元朗食玩半天遊：河背水塘+南山軒私房菜

＊河背水塘家樂徑入口。

＊45分鐘的家樂徑，睇到好靚的水塘景。

＊平坦泥路，有樹蔭，好輕鬆舒服。

＊大壩一景，亦都係家樂徑的尾聲。

＊返到差不多大壩位，遠眺水塘另一景。

＊鮮蝦冬蔭功烏冬，湯底好濃郁，正。

＊無南山茶冰，唯有飲紅豆冰。

＊朋友的炸魚包，水準普通，份量就好大。

＊呢度的下午茶全部都要40蚊以上，唔算便宜。除粉麵外，仲有包類同沙律等選擇。

＊星期日下午四點，客人唔多，大把位。

天朗氣清，不冷不熱，最宜郊遊。今日的目的地係元朗的河背水塘。

由元朗大榮華酒樓旁坐71號小巴，大約半小時的車程，一直坐到總站即到達山腳位置。

最初一段最為艱苦，由山腳一直上斜路，密密腳行都要行足半小時，經過埋青協的有機農場，就差不到達河背水塘家樂徑，沿著水塘而行的家樂徑全程45分鐘，泥路，平地，易行，水塘風景秀麗，行得好輕鬆寫意。之前幾次行都無乜見到行山人士，今日居然遊人不絕，有Ｄ仲係數以十人的團體，不過都無損逛遊家樂徑的雅興。

回程時，沿路折返，同樣要直落斜路，在山腳的小巴站再坐小巴返回元朗。

由於我地揀的下午茶地點係南山軒私房菜，所以在Yoho Town落車，穿過形點商場，由元朗西鐵站的J出口，直行十分鐘，到達呢間中檔茶餐廳。

下午四點，客人唔多，座位任揀。我地各自叫左一個下午茶餐，我揀左鮮蝦冬蔭功烏冬，朋友揀炸魚柳包加薯條。原來最想飲的係招牌南山茶冰（其實即凍奶茶，不過冰粒都係奶茶來的，所以就算冰融左，茶味仍然好濃郁）。可惜侍應話賣晒，我只好揀紅豆冰，味道唔錯，但豆可以再腍就仲好味；朋友的茶走奶茶則唔差。至於鮮蝦冬蔭功烏冬，湯底酸中帶辣，好濃郁，再加蝦唔少，又有雜菜和菇，非常惹味，最令我回味，都總算無白來幫襯。埋單，兩個人合共91元，以下午茶來計，唔算便宜，但都唔貴！

下次，一定要一定要再幫襯，試到南山茶冰為止。

河背水塘

前往方法：元朗大榮華酒樓旁坐71號小巴至總站下車，再步行30分鐘上山，即到達河背水塘家樂徑。

南山軒私房菜

地址：元朗黃屋村178號

前往方法：元朗西鐵站J出口向錦田方向直行十分鐘內到。

冬日河背水塘輕鬆遊

由河背水塘家樂徑的木牌坊轉入，沿水塘一圈慢行，大約需時只係一個鐘頭 。

 近觀水塘，風景更美。

 翠綠水色清澈見底。

 家樂徑差不多全是平坦山路，遊人不多，真舒服。

見到呢間鐵欄杆，就知道差不多完成一圈了。

 2014年伊始，趁天氣和暖，一行四大兩小，由我帶路郊遊去！

今次的目的地係元朗河背水塘家樂徑，我地先在元朗大榮華酒樓（居然朋友無一知道呢間酒樓位置，兼且仲俾人點左去榮華餅家，真係估唔到！）旁的小巴站，坐71號前往總站－－河貝村。

由總站開始，向山上前行，沿路可以遠眺元朗平原。呢條山路斜坡唔算太斜，不過行足二十分鐘左右的路程，大家都有點吃力。

經過青年協會的有機農場，繼續再偏右向上行，終於見到河背水塘，朋友見到水塘寧靜翠綠景致，都齊聲讚好。沿著河背水塘家樂徑的木牌坊轉入，沿水塘一圈慢行，大約需時只係一個鐘頭，大致都係平坦的泥路，近觀水塘，風景更美，難得周末下午只有雲星的行山人士，所以格外顯得寧靜。

完成一圈後，原路折返，到青協的有機農場秋事休息，大人各飲左一杯落神花茶（20元），小朋友就飲混合鮮榨果汁（40元），仲有朋友買左有機香茅油（95元），價錢唔算便宜，不過全餐廳只有我地六個人，坐坐傾傾，也很不錯。

河背水塘
前往方法：由元朗大榮華酒樓旁坐71號綠色小巴到河貝村總站下車，沿山上前行，約20分鐘即抵河背水塘入口，繞家樂徑一圈大約需時1小時。換句話說，兩個多小時便可以完成呢條郊遊路線啦！