的有煎魚和煎蛋葱餅，好好味。鮑魚一碟六隻，清蒸，上碟時已逐隻切開俾我地慢慢嘆，唔使點醬汁已夠鮮味，而且唔韌，好味！

 

呢個海鮮鍋份量其實唔少。

妹妹仔店員先親手同Ｄ海鮮拆殼去骨。

拆骨後，等多十分鐘左右，我地就可以開餐，

勁大鍋，食到我地捧著肚皮。

＊海鮮鍋（小：40,000 韓元）：好大鍋，妹妹仔先幫我地拆好所有海鮮的外殼，然後等多十零分鐘就食得。海鮮有蝦、蟹、各式貝殼類等，仲有蘿蔔同豆腐等，海鮮肉質煙韌新鮮，湯底微辣，愈滾愈濃，我食到一半已經覺飽，朋友就由頭帶到落尾，居然可以食清晒所有鍋內食物兼且仲飲晒Ｄ湯，勁！

呢餐合共 90,000 韓元，折合 630 港元，係我地全程最貴的一餐，但實在物有所值。

食飽之後，我仲帶朋友去番上次幫襯的乾貨舖（同樣係札嗄其市場二樓，不過較入面的店舖），買埋海味魷魚乾做手信。

札嗄其市場

前往方法：乘地鐵札嗄其市場站10號出口步行 5 分鐘即達

札嗄其市場二樓海鮮店（妹妹仔的卡片印住：尹漢洙）

地點：釜山廣域市中區南浦洞4街37-1番地札嗄其市場二樓內（出lift後右面第二間店）

電話：（051）246-4691

電郵：ssh1479@yahoo.kr

濟州釜山自由行（十二）：南浦洞鳳凰酒店方便但太舊

房間設施好舊式，仲係用大膽電視機。

浴廁同樣老舊。

大堂直頭有時光倒流四十年的感覺，最啱拍《花樣年華》！



甫入酒店，便要登上呢條迴旋樓梯，check in時宥職員代勞，

臨走就要自己將行李抬落樓梯，吃力！

酒店外觀亦同樣老舊，唯一最大的優點係

在南浦洞的中心地帶，食住玩都好方便。

乘下午2點45分的航班，一小時已抵達釜山，在機場乘坐前往南浦洞方向的巴士，大約 1 小時車程，在南浦下車，正正是鳳凰酒店的入口。回程時，只需過對面馬路，便是機場巴士站，非常方便。除此之外，酒店後面就係 BIFF 廣場和光復路購物街，前面就係札嗄其市場，就算步行往樂天百貨光復店都只係15分鐘左右的腳程，開餐購物話咁易。

 酒店就太舊啦，大堂黑黑沉沉的，似足60年代格局（朋友笑謂似入住《花樣年華》的酒店，可惜我地唔係張曼玉！）。房間唔算細，不過設施好舊，大膽雪花電視機、極微弱的冷氣（嵌在牆上的冷氣remote control生鏽兼唔work！）（好在有風扇！）、無Wifi、電插頭唔多、無浴室用品，基本上真係純粹用來睡覺就算！

 不過，酒店職員友善兼服務周到，我表示唔夠插頭，佢地轉頭即拎個萬用插頭俾我；check out時，我的行李喼手陃突然斷左，女職員即時遞來封箱膠紙，等我慢慢黐住，都好唔話得！

釜山鳳凰酒店

地址：釜山南浦洞8-1,5ga（在釜山機場坐南浦洞方向機場巴士可直達酒店門外，車資6,000 韓元。回程時，只需過對面馬路，即有機場巴士站，交通的確好方便！）

酒店鄰近景點（1分鐘至20分鐘腳程之內）：BIFF電影街、光復路購物街、國際市場、札嗄其海鮮市場、龍頭山公園及樂天百貨光復店等

房價：約500港元（以我9月初在AGODA為準）