濟州釜山自由行（十一）：濟州蓮洞食住買小貼士

在新濟州市蓮洞的 W Hotel 住左四日三夜，有少少關於蓮洞四周的小總結想同大家分享：

 

呢條就係蓮洞主要大街，大街兩旁好多連鎖咖啡店和購物店舖。

＊酒店林立：W hotel的酒店橫街上好多motel，價錢應該較便宜，而在大街另一邊亦有唔少酒店，最主要地標－－格蘭酒店（Grand Hotel）正正位於新羅免稅店的對面，佢地左右亦有好多酒店，所以要找地方落腳，實在話咁易。

 

寶健路步行街一到夜晚，所有食肆開門，選擇甚多，令人花多眼亂。

＊搵食好方便：W Hotel雖位於蓮洞市中心的一條橫街，但一出酒店轉右就係寶健路步行街，街上超多食肆，中西日韓酒店一應俱全，級數由高至低檔。不過，我建議大家不要幫襯大大隻字寫明歡迎中國同胞的餐館，因為價錢一般較貴，好似鮑魚一碟六隻已叫價40,000韓元（280港元），好似唔多抵！另外，要提的是，蓮洞好多食肆都唔做午市，我地試過中午12點幾想搵間餐廳店午飯，可惜好多未開門，結果只好去咖啡店坐。

 ＊購物選擇唔算吸引：由酒店步出轉右再轉左的大街，就係市內主要街道，亦即格蘭酒店十字街頭，向前行不遠處就係蓮洞商圈周邊，主要買入口的運動品牌如Nike、New Balance等等，亦有唔少化妝品牌店如Etude House、Face Shop等，不過呢度唔似首爾咁狂派sample，我個人覺得唔多吸引。

新羅免稅店距離W Hotel只需十分鐘的腳程，好方便。

＊全濟州最大免稅店－－新羅免稅店：要買化妝品的話，建議直接去新羅，一來免稅，二來贈品亦多，店內經常擠滿左遊客，尤其中國同胞，我地因為下一站去釜山，所以無血拚！

＊土特產店超多：無論在寶健路步街或格蘭酒店十字路口周圍（即沿路步去新羅免稅店的街道），都有唔少土特產店，售賣濟州朱古力、米通、蜜糖、公仔、精品等，不過價錢不及東門市場吸引，如小盒朱古力（五盒裝）要10,000韓元，在東門市場只需5,000韓元，而且亦無免費試食服務呢！

我地在Caffee Bene食的早餐，不錯！

＊咖啡店：跟首爾一樣，呢度的咖啡店好多，不過主要係連鎖式經營，如星巴克外，仲有Mango Six、Paris Baguette Cafe、Hollys Coffee、Caffee Bene等，試過三間水準都唔錯。

蓮洞前往方法：

由濟州機場坐的士前往，車資約 4,500 韓元，即 30 港元左右。