美荷樓係現時香港碩果僅存的「H」形7層徙置大廈，獲評為二級歷史建築。
甫進生活館，即見大大張黑白照片做的牆紙好立體，
仲以為真係有班細路坐在地下。
地下一層，圖文並茂讓你重溫半世紀的歷史，
當中仲展示左唔少舊玩意、唱片封套、報紙等。
最盡頭貼上呢張超大張黑白照片，久違了的無冷氣雙層巴士！
細個時，見過家姐用的打字機。
二樓展出好多老舊的實物，呢個係廚房，設有火水爐。
上世紀五六十年代的糧油雜貨舖。
有隔格但無門的茅坑！
舊日徙置區單位內的陳設。
mini store同樣充滿懷舊色彩！
呼吸冰室的一角。
趁有空檔時間，專程到深水埗美荷樓一遊。
中學讀地理時，曾教過上世紀50年代石硤尾大火，然後政府開始興建徙置區安置災民的歷史，今日終於有機會睇到徙置區的真身－－美荷樓，感受當年居民的生活環境和面貌。
睇番資料，知道美荷樓就係1954年興建的首批徙置大廈之一，該批大廈每座樓高六層，用作安置1953年12月25日石硤尾大火中失去家園的災民。現時美荷樓除變身成為青年旅舍之外，仲設有兩層的美荷樓生活館，裡面珍藏左好多半世紀的舊事舊物舊相片，地下一層圖文並茂講解徙置區的興建歷史，其中好多黑白舊照片同埋古老玩意，見到當年的鬥獸棋飛行棋超人公仔紙，統統都係伴著我成長的兒時玩意，好值得緬懷。二樓更展出舊日徙置區內的單位擺設，由50年代一直演變到現代，茅坑火水爐碌架床衣車五桶櫃糧油米舖等，雖然我未住過徙置區，但有部分用品都係我兒時見過或用過的物件，感覺幾親切。最搞笑就係邊行邊參觀時，經常聽到參觀的中老年師奶話當年之餘，居然為左邊個記錯邊個記啱而鬧得面紅耳熱！
行完兩層的生活館，也順便逛埋mini store，裡面擺設同樣充滿舊日情懷，除左有一般日用品之外，仲賣埋懷舊小食、玩意和明信片。mini store的對面，係呼吸冰室，座位好多，布置又係好懷舊，售賣快餐食物，40至70元左右一個餐，咖啡由29元起，仲有All Day Breakfast（不過供應時間由下午2點開始）。若唔嫌價錢略貴的話，都係一個幾好hea的地方。
坐下又行下，免費消磨兩個鐘，就可以重溫50年的歷史，好划算！
美荷樓
地址：九龍深水埗巴域街70號 (港鐵深水埗站B2出口)
開放時間（美荷樓生活館開放時間）：星期二至星期日及公眾假期，上午9時30分至下午5時；免費入場。
查詢：27881638
網址（YHA美荷樓青年旅舍）：http://www.meihohouse.hk/chi/
沒有留言:
張貼留言