濟州釜山自由行（七）：Trolley Bus西部路線一日遊

早上八點半，繼續在 Starbucks 咖啡店等車，在不同酒店接齊人後就向西部開始出發。然後開始參觀不同景點！

 

3D立體畫有五個館咁多，張張都好吸引， 

搞到我地密密影，差Ｄ連集合時間都錯過呀！

 

呢張 3D 立體畫應該好多男人想行埋去 ！嘻嘻！ 

＊3D 影院和 3D 立體畫：行程寫的明明係冰館，但結果去左睇 3D 影院和 3D 立體畫，不過我地勁鍾意 3D 立體畫，不停擺甫士影疑幻似真的立體畫，難得有五個展館的立體畫（數量夾夾埋埋有幾十張咁多！）俾我地任影，好過癮，係整日玩得最開心的一個景點。

＊神秘道路：又名怪坡，有幾怪？就是睇起來係上坡的地方其實係下坡。司機踩煞車同埋熄掉引擎，大家透過駕駛座的玻璃往前面看，前方明明係不折不扣的上坡路，但沒有引擎動力的旅遊巴，卻在此時開始滑動，幾有趣。  

 

凌空特技和電單車雜耍表演令人嘆為觀止，仲好睇過前一日的馬上表演！

＊雜技表演（凌空特技和電單車雜耍表演）：呢個免費表演活動比尋日的更精采，包括高難度凌空表演、挑戰人體極限的扭腰拗腳動作、最後幾架電單車在大圓鐵籠內的困獸鬥表演，惹來雷動的掌聲和讚嘆聲。

 

小人國自助餐廳的食物選擇唔多，填飽肚已ＯＫ！

我就係食左兩碟都係類似的食物

（魷魚鬚、辣年糕、芽菜、南瓜、炸肉球同埋白飯）！

食完飯，立時遊小人國，點知好鬼大，行極行唔完！

 


＊小人國餐廳自助午餐＋小人國遊覽：呢餐自助餐的食物選擇唔多（切片豬腳、辣魚、辣年糕、南瓜、魷魚鬚、冷麵、泡菜、芽菜、麵包等），純粹飽肚，無任何要求。飯後，去埋旁邊的小人國影相，小人國主題公園佔地6萬多平方呎，分為七個區域，以韓國濟州國際機場為起點，經過意大利的比薩斜塔、美國的自由神像、巴西的耶穌像，到第七區內，連復活島的石像群都有。可惜，巴士團只俾一小時停留，必須要快快手密密影先得！

 

西歸浦軟木橋。盡頭就係鳥島，

繞圈行一周可遠眺西歸浦四周的小島嶼。

＊濟州Olle Road：到達西歸浦港口，停留時間 1 小時1 0 分。由於言語不通，最初以為沿住上橋可以搵到天地淵瀑布，於是急急腳上軟木橋，到達海鳥島，再穿過樹林小徑尋找天地淵瀑布，結果行完一圈海鳥島咩瀑布都搵唔到，後來先知呢段路係俾大家欣賞西歸浦沿海景致、石灘和離岸島嶼（如牛沼端）。唔想步行的話，大可以自費乘坐西歸浦 70 里遊覽船（17,500 韓元），出海欣賞海鳥島、正房瀑布、森島、蚊島、虎島、孤石浦和西歸浦海岸周圍景觀。

 

由望夫崖（孤獨岩）的另一邊遠眺西歸浦軟木橋。

＊望夫崖（孤獨岩）：按司機指示由左至右行一圈，先到達可遠眺剛才的西歸浦軟木橋位置拍照，然後順路前行，經過石灘，最後才到達望夫崖（韓劇《大長今》的拍攝地之一），可惜時間關係，我地無行過去睇望夫崖，只在指示牌上留照便算。

 

天地淵瀑布

＊天地淵瀑布：天地淵瀑布高 22 米，水深 21 米，由樹木茂盛的懸崖絕壁轟然直泄而下，相傳瀑布下的湖底棲息著一尾巨鰻。瀑布周圍風景優美，是濟州島保護自然原形的標本地區。行完瀑布，居然見店舖的朱古力米通大特價（5 盒1 0,000 韓元，不過係 12 粒裝），於是又買番幾盒。

柑橘未熟青ＢＢ！

＊柑橘農園：先在溫室聽專人（韓語）講解，不過牛頭唔答馬嘴，齋眼光光。然後經過柑橘林，可惜柑橘全部青BB，未到成熟期，然後，再聽展銷產品講解，又係韓語講解，完全聽唔明仲好，唔使煩！

 最後，我地只需再俾今日的司機費（每人各 5,000 韓元）就搞掂！返到酒店，已經係晚上 7 點正，玩足 10 個小時，真係抵到無朋友！

Trolley Bus巴士團 

網址：http://tbus.co.kr/

行程介紹和價錢（只有韓文）：http://tbus.co.kr/y_dayt/y_dayt_1.php

電郵：tbus@naver.com

電話：1544-4118