佐敦教會餐廳內嘆六小時悠閒午餐

＊見到呢度白色小閘門，就知餐廳已到啦！

＊餐廳環境好舒適，格局媲美唔少高級餐廳。

＊餐廳樓底極高，座位唔多，午餐時間人較多，未必有位。

＊牆上掛左唔少貓咪油畫，呢張最大張！

＊另外的畫作同樣有貓咪蹤影。

＊餐具自取。

＊午餐時間未到，先來件薑蛋糕配蜂蜜薑茶！

＊餐湯好creamy。

＊我的咖喱雞翼配糙米俅，似住家菜。味道唔太濃，份量剛剛好。

＊食完午餐，我再叫杯凍Mocha咖啡慢慢嘆。

＊傾到三點幾，個肚餓餓地，於是再叫多件檸檬蛋糕。一個字：濃！

事先申報，本人既唔係教徒，亦無任何宗教信仰，純粹無神論之輩，不過在呢間位於在九龍佑寧堂（Kowloon Union Church）內的小餐廳Kuc Space，實在極度欣賞。

難得今日老友有空，又記得早排search過佐敦食肆時，對於Kuc Space有少少印象，一來網上食評對此店一致讚好，二來餐廳環境和格局亦甚為舒適，所以由我決定，試試呢間小餐廳。

今早11點到達，客人極少，我地揀左個靠牆的座位坐下，店員就親切向我地係咪第一次幫襯，然後講解餐廳服務特色：除有專人落單和上菜之外，基本全是自助形式－－餐牌貼在告示板上（附價錢）、餐具和冷暖清水自取、離開前須自行執拾餐具，最最特別之處是呢度唔使埋單（其實指無店員會過來收錢，亦無收銀員在門口），客人自己要計好費用，然後自動自覺將金額放在收錢箱內，找續也如是，完全信任顧客，如此自助模式的餐廳，在香港應該只此一家吧。

由於12點半先供應午餐，我地影完環境相後，決定先叫件蛋糕和飲品當做早餐，然後再吃午餐。結果，我地一傾，就傾左五個小時，午餐食完後，又再叫多件檸檬蛋糕當下午茶，我仲再叫杯飲品，直至下午5點鐘先「收口」，總體而言，食物實而不華，質素唔錯，味道偏淡，感覺好健康。各種食物味道如下：

＊薑蛋糕（20元）：一份兩件，外形樸實，實感稍實似香蕉蛋糕，微帶薑味，很不錯。

＊熱蜂蜜薑茶（12元）：只係微甜，很清，同樣帶薑味。

＊凍Mocha咖啡（25元，兩杯）：朱古力味極濃郁，甜度極低，似有還無，但我同老友都覺得好飲。

＊午餐（50元兩份）：有想餐湯和主菜，不包飲品。今日餐湯有濃濃芫荽味，尚幸我都接受得到；至於主菜都係咖喱配糙米飯－－咖喱雜菜或咖喱雞翼，我食咖喱雞翼，賣相又係好樸實，似家庭式，有三隻，幾腍身。

＊檸檬蛋糕（20元）：午餐後，再叫多一份蛋糕，今次的檸檬蛋糕，檸檬味道超強勁，好醒胃，質感略帶濕，個人鍾意薑蛋糕多些，朋友則愛檸檬蛋糕。

離開前，兩個人計好數之後（202元，即每人101元，實在好抵！），就將錢放落紙盒內，過程完全無人理會，全靠大家自律，實在好佩服！

提提，餐廳只在平日營業，而且只係朝十晚六，要幫襯的朋友要留意啦～

Kuc Space（在九龍佑寧堂（Kowloon Union Church）內）
電話：6428 1461
地址：九龍佐敦佐敦道2號

星期一至五：Ｐ10:00-18:00（星期六及日休息）