早在出發前一個月已透過電郵預訂左Trolley Bus兩日遊，約我地在Starbucks咖啡店8點半集合，預訂毋須俾錢，我地抵達酒店當日仲會再留口訊reconfirm集合時間和地點，真係好交帶！
八點半，旅遊巴準時來到，司機全韓語對答，幸好有張中文行程表俾我地睇睇，再經其他酒店接集人後就開始東部路線一日遊。
行程極為緊湊，當中雖煞有展銷購買活動，但完全唔強迫好自由：
裡面買各式土特產，價錢當然較貴，
我地行完一圈就算，完全無人叫我地買野！
＊濟州島特產工藝展示場：售賣濟州土特產（濟州柑橘、朱古力、朱古力米通、油菜花香水），我地齋睇無幫襯，幾分鐘後上車離開。
寺泉自然休養林有好多高高的杉樹，樹旁仲有石春路俾人可以按摩腳底，
若慢慢逛遊，至少一兩小時，不過我地只遊半個鐘！
＊寺泉自然休養林：休養林面積超大，四周種滿高高的杉樹，林內有散步小路、寺泉山、荷花池、木工藝體驗場、運動設施、兒童遊樂設施、住宿設施等多樣設施，散步郊遊一流，不過只逗留約20分鐘，我地只近近地逛逛便算。
免費騎馬一個圈！（不過，你若想買佢地專人同你影的馬上英姿相片，
盛惠30,000韓元（即大約210港元）！
＊矮馬牧場＋免費騎馬體驗：濟州出產矮馬，馬匹身高比一般馬細小，巴士團包埋免費騎馬體驗，坐在小馬上慢慢踱著走，幾有趣。馬場安排專人攝影大家的馬上英姿，騎完之後可以買回來留念，不過，30,000韓元一張，我當然無買啦！
一場來到，我地都有參加呢個自費的馬上表演項目，幾精采！
＊蒙古里安馬上表演：呢個係自費活動（18,000韓元），一場來到，即管開開眼界啦！主要係策騎表演，如扮成吉思汗策騎英姿、在馬上表演特技，亦有凌空特技表演，表演者有大人亦有小童，尚算精采。
呢日的免費烤肉餐，真係好超值，
食完鑊裡面的豬肉又或枱上面的冷菜，都可以出去再添！
＊午餐（傳統土種黑豬肉）：自己動手將鑊裡面的辣豬肉炒熟慢慢食，食晒之後可以再出去取，其他泡菜、南瓜等亦係任食，辣豬肉炒熟後，微辣帶甜，拌白飯吃一流，呢餐真係超抵兼好味道！
去到城邑民俗村，好在有普通話人員講解濟州傳統民風習俗，
不過最後又係sell馬骨粉等土產。
＊城邑民俗村：有專人（好在民俗村有普通話導賞員講解！）講解濟州民俗生活和風俗，如摸濟州守護神（土地公公）的某個部位可保佑生男定生女、濟州茅屋點解無煙囪的設計、飼養黑毛豬小趣事、海女食馬骨粉的原因等，都幾得意。最後，當然唔少得展銷產品──馬骨粉、五味子蜜、蜜糖，不過我地都係無幫襯。
我覺得東部線最重點必遊的景點－－城山日出峰，真係好壯觀！
加上藍天白雲綠草，影出來的相片超正！
＊城山日出峰：城山日出峰（韓語：성산 일출봉）是位於韓國濟州島東端的一個火山丘，由10萬年前海底火山爆發而形成，2007年被聯合國教科文組織指定為世界自然遺產。呢個係整日的高潮所在，亦係我最喜愛的濟州景點之一，廿年前曾到此一遊，不過當時係冬天，天氣極冷又大風，實在無心機欣賞。今次風和日麗，藍天白雲，在日出峰山腳已用左唔少拍照時間，加上巴士團只逗留40分鐘，所以我地只在山腳橫行影多幾張到此一遊的靚相。
＊途經宗達海岸道路：旅遊巴沿海行駛，沿途經過東海岸，坐在右手邊可以慢慢欣賞濟州島海岸道路，開闊景觀配上藍天白雲的晴朗天色，超美麗呀！
＊海女博物館：原定行程之一，不過到達博物館停車場時，有團友（韓國人）大聲向司機嘰哩咕嚕講左一大餐說話後，旅遊巴就離開停車場，繼續上路，過其門而不入！好在我都唔咩興趣睇海女，無損失～
玩到日落，在一間餐廳後面下去，感受和觀賞海岸日落景致！
＊東福里漁村體驗場：近黃昏時，旅遊巴停在一間餐廳外，原來係叫大家穿過餐廳落石灘，就當欣賞漁村風光，都幾無聊。我地就在附近石像和亂石堆上影相留念，欣賞快將黃昏的日落景致。
最後，司機收取我地兩日的團費（69,000韓元）＋司機費（5,000韓元）＋馬上表演費（18,000韓元）。下午6點返回酒店附近的Starbucks咖啡店。
Trolley
Bus 巴士團
電郵：tbus@naver.com
電話：1544-4118
