＊同朋友一人一個蛋糕套餐，各盛惠三十大元。
＊右面靠窗座位望街景，好舒服，可惜一早俾人坐左。
＊咖啡室內有好多嘉頓產品，售價較超市便宜。
＊每日有新鮮出爐的麵包，我地星期五係菠蘿包。
＊下午茶套餐主要係蛋糕、餡餅同多士，再配飲品。
＊蛋糕櫃有唔同種類的蛋糕選擇。
＊朱古力手指餅係嘉頓經典產品之一。
＊以前一直唔知嘉頓呢座大廈有咖啡室俾公眾享用。
睇雜誌，知道深水埗的嘉頓廠房居然有間開放俾公眾人士的咖啡店，裡面的下午茶非常抵食，二三十蚊就有蛋糕或多士配飲品。
我地大約下午四點左右到達，咖啡店都有十幾廿人，座位唔多，靠窗的梳化位更加少，結果我地只係搵到裡面搭枱的座位。由於沒有侍應服務，採自助形式，所以要自己去收銀處落單俾錢，然後等叫號碼再去取食物。下午茶套餐有十多款選擇，都係蛋糕、餡餅同多士，奉送飲品（咖啡、茶或朱古力），單項20元，套餐30大元，當然揀套餐啦。
我的係白酒檸檬芝士蛋糕配熱朱古力，芝士餅雖然好多cream，但唔heavy，似海綿蛋糕，無白酒味，檸檬同芝士味輕柔唔漏，不過餅底就腍身唔算好味，熱朱古力當然係即沖，不過以30元的價錢，絕對食得過。朋友話佢的Tiramisu芝士蛋糕亦不錯。於是我地一坐就坐左個幾鐘，近6點才離開。
咖啡店裡面有好多嘉頓產品，售價比超市賣的便宜少少，大家不妨順便買回家啦！最後我仲買左四塊裝穀麥麵包（6元）回家做第二日的早餐。上網做埋嘉頓會員，仲有9折添。
嘉頓咖啡店
地址：深水埗青山道58號嘉頓烘焙中心地舖（深水埗港鐵站D2出口）
電話：2720 1055
營業時間：星期一至日8:30am -6pm
最低消費：$20/位
