濟州釜山自由行（一）：濟州遊玩貼士

濟州島著名的土地公公，隨處可見！

早排贏左釜山航空雙人來回韓國機票，於是相約老友第三次遊韓國。機票可以前往首爾、釜山或濟州，我地今次搞搞新意思，先玩濟州，再玩釜山，凌晨（ 2 點幾）出發，凌晨（12 點幾）回港，玩足 6 天，加上老友投桃報李，幫我出埋機場稅，所以今次我只係俾酒店錢和使錢，實在太超值啦！

上次遊濟州已經係 20 年前的事，而且跟團關係，咩都唔使理。今次就自由行，仲要停留三日半時間，所以都上網做過資料搜集，當中有值得同大家分享的地方：

＊住近濟州市較為方便：機場在北面，無論前往新舊濟州市都好方便。若住新濟州的酒店，從機場坐的士只需 10 - 15 分鐘車程；好像我地住的 Hotel W Jeju，車資只係 4,000 韓元左右（約 30 港元）。而由我的酒店坐的士去舊濟州市的東門市場、黑豬肉一條街、地下街等熱門景點，都只係15- 20分鐘左右，車資只係 6,500 - 7,000 韓元（約 50 港元）。

Trolley Bus 旅遊大巴，好舒適！

 ＊Trolley Bus 巴士團超抵玩：若唔識駕車，又唔識睇韓文坐穿梭巴士，跟 Trolley Bus 巴士團就最抵，一天團約 39,000 韓元，兩天團 69,000 韓元，加埋每日司機費 5,000 韓元，合共 79,000 韓元，折合唔使 600 港元，包晒兩日的門票、車資和午膳（自費活動就另外收費，不過每日只有一個，而且可以選擇唔參加！），就可以玩到東部和西部唔少景點，真係好超值！（當然，若停留多於兩天，可以自己再安排其他心水景點遊玩，我就去埋舊濟州市和Love Land，所以好充實！）

Trolley Bus巴士團 

網址：http://tbus.co.kr/

行程介紹和價錢（只有韓文）：http://tbus.co.kr/y_dayt/y_dayt_1.php

電郵：tbus@naver.com

電話：1544-4118

*（可用英文透過電郵預訂，不用即時付費。參加第一天行程接近結束時，司機會一併收取兩天團費另加首天的司機費。第二天時，另一位司機只會收取當天的司機費。）

＊坐的士出入：由於市內巴士或巴士站都只有韓文，而且唔知班次如何，所以在市內遊走，最方便就係坐的士，十零分鐘車程約幾千韓元，好似我地在新舊濟州市穿梭都只係 6,000 韓元一程左右，折合只係 40 幾港元，慳番好多時間。

＊東門市場買手信最抵：濟州必買手信包括柑橘、蜜糖、朱古力和米通，建議去舊濟州市的東門市場購買，既便宜，選擇又多，仲有得試食，大盒朱古力約 10,000 韓元四至五盒，送禮自用都咁得體。

 
＊外幣找換（市內找換店的匯價較理想）：我地周日到達濟州，銀行唔開門，好在酒店職員教我地新羅免稅店附近的找換店兌換韓元，兌換率約 1 港元：138 韓元，匯率普普通通，唔算太吸引！不過，已經俾濟州機場高好多啦！所以大家如非必要，不建議在機場換錢！（後尾我地在釜山光復路的小小找換店，兌換率約 1 港元：140 韓元，抵多Ｄ！）