淡季新加坡遊（七）：3D Alive Museum人多畫唔靚

＊呢隻黑貓的畫功，跟曼谷分館的大黃貓，實在無得比！

＊呢間分館好多細路仔的畫作，但唔太吸引。

＊開館的首個小時，整個館充斥著呢班近百人的幼稚園大軍，場面一度混亂。

＊畫作色彩唔太繽紛。

＊新加坡特色畫作，但又唔夠立體。

＊新加坡愛來魔相藝術館（Alive Museum）在Suntec City的三樓。

今個行程另一個重點活動就係去3D Alive Museum影下趣怪得意的3D畫。繼濟州、首爾、曼谷之後，今次係我同老友第四次玩轉3D立體館啦！

搭地鐵到寶門廊（Promenade）地鐵站，在Suntec City（新達城）出口即達商場入口，非常方便。呢間新加坡首家Alive Museum於2014年6月12日開幕，位於商場的三樓，分為幻覺藝術、數碼藝術及物體藝術三個主題區。

我地在十點前到達，未開門已見數以十計的幼稚園學生排著隊已心知不妙，但一場來到無理由離開，結果迫於無奈跟幾十名過度活潑的幼稚園學生爭影立體畫，場面混亂又嘈吵，實在大打折扣。事實上，館內的立體畫部分跟曼谷和首爾的相同，只有新加坡區內的幾幅係只此呢家，可惜整體的畫功質素唔太高，簡直同曼谷的無得比，既無超級大畫，也畫得唔夠細膩，兼且唔夠乾淨和整潔，整個館無一張畫作令我地覺得好難忘。價錢方面，呢間的入場費卻是四間之冠－－新幣25元，折合近港幣150元，實在唔多值得呢！

影完立體畫，我地到商場地庫的Food Republic食午餐，兼且順便去Giant超市逛逛。結果在超市內，俾我同朋友發現美國拉麵控網站《The Ramen Rater》選出全球前十大好美味的即食麵之一－－馬來西亞的MyKuali檳城福建蝦味麵，買四包裝仲免費送多兩包，真係喜出望外。

新加坡愛來魔相藝術館（Alive Museum）

地址：新達城購物中心（Suntec City Mall）三樓

電話：（+65）6738 3338／6738 9897

開放時間：10:00am-10:00pm 最後入場時間為9:00pm

前往方法：寶門廊（Promenade）地鐵站（環線 CC4）Suntec City出口即達

淡季新加坡遊（一）：四日三夜行程安排

＊新加坡夜景好璀璨！

＊小印度區內的印度廟。

＊繼曼谷3D立體館之後，再衝擊新加坡分館，可惜畫功麻麻。

＊烏節路上的商場，是必遊的景點之一。

忙完幾個月，趁淡季又約老友出埠嘆世界，今次目的地係新加坡。呢次係我首次用Expedia.com.hk預訂四日三夜旅遊套票，坐國泰機（出發： 14:30，回程：12:45），時間唔算好，實玩兩天，但入住烏節路地鐵上蓋新四星級酒店，連稅每人只係2,933元，實在超級抵玩；而且我地在四年前去過一次，今次其實唔使去好多地方，主要想去濱海灣花園（Gardens by the Bay）同4D Alive Museum兩個新景點，其餘再行行上次無去過的小印度同武吉士兩個區。今次行程大致如下：

第一天：晚上抵Somerset站上蓋的Hotel Jen Orchardgateway（入住：Hotel Jen Orchardgateway）

第二天：閒遊小印度（Little India站）＞午餐（返回Somerset站上商場嘆とん吉 Tonkichi）＞酒店暢泳＞濱海灣花園（Bayfront站）（入住：Hotel Jen Orchardgateway）

第三天：3D Alive Museum（Promenade站）＞閒遊武吉士（Bugis站）＞濱海灣花園（Bayfront站）（入住：Hotel Jen Orchardgateway）

第四天：離開酒店＞抵機場嘆Killiney Kopitiam咖央多士早餐＞回港