＊大堂布置好溫馨。
＊酒店內走動，只可以著拖鞋，波鞋放右面的locker內。鎖匙要自己保管。
＊酒店無 Lift ，要搬大件行李上落的話，好考腳骨力！
＊房間極細，放兩張床之後，已無位走動。
＊房間無衣櫃，只有呢個掛牆架。
＊浴室只有一支牙膏，其他沐浴用品欠奉。
＊酒店屬小旅館格局，似 Youth Hostel。
＊由忠武路站 8號出口，見World Pet 21 商場的右面直入小巷。
＊行多100米左右，再見指示牌，再入100米就係啦！
＊夜間的小巷好靜，印刷廠閂晒門，一個女仔出入的話，要好小心！
酒店在忠武路站的 8 號出口一出，見 World Pet 21 商場的右面小巷進入。雖然有指示牌，但好易錯過。呢條小巷好窄又污糟，兩旁都係印刷廠，入夜後好靜，一個女仔出入要好小心。
至於酒店內的布置則溫馨雅致，大堂細細，用左好多黑板仔手寫左一些溫馨提示，而且色彩鮮艷，好有女生宿舍Feel！不過，房間實在太細和窄，兩張三呎單人床之外，走動的位置差不多完全沒有，執行李就更唔方便。房間內無衣櫃，只有一個掛牆架，電視機居然係畫面充滿雪花的大膽老舊機！（爭在唔係黑白電視！）浴室只有一支牙膏和一隻小膠杯，其他沐浴用品全部欠奉。不過，熱水熱度和力度都超強勁，加上wifi好穩定，呢兩個優點就勝過釜山皇后汽車酒店啦！
論價錢，呢間酒店唔太貴（約 500 港元一晚），而且乾淨簡潔，不過有Ｄ缺點同規矩，大家要多多留意：
＊兩大缺點：
1. 酒店小巷難搵又太污糟（朋友鬧爆！）：雖然酒店近地鐵站（由忠武路站出 3 至 5 分鐘之內），但必須經過小巷，晚間又好靜，一個女仔要小心。若坐的士的話，的士司機也未必搵得到。我地兩晚都搭的士回來，的士司機都唔識路，就算俾埋卡片，佢地都唔知位置，結果要佢打俾酒店經理小姐Yong Yong，由佢親自教路先搵掂！
2. 酒店無Lift（朋友鬧爆！）：酒店樓高四樓，完全無Lift，若帶大件行李上落，都要好考腳骨力。
＊規矩多多（朋友鬧爆！）：
1. 波鞋放Locker：酒店上下走動時要著佢地的拖鞋，波鞋要放在大堂的Locker內，Locker鎖匙要俾 10,000 韓圜，退房時憑匙退錢。
2. 毛巾自理：每日用完的兩條毛巾要放出走廊的籃內，要再用就落大堂領取新毛巾。
3.房間無熱水供應：要取用熱水，只可以落一樓大堂或上四樓尾的service room，自己煲水。
4.早餐食完要洗碗：酒店小大堂供應咖啡機和麵包、花生醬、果醬，不過食完的話，要自己清潔所有用具。
5.房間垃圾自己倒：第二日返房間，唔知點解無人清潔？被鋪完全無執過？但經理小姐明明話會有人換床單，奇？退房時，發現房間垃圾要自己倒在走廊上的垃圾箱內。
若大家認為以上問題唔係問題的話，呢間酒店其實唔錯。畢竟搭一個站就到明洞，行十幾分鐘就到南山谷韓國村和南山公園，再加上在忠武路站 8 號出口旁，即有 6015 號機場巴士直達仁川機場，真係好方便！
地址：181-5, Inhyeondong 2(i)-ga, Jung-gu（首爾明洞）
前往方法：由忠武路站 8 號 出口，見 World Pet 21 商場的右面直入小巷，步行 100 米左右，前方再見酒店指示，靠右再行 100 米即到。若坐機場巴士，可搭 6015 號在忠武路站 下車，同樣都係 8 號出口旁。
