首爾冬遊記（十一）：明洞那度香抵食烤肉兼送明星相

 ＊那度香由明洞地鐵站15號出口靠右的一條橫街內，唔算難搵。　

＊大堆頭的冷菜，最鍾意泡菜同豆腐。
 

＊未烤前的肉塊又大件又肥又多血！

 ＊店員將肉塊放在烤爐上。

＊差不多熟時，店員幫手將肉塊剪成細細件，等我地自己慢慢嘆！

包著生菜和甜醬來吃，減去油膩，好香口惹味。

 ＊免費送的蒸蛋，蒸得太熟，唔夠日本的蒸蛋香滑。

 ＊石鍋飯較傳統，反而無梨大小店的芝士石鍋咁好味。

＊朋友指明要裴勇俊和張根碩！

幾本旅遊書都介紹呢間名為那度香的烤肉店，話平靚正，每人平均消費約20,000韓元（150港幣），而且位於明洞，反正我地要去樂天免稅店掃貨，掃完貨順便去應該唔難搵，所以一早列印定優惠券，以便慳多ｄ！

我地行完樂天免稅店，在地面向著Lotte Young百貨公司方向直走，過對面即見明洞的入口，原來那度香正正就在對面的一條橫街（應該在明洞站的15號出口直達行一分鐘！），估唔到俾我咁易搵到。

那度香烤肉店設有席地而坐（要除鞋兼且繞腳坐，好辛苦，咪搞！）或普通檯椅，我地當然揀後者，起碼有椅背又唔使繞腳坐，舒舒服服！

我地揀的係優惠券內的牛肉＋豬肉烤肉套餐，有九折優惠，兼送蒸蛋一缽。齋食烤肉驚唔夠飽，再加一個石鍋飯打底。我食豬唔食牛，朋友就好牛唔好豬，各有所愛唔使爭！

店員先將大大件的肉塊放在烤爐上燒，燒得差不多後，便幫手剪細細條。最初覺得豬腩肉好肥，但燒好的烤肉用生菜加甜醬包著吃，似足吃北京填鴨咁，好香口惹味又唔覺熱氣！

至於石鍋飯，又係自己撈勻後慢慢嘆，不過可能之前食過梨大的芝士泡菜石鍋飯，相比之下呢度的石鍋飯普普通通啦！

食完烤肉，店員送上兩支免費迷你益力多。埋單計，兩人折實合共44,000韓元（呢餐已經係我地整個行程中最貴的一餐，折合港幣只係330元，好抵食！）。臨走時，收銀阿珠媽仲任我地揀兩張明星相，朋友鍾意裴勇俊和張根碩，所以兩張送晒俾佢，滿足而歸！

那度香前往方法：
由明洞地鐵站15號出口靠右的一條橫街（橫街對出的大馬路對正Lotte Young，但千祈唔唔使過馬路）

那度香優惠券（牛豬烤肉套餐九折兼送蒸蛋，現金找數九五折）：
http://www.konest.com/contents/gourmet_mise_map.html?id=1128

首爾冬遊記（十）：德壽宮＋市政廳遊走

 ＊德壽宮門外擠滿跟門將拍照的遊客。

 ＊威風的門將，不苟言笑！

 ＊德壽宮 的四周有積雪，加添美態。

＊中和殿前的小石柱，刻有不同級別的官階，古裝韓劇經常朝臣覲見皇帝時的場面。

 

＊遊完德壽宮 ，過對面馬路看看冬日限定的首爾廣場溜冰場！

梨大午飯後，坐車到市政廳站，一來想看看首爾廣場冬日限定的溜冰場，二來順便逛逛德壽宮 。

由市政廳地鐵站1號出口，兩分鐘腳程即達德壽宮 ，對面則是首爾廣場。到達時，大約下午3點半，雖然睇唔到王宮守門將交接儀式（只離遠見到遊行的門將在對面馬路的背影！），但就有守門將在大漢門俾我地任影，而且仲會幫我地影合照！同古裝人影相後，順便俾1,000韓元參觀德壽宮 。宮內四周有積雪，加上古色古香的宮廷環境，影相幾好！我尤其鍾意通往中和殿前的兩旁印有不同官階（由正九品至正一品）的小石柱，皆因睇古裝韓劇經常出現大臣在此覲見皇帝的場面，來到實地體驗一番，別有趣味！

遊完德壽宮 ，便過對面馬路看看變身做溜冰場的首爾廣場。周日的午後，溜冰場充斥著大大小小的溜冰愛好者，畢竟1,000韓元即可玩一小時，過下癮都抵！可惜我地完全係門外漢，無謂顯醜，影影相看看便算了！

德壽宮及首爾廣場前往方法：
由市政廳地鐵站1號出口，兩分鐘腳程即達德壽宮 。遊完德壽宮 ，不妨順便過對面行埋首爾廣場。
備註：德壽宮 大漢門前有王宮守門將交接儀式，表演時間：1100、1400、1530（我地來遲少少，只見遠遠的遊行門將身影，幸好在大漢門外有守門將俾我地做布景板！）

溜冰場開放日期：2012年12月15日至2013年2月3日。