跨年超值沖繩遊（五）：參觀沖繩新年慶典

＊元旦日，首里城舉行新春慶典，吸引好多當地人同遊客前來。

＊首里城新春之宴1月1日至3日舉行，重現古琉球繁盛時代的傳統新年慶典。

＊首里城茶室有單張介紹琉球宮廷點心。

＊用300多日圓品嘗的琉球宮廷點心配香片茶。

＊護國神社充斥著大量前來參拜的當地人。

＊護國神社周圍有不少熟食攤檔。

＊護國神社內的人頭湧湧。

＊祈福的吉祥物品。

第二日（一月一日元旦日），適逢日本人過新年，我地早上先去首里城參觀新春慶典。首里城係琉球式城堡，從15世紀至19世紀是琉球國的都城所在地和王宮。首里城新春之宴1月1日至3日舉行，重現古琉球繁盛時代的傳統新年慶典。

欣賞完慶典後，我地仲去埋茶室享用香片茶配琉球宮廷點心，點心包括花形烘糕、光餅、雞蛋糕、桃酥等，坦白講，味道普通，勝在環境清幽雅致，在日式和室內享用300多日圓來食環境都好超值。

下午再去埋護國神社再湊熱鬧。每逢新年，護國神社係縣內祭拜人數最多的神社，當日所見，神社參拜人數極多，需要實施人流管制，周圍有唔少熟食攤檔，同埋售賣祈福吉祥產品的店舖。身處其中，感受新年熱鬧氣氛之餘，也希望沾點旺氣啦！

首里城

前往方法：首里站步行約15分鐘

護國神社

前往方法：從奧武山公園站・壺川站下車後約步行5分鐘

跨年超值沖繩遊（四）：日本料理好抵食

＊Naha Main Place一樓的和風亭係我地兩晚的醫肚地方。

＊我的除夕晚餐：海鮮飯定食，魚生好多又新鮮。

＊食完海鮮定飯定食，再來一個宇治金時刨冰做除夕甜點，好滿足。

＊和風亭再食元旦晚餐：今次係小海鮮飯加天婦羅，同樣好豐富。

＊元旦夜，又點可以唔食當地甜品，類似湯丸加紅腰豆，可惜糖水太甜啦！

＊和風亭三款冬日限定的定食，價錢都係2,000日圓或以下，實在好抵食。

＊百甕（Momogahmi）居酒屋的晚餐小食：紅薯天婦羅（前）和炒苦瓜（後）。

＊百甕（Momogahmi）居酒屋的晚餐小食：青木瓜絲春卷。

＊百甕（Momogahmi）居酒屋的沖繩麵（Okinawa Soba）。

＊百甕（Momogahmi）居酒屋位於二樓的門口。

呢幾日，餐餐都係食日本料理，其中兩餐晩餐都係在新都心Naha Main Place的一樓和風亭解決。據我地觀察所得，和風亭人氣指數極高，而且定食價錢相宜（約1,500左右），最正係醫完肚後可以即時購物好方便。

我兩餐都係食佢地的冬季限定的套餐，第一餐係海鮮飯定食，有大大碗魚生飯（魚生包括魚籽、帶子、吞拿魚、三文魚、蝦等）、茶碗蒸同味噌湯，海鮮新鮮又豐富，白飯軟熟帶微溫，價錢連稅只係1,490日圓，抵。

第二日就揀左另一個海鮮小飯連天婦羅定食，今次海鮮飯雖然細碗，但依然好足料，都有魚籽、帶子、吞拿魚、魷魚等，同樣有茶碗蒸同味噌湯，依然水準唔錯，價錢連稅1,382日圓，又係抵。

和風亭

地址：新都心Naha Main Place一樓

前往方法：由單軌車Omoromachi站步行約10分鐘

至於第三日的晚飯，就在國際通的百甕（Momogahmi）居酒屋解決。餐廳位於二樓，要除鞋內進，仲要坐榻榻米，不過見人氣指數幾高，而且供應的是沖繩食品，辛苦Ｄ跪坐都值得啦。

我地點的除左每人一碗沖繩麵（Okinawa Soba）之外，仲有幾款沖繩小食包括炒苦瓜（連雞蛋豆腐同炒，苦瓜較香港的爽口，甘甘地，幾好味）、紅薯天婦羅（唔配天婦羅豉油，改沾海鹽同吃，乾食，另有一番風味）、木瓜絲春卷（有Ｄ似泰式米卷，沾醬汁同吃，好清新）、豆腐（質感和味道都比香港的濃而厚，豆香無得頂），至於沖繩麵的湯底清而略帶油，配料包括魚片同豬肉，賣相和味道較平實，我都係鍾意東京同北海道風味的拉麵多些。

埋單計，四個人只係6,000日圓，都係好便宜。

國際通的百甕（Momogahmi）居酒屋

地址：Ryukyu central building 2F, 1-2-25, Makishi, Naha-shi, Okinawa, 900-0013

前往方法：由單軌車牧志站國際通方向步行約10分鐘

跨年超值沖繩遊（三）：單軌車遊那霸市好方便

＊沖繩單軌列車似曼谷的Sky Train。

＊單軌車車站。

＊2日乘車券，可以在48小時內無限次乘搭單軌車，盛惠1,200日圓。

今次遊覽沖繩，除第三日跟本地團之外，其餘時間都係坐單軌車遊走那霸市。單軌車類似曼谷的Sky Train，共用15個站，市內的主要景點都可以到達。不過，等車時間都幾長，因為一小時大約只有六班車左右，有時要等上15分鐘，遇上大風的日子，在站內等車都幾辛苦。

單軌車每程由230至330日圓不等，最化算就係買1日券（24小時，700日圓）或2日券（48小時，1,200日圓）。我地先買一日券，然後第二日再買二日券，加埋就係我地整個行程的車費，計落抵過逐次買單程票。

沖繩單軌列車（由那霸空港站至首里站，全程行車27分鐘，大約15分鐘一班）

車費：每程由230至330日圓不等，1日券（24小時，700日圓）；2日券（48小時，1,200日圓）

網址：

http://www.yui-rail.co.jp/

跨年超值沖繩遊（二）：新都心東橫INN就腳又抵住

＊新都心東橫INN就在Duty Free店的後面街。

＊雙人床房，三呎單人床下面可以放行李喼和大件物品，都算寬敞！

＊酒店送的DHC洗面潔膚用品。　

＊免費自助早餐，食物種類齊全。

＊我的早餐：橙汁、雞蛋、腸仔、沙律、飯團、漬物，好滿足！

＊餐廳只有三十幾個座位，高峰時間有人滿之患，等位在所難免。

我地預早半年預訂位於新都心區內的東橫INN，房租到埗後先俾錢，由於日圓半年來下跌唔少，去到check in先俾錢，雙人床房的三晚價錢（加即時入會費）只係19,000日圓（我地唔使人打掃房間，再減300日圓），即折合港幣1,235元，每晚每人只係206元，好超值。

房間方面，面積比想像中大，床下有空位可以放置行李喼和手信等大型物件，所以尚算寬敞，房內有免費WiFi、風筒同電視機。浴室用品方面，只供應洗頭水、護髮素同沐浴露，其他物品如梳、浴帽、牙刷等都可以在大堂升降機旁自由取用，既環保又方便。

住宿句括每天的自助早餐，食物種類不多但足夠，沙律、白粥、飯團、雞蛋、麵包、糖水、漬物、水果及飲品，一應俱全。唯一美中不足之處係餐廳座位有限，只有30多個，高峰時間等位在所難免，好在大家都食得算快，唔使等太耐時間已可入座。

東橫INN 沖繩那霸Omoromachi站前（即おもろまち駅（新都心））

網址：www.toyoko-inn.com/c_hotel/00184/

早餐時間（免費）：7:00-9:30

前往方法：從那霸機場乘單軌電車到Omoromachi站（大約20分鐘）下車，經Duty Free店的站旁樓梯或升降機落地下，過對面馬路步行2分鐘即達。

＊酒店對面有Duty Free店，步行幾分鐘即到新都心的Naha Main Place購物商場

跨年超值沖繩遊（一）：四日三夜沖繩行程安排

＊美麗海水族館

＊首里城新年慶典

＊沖繩手信隨處見

＊國際通內的平和通商店街是購物熱點之一。

由於舊年5月時香港航空有特價沖繩機票速銷，於是沖繩之旅就成為2014年的外遊最後一擊。我地的沖繩來回機票係12月31日出發，1月3日回來，連稅只係1,423元，加上住宿的係新都心的東橫INN，到埗後先至俾錢，適逢日圓呢半年下跌唔少，所以機票連三晚住宿，每人折合港幣只係2,045元，以新年旺季旅遊來計，實在極度超值！

由於午後到達，早機回港，四日三夜實際遊玩的時間大約三日，所以行程好簡單，其中一日跟本地遊之外，其餘時間都係坐單軌車暢遊那霸市內主要景點：

第一日：下午2點30分抵達那霸空港＞坐單軌車前往酒店＞國際通購物（牧志站至縣廳前站）＞新都心Naha Main Place晚飯兼購物（住宿：東橫INN沖繩那霸Omoromachi站前）

第二日：參觀首里城新春慶典（首里站）＞護國神社（壺川站）＞JUSCO（即Aeon）那霸店午飯及購物（小祿站）＞新都心Naha Main Place晚飯兼購物（住宿：東橫INN沖繩那霸Omoromachi站前）

第三日：參加本地團一日遊（美麗海水族館和歸仁城遺跡行程：萬座毛＞沖繩美之海伊薩渡假酒店自助午餐＞海洋博公園（美麗海水族館等）＞今歸仁城遺跡＞名護菠蘿園）＞國際通晚飯（住宿：東橫INN沖繩那霸Omoromachi站前）

第四日：早餐後坐單軌車往那霸空港

使費方面，由於我無買福袋，只純粹買大量零食和手信，所以使費極有限，最後計過只用左4,200元左右（機票＋三晚住宿＋使費），呢個價錢可以在新年旺季食買玩足四日三夜，實在抵過去澳門。

那霸飯店東橫INN（沖繩那霸Omoromachi站前，おもろまち駅（新都心））

雙人床房價：¥7,300（¥7,884）至¥8,300（¥8,964）

前往方法：從那霸機場乘單軌電車到Omoromachi站（大約20分鐘）下車，經Duty Free店的站旁樓梯或升降機落地下，過對面馬路步行2分鐘即達。

早餐時間（免費）：7:00-9:30

網址：www.toyoko-inn.com/c_hotel/00184/
*酒店對面就係DFS免稅店，向左步行幾分鐘即到新都心Nanha Main Place購物商場（營業時間至零時）

沖繩單軌列車（由那霸空港站至首里站，全程行車27分鐘，大約15分鐘一班）

車費：每程由230至330日圓不等，1日券（24小時，700日圓）；2日券（48小時，1,200日圓）

網址：http://www.yui-rail.co.jp/