*呢架俄羅斯號列車，載住我地由伊爾庫茨克前往莫斯科，
車程需時75小時，停靠多個車站。
*火車的頭等車廂是兩人包廂，左右兩張床，既係床（右）又可以做座椅（左）。
*火車由最底部的海參崴出發，經過幾十個站到達最上面的莫斯科為止，
各站有不同的停留時間（由2分鐘到30幾分鐘不等）。
*頭等車廂共9個二人包廂，共用兩個廁所。
乘務員經常清潔，廁紙、抹手紙和消毒酒精紙巾從不缺供應。
*每人免費奉送黑朱古力一排、兩個茶包、一粒糖、一小包沙糖，另加一樽水。包廂內仲各有兩條白毛巾和一對拖鞋。
*車廂有杯麵、零食和紀念品發售，熱水機免費供應槷水。
*頭等車廂內的走廊盡頭上方有顯示莫斯科時間。
*全程唯一免費的一餐，圖為二人份量，味道普通。
*餐卡唔多人。
*餐廳供應的雞扒和豬扒即叫即整，比想像中美味，大家讚不絕口。
*火車靠站的時候，最好就落車鬆一鬆，順便在月台買零食，
圖中雞脾170盧布，約港幣22蚊。
*月台上的小食店擠滿人。
*火車經過的窗外風景。
來到行程的第七日，終於登上由海參崴（也稱符拉迪沃斯托克，Vladivostok）開來的俄羅斯號列車。列車發車時間為11:14（UTC+3），後來才知是莫斯科時間，而伊市則比莫斯科時間早5小時（UTC+8），因此我地是在下午4點14分登車。登車前，乘務員會查看車票和護照，故此上網買票時記得要填寫正確的個人資料。至於車票其實毋須在站內列印實體票，只要直接列印在官網購買的A4尺寸的eticket也可以。
我地住的是頭等車廂，二人包廂，每位車費約為港幣3,800多元，全卡合共9間房，共用兩個廁所。上車不久，乘務員會收回我地的車票,然後派發一排朱古力、兩包茶包、調味料、塑膠餐具。包廂內則有兩條毛巾、拖鞋、牙膏、牙刷等日用品。走廊盡頭仲有小食發售和熱水供應。
最初購票時以為repaid one meal是指全程包餐，後尾才知只包一餐咁大把。晚上8點幾，乘務員就會叩門問我地明天想吃甚麼做午餐，就係全程免費的一餐。翌日送來時，就係各人有兩條雞肉腸加糙米飯、兩個麵包以及扎肉沙律和水果，整體味道好一般，但勝在飽肚。
雖然在包餐的理解上擺左烏龍，幸好大家早有準備，既買左足夠水果、蛋糕仔、薯片，亦帶左幾包即食麵，加上奉送的朱古力，基本上都唔太擔心肚餓。就算肚餓得緊要，大可買個杯麵頂肚，75盧布有交易。不過為左見識餐卡，我地揀左一日去食午餐。主菜加埋配菜如薯仔，約港幣六七十蚊，價錢算相宜，我食的雞扒加薯仔，味道唔錯，既夠熱又煎得香口，朋友們對煎豬扒亦滿意。
事實上，75小時除左睡覺、開餐、手機上網（由於火車穿越的多是樹叢森林荒郊，好多時都斷線）、睇書、呆躺放空，時間唔算太難過，最開心的當然係落車放風的時間，每當到達停靠時間超過15分鐘的車站時，大家就會齊齊落車鬆一鬆，順便買隻雞脾、烚蛋、雪糕等小食。
最有趣的是火車在4日3夜會跨越5個時區，每天起身便會發現手機（隨著時區變化而自動調節）和手錶（香港時間）的時間出現誤差，有時慢一小時，有時就慢兩小時，到達莫斯科時，手錶已較手機足足慢左5小時。
值得一讚的是，車廂非常乾淨，乘務員每隔三兩小時就會清潔或執整廁所，廁所無異味之餘，仲有廁紙、抹手紙和酒精濕紙巾供應。他們每朝又會在走廊及房間吸塵，整體來講，衛生情況好令人滿意又放心。唯一要忍受的就係無得沖涼，惟有每日用濕毛巾抹身就當沖涼啦。
由6月27日下午4點幾出發，終於在6月30日下午2點幾抵達莫斯科火車站，順利完成西伯利亞鐵路4日夜之旅。
俄國鐵路局官方網頁
*部分網友會教大家到火車站後換實體車票，其實大可不必，只要列印在官網購買的etickets，憑票即可登車。
*所有車票的出發和到達時間均為莫斯科時間（UTC+3），即比香港（UTC+8）或伊爾庫茨克（UTC+8）慢5小時。
沒有留言:
張貼留言