由上海體育館站出，去到巴士總站，點知無專車去朱家角
（後尾聽司機話早上九點已走左），惟有轉坐下面架七人車前往，75元來回，抵！
呢架七人車好新淨，坐得好舒服，不過人數太少，
司機等左多一個鐘，先兜到連我地在內的六個人出發前往朱家角。
朱家角商業味太濃，滿街滿巷都是店舖，買的食品和物品都差不多。
相機之下的朱家角都呃到人，但河水其實唔乾淨且有臭味傳出。
呢款江南小粽係北大街以至整個朱家角最多店舖售賣，可惜唔啱我胃口，無試過！
桂花糕、雲片糕、襪底糕、麥芽糖亦係大熱食品，有得免費試食。
試過襪底糕，幾脆口，但最後都係無幫襯。
印有不同古靈精怪語句的錢包幾得意！
同樣印有令人回心微笑語句的漱口盅，充滿懷舊色彩，老友就買左兩個！
阿婆茶樓前身係清代富戶古宅，而家變左酒樓。
酒樓仍充滿古舊陳設。
我地揀左靠河的露天座位，一邊吃家常菜，一邊欣賞河岸風景，感覺都幾逍遙。
遠眺放生橋，看著水中倒影，好似幾乾淨咁，其實衛生情況一般。
成日聽人講上海附近的水鄉風景漂亮，於是第二日揀左最近上海的朱家角逛逛。
網上的資料話可以在上海體育館站（有說上海體育場站）出口有專車前往，我地去到巴士總站，但唔見有朱家角公車或旅遊車；幸好有人兜搭我地，話來回朱家角只係75元，所以上左佢的七人車，連我地只有兩個人，司機想兜多三兩個客，於是一等就係一個鐘，終於等多兩個客，11點出發前往，大約70分鐘車程，終於到達呢個江南水鄉啦！
司機不收錢，只叫我地四點返回停車場即可。由2號入口進入呢個享負盛名的水鄉，感覺真係大失所望，街道左右兩旁全是商店，商業味道極濃，其中的主要街道──北大街，店舖賣的都是一式一樣的食品（棕子、襪底酥、雲片糕、桂花糕、麥芽糖等），同台北九份有得揮！幸好周二遊人不多，可以慢慢逛。經過放生橋，看到兩岸河水，遠觀還可以，但近看河上飄著垃圾，加上陣陣臭味傳來，真的感受唔到水鄉之美。所以我地完全無打算學威尼斯般坐貢多拉遊河，只左逛逛右行行，老友反而對懷舊色彩的紀念品有興趣，最後仲買左一對繡花鞋、兩隻漱口盅和兩盒薑糖。
午後，我地揀左間百年老店──阿婆茶樓食午飯。呢間茶樓前身係清代富戶古宅，而家變為酒家，我地揀左靠河的露天座位，一邊吃家常菜，一邊欣賞河岸風景，感覺都幾逍遙。呢餐家常菜包括鮮肉豆腐、糖醋排骨、油燜茭白（茭白係中國特有的水生蔬菜，與蓴菜、鱸魚並稱為江南三大名菜，口感似笋），味道偏濃，但熱辣辣，好有住家菜feel！埋單只係90元，幾抵食。
吃完午飯，仲有大把時間，結果要重新再行多三兩轉北大街，一直拖拉到三點半左右先返回停車場上車。
以我今次經驗，朱家角唔去其實無咩可惜，就算去的話，連午餐時間最多逗留兩三小時已十分足夠。最搞笑的是，司機回程時居然說朱家角係最唔值得去的水鄉，要去應該去周莊或同里。
朱家角前往方法：
由上海體育館站或上海體育場站坐車前往，需時約70至90分鐘。
沒有留言:
張貼留言