珠海澳門遊（三）：竹林酒店內品嘗潮州菜

 蠔仔烙

 雲耳百合銀杏

焗蝦煲

 老火湯（菜乾煲豬肺湯）

潮濠的室內設計比我地住的酒店中菜廳好好多，明顯走高檔路線。

黃昏時分，我地坐的士去酒店服務員提議的蓮花路口，大約十幾分鐘車程便到達呢個商業區。可惜賣的都是地道服飾和街頭攤檔，方圓四周都無乜商場可以行，食店更加少。為穩陣起見，我地去左竹林酒店內的中菜廳－－潮濠酒家食晚飯。

由於唔知菜式的份量，結果叫得太多，浪費左唔少食物：

蠔仔烙：以為潮州小吃，應該份量唔大，點知成塊蠔仔烙大過自己個頭，炸得好脆口，蠔仔亦肥美無沙，不過實在太大塊，最後食剩三分一。

焗蝦煲：蝦用胡椒焗，食落好香胡椒味，而且蝦殼焗到好脆和軟身，食埋落肚都得。

雲耳百合銀杏：最清的一碟小菜，味道亦唔錯。

老火湯（菜乾煲豬肺湯）：服務員最初話例牌份量應該大約一個人飲到兩碗左右。點知上來的是一個煲，我接連飲左四碗，仍然飲唔晒。加上剩番好大煲湯渣，實在好浪費。

埋單296元人民幣，價錢略貴。

竹林酒店潮濠酒家
地址：廣東省珠海市拱北水灣路121號 519020 （原名Popoko Hotel） (拱北商業區) 

珠海澳門遊（二）：酒店嘆茶當午餐

甜粟叉燒腸

左起：馳名香茜餃，相思紅豆糕同埋皮蛋瘦肉粥

蟹子燒賣皇

 鹹蛋煮冬瓜

午飯時間，客人都幾多，而且冷氣又唔多夠涼，

加上有好多檯的人都抽煙，感覺幾麻麻。

checkin後，稍事休息，就落去酒店大堂旁的中菜廳－－富麗宮食午餐。

午飯時間，客人都幾多，都幾嘈吵，而且冷氣又唔多夠涼，加上有好多檯的人都抽煙，感覺幾麻麻。

我地點左幾款點心，居然水準唔差：

＊馳名香茜餃：肥大飽滿，餡料好足，香港應該食唔到。

＊蟹子燒賣皇：話燒賣皇，但賣相好普通，只係咬落去，除左有豬肉，都有蝦肉，普通啦！

＊甜粟叉燒腸：腸皮好薄，粟米同叉燒份量剛好，不錯。

＊皮蛋瘦肉粥：粥底綿滑，唔杰身，皮蛋略嫌少左Ｄ。

＊鹹蛋煮冬瓜：好大碟，當消暑菜，但真係食唔晒。

＊相思紅豆糕：賣相唔算太好，但食落好有懷舊糕點的咬口，而且唔甜，紅豆亦多，值得推介。

埋單，兩人合共115元人民幣，價錢合理。

珠海昌安假日酒店富麗宮酒家
地址：廣東省珠海市香洲區拱北粵海中路2130號珠海昌安假日酒店 (拱北商業區)

珠海澳門遊（一）：珠海昌安假日酒店宿一宵

酒店外貌似三星的小酒店。

大堂設計富麗但唔堂皇，屬於老式的設計。

軟腍腍的床鋪，訓落的確好舒服。

有平面電視和電腦，仲有免費WiFi供應，值得一讚。

浴室毛巾分兩種顏色，好貼心。

企缸旁有熱毛巾管道，不過我地無用過。

趁老友放星期一，相約老友短遊兩天。由於澳門酒店房租近年加到飛起，我地惟有選擇珠海入澳門返的酒店套票。由於決定得倉卒，只剩下呢間自己心水以外的酒店選擇－－昌安假日酒店。

由於並非自己首選的酒店，所以唔敢有好大期望。不過，反而有驚喜！首先，落左碼頭，突然落起超級大雨，接我地的司機亦因為無帶遮，冒著大雨，全身盡濕去十九幾里路取車再返回碼頭接我地，上車見到佢落湯雞的模樣實在替佢擔心！

大約坐半小時的車程，便到達酒店。的確，酒店四周完全無食肆，只有一間老舊小士多。酒店雖然聲稱五星，但外貌亦似三星左右的格局，大堂則扮富麗堂皇，實質老套的設計。

上到房間，擺設卻算新穎，只少用平面大電視，亦有電腦和免費WiFi提供，兩張單人床軟腍腍，甚為舒適，最值得一讚的是浴室的毛巾簇新之外，更分為粉黃和粉紅兩色，等兩個人各取其色，唔會用錯！企缸的玻璃趙門亦唔會在沖涼後出現滲水情況，花灑水力亦足。唯一係房間的窗用白紙封上，看不到外面的景色。

老友事後表示，呢間酒店俾九十分，原因係張床令佢好好訓。另外，大堂服務員也禮貌周周，而且服務盡心，試過在交更時替我地截的士，截左足足半小時，仍努力不懈，精神實在可嘉！

事實上，呢間酒店連早餐及來回船票只係合共1292元，若要住澳門酒店，至少加一倍錢先可以交易。

後記：由於酒店與拱北關口以及商業區有少少距離，需坐的士出入，不過就不用跳錶，大約10元即可。

珠海昌安假日酒店
地址：廣東省珠海市香洲區拱北粵海中路2130號 (拱北商業區)
網址：www.zhcahotel.com/HOLIDAY/index.asp