赫爾辛基慢活遊（二）：Hellsten Helsinki Parliament性價比高

＊雙人房非常闊落，旁有梳化椅和茶几。

＊另一邊有餐枱和四張椅。

＊雪櫃、微波爐、電水壺、電磁爐都有齊。

＊餐具齊備。

＊由於酒店無餐廳，每朝自己炮製心水早餐仲正！

＊浴室較細，只有三合一沐浴用品，無牙刷牙膏。　

＊懷舊升降機只限3人乘坐，仲要人手推門，好興趣。

＊酒店建於1912年，只有五層高，但保養得非常好，四周住宅包圍，環境好清靜。

＊酒店就在呢座國家博物館後園不遠處。

＊酒店往上走，十零分鐘便到達奧林匹克體育館。

＊酒店距離西貝流士公園大約20分鐘腳程。

我在Expedia訂的係芬蘭航空直航赫爾辛基（9月22至10月5日），再加12晚住Hellsten Helsinki Parliament，價錢唔使一萬蚊，真係好超值。

Hellsten Helsinki Parliament位於國家博物館的後園步行幾分鐘即到，坐芬蘭機場巴士可以在Hesperian puisto站（即中央車站總站前一站）下車，轉入內街（國家博物館後面），幾分鐘便到酒店，相當方便。另外，要出門前往市中心，可以選擇步行約15分鐘，又或在國家博物館站搭4號、10號、7B等電車坐一個站即達。

酒店屬三星級酒店，坐落在住宅區，環境非常寧靜。雖然落成於1912年，完全唔覺老舊，有一座古舊、只能容納三個人的升降機，要人手推門，非常有趣。

二人房間相當寬敞，達四百呎，有枱有椅有梳化，煮食爐具（微波爐、電磁爐、雪櫃、電水壺、杯碟刀叉、洗潔精、砧板等）一應俱全，所以我地每朝早餐都係自家炮製。不過，浴室只有三合一的沐浴液，無牙刷牙膏，亦都無拖鞋。

另外，酒店地庫有獨立芬蘭浴室可以借用，使用時間由晚上5點至11點（在門外的時間表寫上房號預訂使用時間），裡面有毛巾和沐浴用品，非常乾淨，我地用過兩次，體驗芬蘭浴的滋味都唔錯。地庫仲有洗衣機可免費使用，洗衣液則只要1歐元就可以。

值得一提的是，房間唔係日日打掃，只在星期三及六清潔，垃圾和杯碟要自行清理。對我地而言，問題不大。不過，由於我地住12晚咁長，酒店方面卻無提供足夠的廁紙，就算清潔當日都可以忘記提供，結果我地前後四次致電前枱又直接留書，提醒Housekeeping記得留足夠廁紙俾我地，最後仲要寫到明四卷，先真係俾足我地，呢一點其實前枱應該預早跟Housekeeping溝通吧。

酒店最近的景點除左國家博物館外，仲有岩石教堂（即聖殿廣場教堂，芬蘭語Temppeliaukion kirkko，俗稱岩石教堂），步行20分鐘左右亦可以埋西貝流士公園。國家博物館對面就係環境優美的蝶略灣（Töölönlahti），晨運散步之選。再往上行就係奧林匹克體育場，旁有長跑之神Paavo Nurmi跑步英姿的全身銅像。

總而言之，酒店的性價比極高，在赫爾辛基來講絕對值得推介。

Hellsten Helsinki Parliament

地址：Museokatu 18, Eteläinen Suurpiiri, 00100 Helsinki

前往方法：坐電車（4、7A、10）在Kansallismuseo站下車，穿過博物館的庭園再走三分鐘即到。
網址：hellstenhotels.fi/Hellsten_Hotel_Apartments/Helsinki_Parliament