珠海澳門遊（四）：新濠天地蘇濠試味失望而回

 南亞廚房，完全新開張格局，花牌仍放在門口外。

 咖喱豬配白飯

 青木瓜大蝦沙律

 青檸梳打

 薏米山藥水

 南亞廚房的格局同小餐廳甚至快餐廳差不多，收貴卻唔便宜。

星期一午飯時間，蘇濠內人流極少，部分食肆甚至零食客。

翌日，由珠海拱北過關，可能係星期一關係，關口唔太多人，大約廿分鐘左右，便可以過到關。過關後，即時跳上賭場車，直往新濠天地。

左揀右揀之下，終於揀左新濠天地全新尊尚餐飲娛樂專區──蘇濠的一間名叫南亞廚房的小店。據講蘇濠呢個專區七月底先至正式開幕，仲話有16間中西餐廳及型格酒吧。不過，星期一午餐時分，人流指數極低，好多都無食客，就算有食客的店，也只是三兩檯人。我地的南亞廚房亦只係兩檯，不過既來之則安之啦～

為免再浪費食物，今次我地只點左以下食品：

＊咖喱豬配白飯：水準普通，不過不失。

＊青木瓜大蝦沙律：信錯左服務生，青木瓜沙律果然係辣，幸好撈白飯同吃，減低左辦度，兩隻中蝦，肉質唔太新鮮。

＊青檸梳打：好清好淡的梳打，幸好唔太甜。

＊薏米山藥水：完全無薏米粒可食，令朋友好失望。

至於服務方面，服務生的水準可以有很大進步空間。我詢問青木瓜沙律會否好辣，服務生居然表示青木瓜沙律唔會辣，但熟悉泰國菜的人都知青木瓜沙律一定辣，而且係酸中帶辣。另外，由於食客唔多，幾個服務生圍在小店內吹水，甚至講粗口，又有女服務生不停照牆上的鏡子，實在令人看不過眼呢～

埋單255元，以佢地小餐廳格局，呢個價錢完全唔便宜，下次應該唔會再幫襯。

南亞廚房
地址：位於新濠天地全新尊尚餐飲娛樂專區──蘇濠

 

澳門熱辣辣一天遊（四）：遊澳門世遺景點盧家大屋

＊進入大門後，就見呢個大堂，再進入屏風之後，就係另一個大廳。

＊抬頭一看，大屋有多個天井，光線可以直接照射下來。

＊正因為有天井的關係，所以好光猛。

＊七彩玻璃窗。

＊偏室的一角古色古香。

＊盧家大屋的入口，對面充斥著不少小食店，兩者感覺真係好格格不入。

食完下午茶，又搵地方逛逛。之前上網搵過資料，發現在大三巴附近的對面小巷內，居然有一個澳門世遺景點－－盧家大屋（Casa de Lou Kau），兼且免費入場，便順道一遊。

盧家大屋又稱金玉堂，位於大堂巷七號（大屋四周充斥住不少小食店，兩者的感覺好格格不入！），清光緒十五年（1889年）落成，係澳門20世紀初商人盧華紹（盧九）住宅，現為「澳門歷史城區」（即澳門世遺景點之一）的一部分。

盧家大屋用厚青磚建造的中式兩層建築，包括廳、房、廚房、雜物房、天井等，係典型的中式大宅（部分設計同我以前參觀屏山文物徑內的古老大宅極相似！）。建築內有多個天井，所以好通風而且光猛，黃昏時分，閒逛其中，遊人亦不多，頗為舒服。

今次遊澳門，發現澳門再唔係搵食天堂，物價真係貴左好多！與其到澳門食食食，但其實價錢又唔係咁便宜，食物水準又唔係咁好的情況下，不如行下呢Ｄ近在咫尺的古老建築物，似乎有意義得多！

盧家大屋
地址：澳門大堂巷七號（整條大堂巷已有不少風味美食，包括意式雪糕、韓式小食，還有街坊式食肆）
開放時間：9:00am-7:00pm（逢星期一休息）
＊免費入場與導賞服務
網址：http://www.macauheritage.net/vr/preview/vrC.asp?vrNUM=16_1

澳門熱辣辣一天遊（三）：下午茶嘆九記涼粉

 

＊左：我的雪糕涼粉，真係好迷你，幾啖可以食完，而且唔自太冰凍；

右：朋友的紅豆淳粉新地。

 

＊各種食物和飲品的價錢已經今時唔同往日啦！咸甜餐每款都要 34 蚊，唔便宜！

 

＊價錢加左咁多，九記的門面就無乜改變。

 

睇完熊貓，過對面坐番 26A 返回澳門半島。下午茶時段，走左去議事亭前地側邊斜路上的九記冰室食個甜品消消暑！都有差不多十年無幫襯。

 

今次再來，發覺物價又係貴左好多。以前食杯裝三球雪糕只係十零蚊，而家要 20 蚊，冰類亦閒閒地 20 蚊，店舖仲要標示每位最低消費 10 蚊，感覺其實唔係太好。

 

我食雪糕涼粉（19蚊），涼粉分量極為迷你，唔太冰凍，雪糕味道亦無得選擇，真係唔多值；朋友明明叫紅豆涼粉，結果來左紅豆涼粉新地，無端端要佢焗食多一球雪糕，涼粉的分量比我的大少少，當然價錢亦貴多Ｄ（26 蚊）。

 

埋單合共 46 蚊，價錢唔貴，但食物唔多值！下次應該又唔會再幫襯啦！

 

九記冰室
地址：澳門新馬路羅結地巷9號B
電話：2837 5716

 

 

澳門熱辣辣一天遊（二）：去熊貓館探開開和心心

 

＊公園內好多熊貓像，好得意！

 

＊雖然叫郊野公園，但其實唔算好大！

 

＊呢個就係澳門大熊貓館！

 

＊唔知呢隻係「開開」定「心心」，表演食竹當食生菜，幾咁精靈！

＊另一隻亦算活潑，走來走去！

 

＊見到我地的老友：鴨仔打孖暢泳！

 

＊成群結隊的火烈鳥！

 

＊土地暨自然博物館免費入場，好值得參觀！

 

＊澳門的岩石。

 

＊呢隻真係超級大番薯標本，有22磅咁重，係澳門本土掘出的大番薯。

 

＊古老的農業用具也有展出。

 

 

原本諗住由澳門半島坐26A巴士去乙水仔的龍環葡韻睇荷花，點知唔識落車，一直坐到路環，不如將錯就錯，去路環石排灣睇熊貓。

 

澳門大熊貓館位於路環石排灣公園，佔地約 3,000 平方米，屬大熊貓「開開」與「心心」的安樂窩。巴士站行一分鐘即到，由公園入口即行到尾，就係熊貓館的售票處，門票只係 10 蚊，不過分有 6 個場次，我地兩點半去到，就買 2 至 3 點的場次。館內只有十幾個人，好寬敞，兩隻可愛的熊貓「開開」與「心心」各佔一個空間。平時去海洋公園睇熊貓，隻隻都係懶洋洋唔多願郁；尋日好好彩，兩隻熊貓經常走動，兼且近距離向我地表演食竹葉，趙到好似我地食蔗咁，好趣致，其中一隻背住我地屙便便，認真搞鬼！

 

嘆完冷氣睇熊貓之後，順便在公園內閒逛，見到有個池，原來養左好多水烈鳥（ Flamingo ）同埋黑天鵝，仲有兩隻迷你膠鴨仔嬉水暢泳。再向前行，又見到好多鐵籠，原來又食左好多唔同品種的猴子（包括長臂猴）。最後，仲入埋去土地暨自然博物館。呢個博物館分為五個展區，備有詳細的中葡文解說，介紹澳門的天然生態環境、岩石、動植物資源之外，仲展出歷史悠久的農業用具，其中最特別的係展出左一個足足有 22 磅的大番薯標本，都幾有趣！當然有冷氣嘆，亦值得大家入去過過冷河！

 

拖拖拉拉，我地居然在公園都流連左個幾鐘，都算難得！最正都係整個公園好寧靜，極少遊人，逛得好舒服！

 

澳門大熊貓館
地址：澳門路環石排灣郊野公園內（我地在澳門半島坐 26A 巴士於石排灣郊野公園下車即到）
收費：10蚊（憑票入場，每日分 6 個場次，每場次分批進館；逢星期一休館）
網址：www.macaupanda.org.mo

澳門熱辣辣一天遊（一）：南屏雅敍食物飲品好一般

 

 

＊雞扒一丁加紅豆冰：雞扒炸得又老又硬又厚，唔多開胃；

幸好紅豆冰好味，而且咁腍又多，補番少少數。

 

＊我呢個南屏一丁，真係自己屋企整仲好味過佢！

菠蘿冰細細杯，只覺得糖水加罐頭菠蘿！

 

＊叉燒雞蛋三文治，水準普通，雞蛋唔夠滑！

 

＊格局極懷舊，侍應聲大大態度亦麻麻，似足香港老牌茶餐廳！

 

＊剛有新鮮熱辣辣出爐的蛋撻，好似幾吸引，不過無食！一來已經好飽，二來都擔心佢的水準，無謂再俾機會佢啦！

 

＊茶餐廳的門面都好懷舊。

 

6月19日，同朋友即日遊澳門，由於係閒日兼且係星期三賽馬日，遊人唔多，無論景點或者搵食的地方都唔覺擠迫，所以就算冒住酷熱天氣之下周圍遊走，都尚算可以接受啦！

兩年半無去澳門，今次覺得物價貴左好多。好似巴士車費咁，以前我記得在澳門半島坐巴士，只係 2 蚊左右，出乙水仔就 3 蚊左右；今次再搭巴士，發覺車費貴左好多，澳門半島內要俾 3.2 蚊，出乙水仔就要 6.4 蚊，兩個人閒閒地十幾蚊，真係唔便宜！

 

尋日盡量搵一Ｄ以前無去過的地方逛下食下，第一站係南屏雅敍。呢間位於十月初五街的老式茶餐廳，聽過同睇過好多網友介紹，今次都係第一次幫襯。格局的確好懷舊，咖啡色木卡位、牆上或天花板的吊扇、態度麻麻地的侍應，全部好似香港八十年代的茶餐廳，至於食物的水準就好一般啦！

 

我叫的係南屏一丁同蜜汁菠蘿冰，朋友就叫紅豆冰加雞扒一丁，兩人仲要左份叉燒雞蛋三文治齊齊分享。

 

＊南屏一丁（23 蚊）：無論中英文都唔知係乜東東，問過侍應之後，先知係叉燒火腿雞蛋出前一丁！送上來的賣相真係好一般，叉燒同火腿煎都無煎過，雞蛋又煎到爛爛地，加埋湯料又唔撈勻先送上來，感覺仲差過自己整！食落同樣好麻麻！

 

＊雞扒一丁（18 蚊）：雞扒居然係炸，不過係炸到老兼硬晒，皮又厚，四粒咁大把，飛走老硬的炸皮之後，真係無乜肉食。

 

＊叉燒雞蛋三文治（15 蚊）：上網見好多網友都叫呢款三文治，所以嗌來兩人分享。雞蛋夾住叉燒，蛋的分量幾多，不過整得唔夠滑，水準普通。

 

＊蜜汁菠蘿冰（12 蚊）：最初希望佢係用一隻大圓杯裝菠蘿冰，咁就夠懷舊。點知只係一隻小玻璃杯，飲落唔覺有蜜汁，只係糖水加罐頭菠蘿，徙料！

 

＊紅豆冰（12 蚊）：朋友唯一大讚的食物，因為佢杯紅豆冰的紅豆多到不得了，差不多有半杯咁多，而且豆好腍，以12蚊來講真係超值。

 

埋單呢餐兩人只係80 蚊，唔太貴，但水準真係唔得掂，差過香港好多茶餐廳，應該唔會再幫襯。

 

南屏雅敍
地址：新馬路十月初五街85-85A號地下
電話：2892 2267

 

澳門一日遊行程：
十月初五街南屏雅敍（午餐）＞坐巴士（26A）路環大熊貓館＞坐巴士返澳門＞九記冰室（下午苶）＞盧家大屋＞大三巴＞買豬肉乾和杏仁餅做手信＞保健牛奶（輕食晚餐）