首爾冬遊記（十六）：坐南山纜車上N首爾塔

 ＊在街頭離遠就見到升降機的所在！

 ＊幾分鐘時間便可以到達南山纜車，超方便。

 ＊遊人唔多，一架纜車載唔滿，即時登山去。

 ＊沒有櫻花也沒有樹葉的枯枝映襯下，Ｎ首爾塔另有一番景致。

 

 

 

＊戀人們的一把二把愛情鎖，好多都生晒鏽，始終都係經唔起時間的考驗！

何必徙埋Ｄ無謂錢呢？

＊到達展望台，360度的透明玻璃設計令到每個角落都可以清楚欣賞到首爾全貌。

 ＊首爾全景清晰可見。

＊呢條應該係漢江。

繼續探訪首爾韓流地標，今次的目的地係韓劇最熱門拍攝地之一的N首爾塔。

雖然《我的名字叫金三順》最後一集金宣兒同玄彬在「三順台階」中有接吻的浪漫場面，但要我行111級長命石級，真係咪搞！故此，我地捨難取易，由地鐵明洞站4號出口，往前直走到新世界百貨旁的十字路口，然後進入新世界百貨斜對面的大路，不遠處就係南山玻璃傾斜升降機，唔使三兩分鐘即到纜車站，快捷方便！

再乘坐南山纜車，參觀當日係周二兼且係中午時分，遊人唔多，等幾分鐘即可登上纜車。大約12分鐘的車程，便到達山頂。山頂平台除有八角亭之外，四周仲有好多堆滿愛情鎖的地方，可惜好多愛情鎖已經生晒鏽，可見年月久遠，亦印證愛情都係經唔起時間的考驗！（哈哈！）

N首爾塔的N為南山(Namsan)的第一個字母，也有全新(New)的涵義。塔高236.7公尺，建於海拔243公尺山上，加上塔身更高達至480公尺，正是觀賞首爾全景的最佳地方，亦係好多韓劇的拍攝勝地。

購買N首爾塔的門票時，因為出示韓國購物節的優惠券，所以有9折，兩個人慳番1,800韓元。甫進入口，即被工作人員拉埋牆邊強行拍照，原來係將我地個樣退地Key首爾塔日夜背景之中，兩張相合共要15,000韓元，真係唔值，所以我地無買，亦唔多見人購相。到達展望台，360度的透明玻璃設計令到每個角落都可以清楚欣賞到首爾全貌。日間景致雖然唔及夜景璀璨，但午間參觀勝在遊人唔多，而且可以清晰見到漢江，以及江南、江北的分界和特色，都算唔錯啦。展望台仲有一個角落係俾人寄Love Letter，只見唔少人埋頭密密寫，真係佩服佢地咁溫馨同埋咁有閒情逸致！

南山纜車及N首爾塔前往方法：
由地鐵明洞站4號出口，往前直走到新世界百貨旁的十字路口，然後進入新世界百貨斜對面的大路，不遠處就見到南山玻璃傾斜升降機。（由地鐵口至升降機大約五分鐘左右腳程）

南山纜車費用：
成人：來回8,000韓元；單程$6,500韓元

南山纜車官方網站：
www.cablecar.co.kr

N首爾塔費用：
成人：9,000韓元 ( 出示韓國購物節優惠券有九折優惠 )

N首爾塔官方網站：
www.nseoultower.co.kr

下載韓國購物節2013優惠券：（至到2013年2月28日）：
http://www.koreagrandsale.co.kr/global/cts/view.do?pcode=GTS003&uId=7&menuNo=110452&lang=zt