偷得浮生西貢遊

西貢碼頭旁泊滿售賣生猛海鮮的艇家。

生猛海鮮排排放好整齊。

向對面海村進發。

趣怪的名字：對面海村！

由對面海村向上走，居然見到一幢老舊的大廈，

叫和發樓，唔知係咪公屋來的呢？

由對面海新村（另一條村）俯瞰，風景好正！

折返碼頭，黃昏時分，遊人極少，超難得！

中午在和記餐廳食的套餐，前係魚香茄子，後係香茅豬扒，好味！

另一款的琵琶豆腐，熱辣辣整好，豆腐外皮仍然脆口！

下午茶則轉戰碼頭旁的Sai 2餐廳，最適合慢慢欣賞碼頭黃昏景致。

趁天朗氣清，相約兩個朋友閒遊西貢半天，感覺真係超爽！

先在西貢市中心的和記餐廳，食左個中式套餐做午飯，分別叫左琵琶豆腐、香茅豬扒同埋魚香茄子，奉送例湯同熱飲，三個小菜都係熱辣辣即整，覺得琵琶豆腐整得最有驚喜，豆腐外皮仍脆且熱，一般酒樓整得都係濕濕腍腍的，無咁香口，至於香茅豬扒同埋魚香茄子亦做得唔錯。埋單合共126元，每人四十零蚊，抵！

醫完肚，兩個西貢地膽帶路下，左行行右逛逛，穿過對面海村再往上行，去到對面海新村，景觀好開闊，居然可以居高臨下睇到泊滿遊艇的灣畔靚景，仲可以遠眺碼頭風光，兩個地膽都係第一次條對面海新村，同樣覺驚喜！

沿石級下村，向碼頭方向閒逛，星期二的午後，遊人唔少，路路暢通，行得好舒服。一邊吹水，一邊影相，一邊觀賞停靠碼頭邊的艇家售賣生猛魚獲，真係好享受。

然後，我地揀左間碼頭旁的餐廳Sai 2食個下午茶，我的西多士配凍檸茶，連埋加一都只係43蚊，可以一邊繼續吹水，一邊欣賞碼頭風景，慢慢睇住太陽西沉，西貢半天遊話咁快完成！