首爾冬遊記（十四）：北村入口咖啡室嘆美味早餐

 ＊後來經好心的年輕人帶路，轉往2號出口方向前行，見小學左轉，

無幾遠就係北村韓國村入口，入口旁就係DooRoo Cafe。

 ＊咖啡室書架放滿書籍，樓底又高，放著音樂，感覺超寫意。

 ＊此店售賣不同國家咖啡，單杯咖啡價錢唔太便宜，動輒6,000至7,000韓元。

＊呢個套餐有厚多士加美式咖啡，足夠兩人份量，只係8,000韓元。

第四天早上，原本計劃第一個站去北村韓國村，追蹤《個人取向》（香港譯為《扮基追女仔》）中的孫藝珍同李民浩的足跡。點知在安國站出錯左出口（應該2號出口經裁判所向前行！），在3號出口上地面，向前行時又偏偏見到類似裁判所的法院，結果見到好多人示威，佢地仲想叫埋我參加添！不過，又係錯有錯著，俾我發現《紳士的品格》的金道振（張東健飾）辦公室－－空間SPACE，仲順便在昌德宮的門外留影。

及後經好心的後生仔帶路，教我地應該由2號出口向上行，到達小學時過馬路左轉，見小藥店就係北村韓國村的入口。

入口的另一旁有間書香味極重的咖啡室－－Dooroo Cafe，正係吃早餐的好地方。全店的書櫃放滿書籍，燈光柔和，樓底好高，感覺好舒服，最正係只有我地兩個客人，包晒全場，影乜都得！

我地揀左一個套餐（Double Toast + Amercano）兩個人吃。厚多士即叫即烘，雖然等得耐少少，但奉上時超熱辣辣，咬落好鬆軟，配埋士多啤梨果醬和忌廉同吃，好好味，在香港未食過咁好味的鬆軟熱辣的厚多士呢～好在係兩人同吃，否則真係食唔晒。至於美式咖啡亦不錯，不過唔知點解唔一併送上沙糖同奶，要我開聲先有，難道呢度興飲齋啡？！

呢餐早餐真係好好味，埋單8,000韓元，一點也不貴，值得推介俾大家。

Roasting Factory DooRoo Cafe
地址：首爾特别市鍾路區嘉會洞 64-1（地鐵安國站2號出口，沿著裁判所前行，在北村韓國村入口，好易搵！）