＊餐廳環境唔大，幾雅致。
＊呢款香蕉味的蛋糕好明顯就係類似tiramisu，仲唔係芝士蛋糕的一款？
＊以配餐的沙律來講，份量足又味道唔錯。
＊蘑菇雞肉扁意粉的份量都好大，不過雞肉較鞋口。
老友慶生，提議試新餐廳，去位於太子花墟內的一間聲稱公平貿易又有機的小店午飯。
周六中午12點，店舖不大，只有三十多個座位，三行排排位的格局，座位之間距離極近，人客唔多時，細細聲傾偈尚可，但隨著人客數目不斷增加，我地同同周圍人客的聲浪漸逐提高，到最後甚至恍如置身在大酒樓般嘈吵，簡直都聽唔到對面朋友的說話。想坐低好好傾偈的朋友，要好好考考清楚。
講番食物，餐牌只有四款午餐(價錢由百零蚊至148蚊不等)，以及不同的花茶或咖啡（熱飲價錢38蚊起，凍飲就40幾蚊），無小食，亦無散餐供應。朋友太飽，食唔落整份午餐，於是問店員可cake供應？店員話有香蕉、朱古力、紫薯三種，我追問：係咪cheese cake？店員有點不耐的說：唔係cheese cake，都話係cake囉！大佬，cake除左味道之外，都有唔同種類丫，水果蛋糕、海綿蛋糕、拿破崙蛋糕、芝士蛋糕唔係蛋糕咩？！結果送上來的香蕉蛋糕，味道其實好唔錯，而且仲有新鮮香蕉片夾在蛋糕之中，只不過佢的的確確似係香蕉味的tiramisu，而且真的帶芝士味，咁咪係cheese cake囉！！
我同另一個朋友就叫午餐，揀左蘑菇雞肉扁意粉，配煙三文魚回園沙律。沙律份量大，賣相好，而且好味，以午餐奉送的沙律而言，的確有驚喜。主菜的蘑菇雞肉扁意粉，聲稱採用無激素的雞肉就食落有d鞋口，自家製的醬汁有點似千島醬，又有點似蛋黃醬，較膩，加上份量都好多，食極都好似食唔完咁，味道就中規中矩啦。
輪到餐飲，餐牌寫明是健康花茶，又或加18蚊可改配手磨咖啡或雪糕。最初的店員曾介紹今日的健康花茶係茉莉綠茶，若改飲其他飲品就需加18蚊。到後來正叫餐飲時，另一位中年女店員就話今日唔係健康花茶，仲拎住一盒寫著Premium Green Tea的茶包盒俾我地睇，然後我地問若加18蚊改配手磨咖啡，是熱還是凍？我可否改要凍呢？中年女店員就話要再加6蚊，我話：下？仲要再加錢？中年店員就又有點不屑地說：你知啦，冰都要錢，講緊的都係幾蚊啫，你地慢慢揀啦……見我地仲猶疑同想再考慮咁樣，就慢慢拖着呢句說話就走開了。講真，唔係幾蚊呀大佬，已經要加18蚊，凍的話再加6蚊，加埋24蚊，都算唔便宜吧？！加上咁嘈吵的環境，咁樣的服務質素，我地無理由再加錢落呢個深淵度咁傻的吧？！
於是，我地又叫番最初招呼我地的店員，再問一次今日的健康花茶是甚麼花茶？係咪茉莉綠茶，而唔係一般綠茶呢？店員好肯定地表示係「茉莉」綠茶。結果轉頭奉上的係一杯溫溫吞吞、不熱不冷的綠茶，飲落根本就係茶包泡的綠茶，完全無苿莉香味!!!!說好的「花」茶呢？用綠茶茶包泡的綠茶話係健康「花」茶，咁係咪犯左商品說明條例呢？
埋單計，兩個午餐加一件香蕉蛋糕，合共275元，價錢在花墟來講係中價左右，但環境嘈吵到完全不能接受的地步（以滿座情況而言），加上九流的服務質素，我地三人異口同聲講永不幫襯。
沒有留言:
張貼留言