首爾冬遊記（九）：梨大橫街嘆超好味芝士泡菜石鍋拌飯

 ＊小店位於梨大購物街的橫街，店外的易拉架顯示芝士石鍋飯好吸引，

而且標明4,000韓元，試試無妨。

 ＊石鍋飯未攪拌前的樣子比較平實，唔多吸引。

＊努力攪攪攪！

 ＊完成啦！芝士溶入飯粒之中，加上有泡菜甜醬，超級惹味，只係微微辣，好好味呀！

＊平實的快餐店格局，單賣芝士石鍋飯，但食物水準好高！

遊玩梨大校園，返回購物街搵食晏地方。在購物街第二條橫街，發現一間好吸引的石鍋飯小店，而且標明只係4,000韓元，於是膽粗粗入去試試。

店內全部都係年青的本地人，以女士為多，一直覺得若多本地人幫襯的小店，味道一定唔錯，而且比做遊客生意的店舖更便宜！今次又再證實。

我食的泡菜石鍋飯，用一個熱辣辣的石鍋奉上的熱飯，表面睇好平實咁，只有芝士碎、粟米同紫菜碎，好似好Dry咁，點知攪拌後發現飯裡加有甜中帶微辣的泡菜醬，芝士攪拌後溶入飯粒之中，香氣撲鼻而來，食落真的好惹味！呢度奉送酸蘿蔔和泡菜，我連食幾碟，再加免費冷熱水，埋單每人只係需要30元港幣，呢餐真係超值之至！

芝士石鍋飯小店:
位於梨大購物街的橫街，店外的易拉架好易認。

首爾冬遊記（八）：遊梨大校園兼到購物街掃貨

 ＊最初以為Alice House係咖啡店，點知只賣漢堡包！

 ＊漢堡包好大個，我無食牛肉，都覺得好飽，難為我老友要食兩塊牛肉，

再加杯汽水，真係飽到上心口！

 ＊呢隻高跟鞋可以講得上係梨大購物街的Icon。（不過後來再去，已經拆左啦～）

 ＊高跟鞋店叫Kosney，係一間生活雜貨店，類似franc Franc又或宜家傢俬咁，好多精緻精品，亦有衣服鞋襪發售，剛巧正在減價，買滿30,000韓元仲可以退稅，抵上加抵，結果我在此買左兩件衫加兩對襪，盛惠34,000韓元。（不過後來再去，已經拆左啦～）

 ＊呢間其實係化妝品店，全店半價，超抵。我在此買左五支眼霜，原價99,000韓元（742港元），折實56,000韓元（420港元），另加兩支1,600韓元（即12蚊港元）的手霜，再送眼影或唇膏，仲有唔少samples添。

 ＊橫街小巷內店舖林立，價錢好便宜，所以隨街聽到好多香港人的聲音。

 ＊穿梭其中，發現好多衫、鞋、袋10,000韓元（約75港元）都有交易，

襪就1,000韓元，真係好難忍手唔買！

 ＊高腳七其實係手機店的宣傳大使。

  ＊梨大這個建築物外牆係龍友熱門拍攝地－－梨大多功能館，據講這座建築物由法國建築師Dominique Perrault建造，兩棟埋在地底的建築間夾著一條長長的走道，恍似一座峽谷。

＊梨大校園的另一邊，充滿書卷味。

梨花女子大學因《我的野蠻女友》（車太賢就係梨大被全智賢迫著高跟鞋周圍走！）而出名，景致幽美，聽講甚多龍友出沒；加上附近的購物街貨品平靚正，所以第二日一早乘地鐵到梨大站一遊。

由於周日的關係，上午購物街行人唔多，部分店舖尚未開門，我地先去Alice House食漢堡包做早餐。整間餐廳只有我地兩個客，侍應慢慢做，我地就慢慢影相。漢堡包餐連薯條和汽水要7,900韓元，唔便宜，分量都幾大，早知兩個人食一個餐好過！而且，我唔食牛肉，更加覺得味道普通，來到韓國都係食韓國食品滋味Ｄ！

吃過早餐，街上店舖陸續開門，遊人亦多，不少香港人都到此一遊，畢竟橫街小巷的時裝店甚多，而且價錢很便宜，衫褲鞋袋襪樣樣齊，當然亦唔少得化妝品店，呢度的化妝品折扣更多，有些更全店半價，要買的話真係會買到癲！

行完街，便進入梨大校園本部，環境真的很優雅，充滿高尚學府的氛圍，建築物的設計亦別具特色，加上部分地方有輕微積雪，更添美態，難怪龍友遊人甚多，大家齊齊去唔同位置取景拍影，左影右影，大家都影得不亦樂乎。

奉勸大家，要購物的話，來梨大購物街好過明洞呀～

梨大前往方法：
地鐵站梨大站2或 3號出口，即達購物街，向前直行便可以到達梨大校園本部。