＊兩張床，一張六呎，一張三呎，真係三個人住都好闊落。
＊房間放左兩張床之外，仲好多地方放行李。
＊梳妝檯的左面，居然有鬚後水、潤膚露之外，仲有衛生巾和避孕套，真係應有盡有，不應有的都有埋，真係唔簡單。
＊浴室好多，有企立式花灑外，仲有一個淺淺的按摩浴缸，我用作企缸，不過水力可以有改善空間。（注意：沖涼液、洗頭水、護髮素大大支任你用）
＊每朝早落二樓的Service Room，自己整早餐，
我地日日各食兩隻煎蛋，真係夠晒營養。
＊多士加煎蛋，再加一杯咖啡，真豐富。
食完呢輪，我再食多兩塊麵包。日日食八塊麵包，酒店蝕晒皮。
＊自助咖啡機有幾款咖啡任揀。
＊左面就係酒店的招牌，唔係好大，認住對面的 Hotel 42st 就知已達門口。
＊由西面站 7 號出口經酒店後面呢條街一直走到盡頭，再轉左行多100 米就到。好似幾遠咁，但其實呢條街好多食店，晚上仲有流動攤販，非常熱鬧。
＊樂天酒店及樂天百貨的後街其實係一條櫻花街，
可惜到達時，櫻花差不多落晒，只見遍地花瓣。
由於只買機票，酒店要靠自己上 Agoda 酒店網 搵。我先睇過 bloggers 的建議，鎖定左西面站的幾間酒店，再睇睇各方遊客的住評，發覺 Goodstay Queens Motel（後尾睇觀光局資料先知，Goodstay 係文化體育部觀光部與韓國觀光公社所指定的優秀住宿品裨，旨在培育提供優質服務，韓淨設施與合理價格的中低價住宿。）的位置鄰近西面站樂天百貨後面的一條橫街內，坐機場巴士第一個站──樂天酒店即到（只需20分鐘），下車後在酒店的右面第一條大橫街直落200米左右，在 Hotel 42st 對面，好易搵。
講真，酒店的外觀實在不敢恭維，好似招待所格局，二樓的前台又細又黑沉沉，負責的大叔或阿珠媽完全似家庭式經營，英文唔太靈光。不過，經過幾日的交往，發覺佢地好helpful又親切，真不錯。
不過，呢間汽車酒店真的幾搞笑，好多有趣經驗可以跟大家分享：
＊不用登記個人資料：我列印左 Agoda 的酒店 Voucher 俾佢地之後，阿珠媽唔會核實我的身份，又唔使我填寫個人資料！第二朝，正當我請教大叔wifi問題時，見有兩男一女要求入住，都係十來廿歲，由其中一個高大男問大叔房價，只見大叔講完個價錢，高大男即擦卡即最門匙，另一個男的守候在女的旁邊，而女的就笠住帽遮著自己塊面，三個人都帶有酒氣，好詭異！唔通…..
＊退房唔使去前台：酒店唔使填個人資料同按金外，退房時亦唔需要去二樓的前台，只需將門匙放在 Lift 內的 box 即可，真係大家講個信字！可能係方便某Ｄ住客吧？！不過，我見前台裡面有十幾部CCTV，大叔雖然有時行開行埋，但都會留意 CCTV 的動靜，而且搭 Lift 上房時，無論按左邊一層樓，都會先在二樓停一停並打開 Lift 門，方便大叔睇下有無白撞客卦！
＊住客人種千奇百怪：畢竟係汽車酒店，除左見有酒氣的韓國男女外，又見到兩個日本婆婆、年青單女、外國夫婦（朋友同人地傾過，原來係西班牙來的）等，無論年齡和國籍都好多元化，可能呢度真係好方便吧！
＊設備齊到你唔信：雖然呢間酒店似舊式招待所，但設備相當齊全，應有盡有（如牙膏、沖涼洗頭用品、毛巾、拖鞋、電視機、電腦（但browser只支援韓文）、風筒等）都有，不應有的也有（避孕套同衛生巾都有！二樓甚至有大量影碟可以租添！）。最正係訂房時不包早餐，但原來每朝早可以去二樓的 service room 內自己整早餐，有麵包、雞蛋、咖啡、橙汁、果醬、牛油等任食任飲，不過全部要 self-serviced，結果我地每朝早每人食兩隻煎蛋加四塊多士，再配杯咖啡，真係好滿足！而且日日只得我地兩個使用service room，想整幾耐就幾耐。最後將用過的餐具和垃圾放在指定的位置，然後離開即可！
另外，八樓仲有洗衣機和洗衣粉免費使用，朋友在二樓向大叔查詢時，大叔直頭俾佢用二樓的洗衣機連乾衣機，同樣係免費！真係無得頂！
＊房間超大間：雖然房間有點舊和暗沉，但極為闊落！我地住的係兩張雙人床的Twin bed，面積尤其大，其中一張床有 6 呎闊！另一張就 3 呎，放左兩張床後，房間仍好鬆動，仲有埋洗手盆添！浴室亦好大，既可以企著沖涼外，也可以浸下浴，不過，按摩浴缸太淺，都係當企缸算啦！
唯一要彈的係酒店或房間的 Wifi 唔穩定，成日 connect 唔到，要扣少少分。其他各方面都唔錯！尤其四周愈夜愈熱鬧，酒店附近的橫街又係行車的街道，就算一個女仔返酒店都唔驚，絕對值得向大家推薦！
地址：釜山釜山鎮區（515-55, Bujeon2-dong, Jin-gu）西面站
房價：雙人房三晚連稅約 1,210 港元，即每晚每人只需 200港 元（Agoda 訂房價）
網上訂酒店：Agoda 酒店網
前往方法：
1. 坐釜山／西面／南浦站方向機場巴士：在第一個站──樂天酒店下車（只需20分鐘），下車後在酒店的右面第一條大橫街直落200米左右（在 Hotel 42st 對面），好易搵。
2. 搭地鐵：若坐地鐵可在西面站 7 號出口，在第二條斑馬線過對面街，見Etude House 轉左，行到盡頭再轉左，步行多 100 米即到。又或在地鐵站內經地通道往樂天百貨乘搭電梯出地面，向後街方向行，亦好方便。
備註：樂天百貨兼酒店後街，亦是我地必經之路，其實係一條櫻花街，可惜我地去遲左少少，櫻花已近大半落下，否則應該好靚。
沒有留言:
張貼留言