曼谷寫意遊（九）：掃盡海味乾貨芒果零食

＊去柯多哥市場（Or Tor Kor Market）的最大目標係買呢種又大又甜的

「腩毒賣」芒果。每公斤300銖，唔便宜架～

＊「腩毒賣」芒果的個頭超大，大過隻手掌，太吸引啦！

＊柯多哥市場（Or Tor Kor Market）非常乾淨整潔，絕對值得一遊！

＊柯多哥市場（Or Tor Kor Market）有各式各樣時令熱帶水果，梗有一款合你心意。

＊柯多哥市場（Or Tor Kor Market）仲有唔少乾貨零食發售。

＊柯多哥市場（Or Tor Kor Market）就在翟道翟市場的對面，

Kamphaeng Phet站一出即到。

＊柯多哥市場（Or Tor Kor Market）的戰利品包括「腩毒賣」芒果、

大大隻蝦米、魷魚、魷魚絲、魚乾、龍眼肉等，盛惠2,000銖啦！

＊蝦米好大隻，唔買唔得！

＊在Thailand Cultural Centre站的Big C Extra超市，係我另一個掃貨熱點。

＊在Big C Extra同Tops兩間超市買左唔少零食，就連蛇牌爽身粉同吞拿魚罐頭也買埋。

＊經過Boots，見有買二送一的優惠，又買少少啦！

年紀大，遊玩的景點唔同之外，就連掃貨的目標都唔同左！今次掃貨地點，主要集中在超級市場（Big C Extra和Tops Market）、柯多哥市場（Or Tor Kor Market，另譯安多哥市場）同埋少少Boots護膚產品。

＊柯多哥果菜市場（Or Tor Kor Market）

多得網友介紹，等我知道曼谷有「柯多哥」（Or Tor Kor Market）呢個果菜市場，鄰近翟道翟周末市場，而且從Kamphaeng Phet站（MRT）3號出口即達，好方便。

呢個市場係當地人買水果蔬菜的好地方，亦係當地最乾淨的市場！雖然無冷氣，但都算通爽，行得好舒服。裡面除左有時令蔬果攤同海鮮肉類外，仲有海味同魷魚乾等手信，並設有熟食區，行得累的話，可以醫肚再血拼。

至於我地主要的目標就係大大隻的「腩毒賣」芒果，呢個品種係做芒果糯米飯常用的芒果，我地前一晚在Silom街頭食過100銖的芒果糯米飯，芒果超甜又無渣，實在好回味！至於呢度的「腩毒賣」芒果價錢唔便宜，但賣相超吸引，個頭比一隻手掌還要大，一般要250銖甚至300銖一公斤，平均一個有0.6公斤，若買夠6個，可以免費幫你入箱，方便上機。朋友買左9個，而我就買左4個（合共740銖，一個大約1.35磅，平均每個要45港元），有熟有唔熟，可以返港分幾日食，送俾朋友都仲有時間。

除「腩毒賣」芒果外，我仲買左海味（超大隻蝦米、魷魚、魚仔乾）、龍眼乾、魷魚絲兩包同埋即食魚乾1包，都用左1,300銖啦！連埋4個「腩毒賣」芒果，合共用左2,000銖有多，估唔到在菜市場都要大出血！

返回地鐵站內，可以順便行埋 Kamphaengphet Mall，有衫有袋賣，不過我地揀左間小食店坐低攤抖，食左個小型下午茶，稍事休息後，才起程回酒店。

Or Tor Kor Market（安多哥／柯多哥市場）

營業時間：06:00-19:00

前往方法：曼谷MRT地鐵 Kamphaeng Phet 站 3 號出口即達

＊超市掃零食（Big C Extra 和 Tops Market）

1）Big C Extra（MRT 地鐵 Thailand Cultural Centre 站附近）：以前係家樂福，後尾俾Big C收購，變成Big C Extra，面積好多，產品種類亦多，多買幾包仲有折扣，老友買左唔少，我亦買左香蕉味百奇（Pocky）同埋冬蔭公味百力滋、即食魚乾、雀巢牌泰式奶茶沖劑、蛇牌爽身粉等。

2）Tops Market：本地人的超級市場，除左在Silom Complex地庫有分店之外，酒店附近亦有一間，所以最後一日的上午用百幾銖掃埋少少零食最方便。呢度有「腩毒賣」芒果，每公斤約189銖，比柯多哥市場便宜，但賣相略為遜色。

Big C Extra

地址：Thailand Cultural Centre 站 4 號出口左轉步行 3 分鐘即達

Tops Market

地址：Silom Complex 購物商場地庫內以及 Novotel Bangkok Fenix Silom Hotel 附近

曼谷寫意遊（八）：Silom Comlpex內抵食泰菜Banana Leaf

＊去殼咖喱蟹肉，啖啖肉，份量極多，撈白飯同吃，一流！

＊Banana Leaf用粉皮包著，無咁熱氣，旁邊的醬汁有少少似鎮江醋加老抽混合的味道。

＊炒通菜。

＊單骨雞翼乾身脆口，點埋甜酸醬汁仲滋味。

＊餐廳人流極旺。

最後一晚，無論如何都要食番餐泰國菜。我地揀左最就腳又抵食的Banana Leaf。Banana Leaf位於Silom Complex 4樓，亦即Sala Daeng站旁，我地只要坐酒店免費車就可以直達。食完晚飯，仲可以順便行下商場內的Central百貨公司。

我地點左去殼咖喱蟹肉、炒通菜、單骨雞翼同埋Banana Leaf春卷，

＊去殼咖喱蟹肉：完完全全的蟹肉，份量好充足，加入黃咖喱炮製而成，入口啖啖肉，咖喱完全唔辣，用來撈白飯同吃，好滋味！難怪係餐廳推介菜式之一啦！

＊單骨雞翼：去唔到GreyHound，改在呢度補番數。呢度的單骨雞翼同樣炸得乾身脆口，細細隻容易食，點埋酸甜辣醬汁同吃更惹味。

＊Banana Leaf春卷：似粉皮春卷，點埋伴碟的醬汁（有少少似鎮江醋加老抽混合的味道），熱天食最清爽！

＊炒通菜：普通的家常泰菜。

埋單合共800幾銖，每人約100多港元，真係好抵食！

Banana Leaf Thailand Restuarant

地址：Silom Complex 4樓（Sala Daeng站旁）

電話：02-231-3124

網址：www.bananaleafthailand.com/

曼谷寫意遊（七）：School Food品嘗超平價部隊鍋

＊呢度的部隊鍋用gas爐上，似香港的打邊爐。

＊話咁快，部隊鍋已滾熟，可以食得啦～

＊280銖的部隊鍋足夠兩人分享，若唔夠喉的話，可以再加泡麵和不同食材。

＊午飯時間，幫襯的大部分係年輕人。

＊School Food 位於 Siam Center 的 4 樓，係人龍食店之一。

影完蠟像館，我地過返去 Siam Center 搵食。估唔到三年幾無來，Siam Center變左好多，4樓Food Factory的食肆多左好多新店，其中加入的韓國新成員－－Bon Chon 炸雞店同 School Food 都好多人幫襯，結果我地見後者居然有部隊鍋推介（280銖），一於在泰國再回味韓國美食。

最初以為280銖（折合約70港幣）的部隊鍋係一人份，點知店主話足夠兩個人食，於是我地只係再加泡麵同兩罐可樂便算。

同韓國的部隊鍋略有不同，個鍋無韓式咁扁平，而且用gas爐上，似香港的打邊爐。食材方面，一樣都係有午餐肉、腸仔、煙肉、年糕、泡麵、泡菜、洋蔥、雜菌等，份量十足，當然唔少得韓國辣醬，滾後收火品嘗，味道同韓國的一模一樣，湯底同樣帶甜而微辣，最後再落埋後加的泡麵，兩個人已經食到捧腹。

埋單合共只係400幾銖，折合只係百零蚊，好抵食！

School Food韓國餐廳

地址：曼谷Siam Center 4樓420號舖（坐Sky Train在Siam站下車）

電話：02-658-1717

曼谷寫意遊（六）：杜莎夫人蠟像館跟偶像合照

＊杜莎夫人蠟像館（Madame Tussauds）在Siam Discovery 6樓

＊戴安娜王妃。

＊俄羅斯領袖普京。

＊名畫家畢家索。

＊台灣歌手周杰倫。

＊足球界代表當然唔少得碧咸啦！

＊訪客可以在螢光幕出鏡，同卡通人物對打，幾搞笑。

＊美國歌手麥當娜。

＊介紹蠟像館的歷史，當然唔少得靈魂人物杜莎夫人。

第三日早上，坐酒店專車前往Sala Daeng站，然後搭Sky Train到Siam站下車，目的地係Siam Discovery 6樓的杜莎夫人蠟像館（Madame Tussauds），此館於2010年開幕，係亞洲第三間分館，呢次亦係我繼倫敦同香港分館後，第三次參觀蠟像館。由於網友提示，預早在網上訂購早上入場的門票可以有半價優惠，原價800銖，折實只係400銖，於是在出發前先用信用卡訂票。入場前到票務處出示預訂電郵的資料以及信用卡即可。

蠟像館分為Leaders Zone（領袖）、Red Carpet（紅地壇）、Music Zone（音樂）、 History Zone（歷史）、 Film Zone（電影）、Art & Science Zone（藝術及科學）、TV Zone（電視）、Sports Zone（體育）和Authentic History（蠟像館歷史）等唔同部分，裡面各有不同代表人物，全球知名的領袖、明星、球星、藝術家、科學家，基本上同香港分館差不多，最大分別係香港分館有香港名人（如梅艷芳、劉德華）之外，仲有「活命狂奔」的驚慄環節；呢度則有泰國本土的政經及影壇名人如泰皇伉儷等，另有互動環節，等訪客可以在螢光幕出鏡，甚至同卡通人物對打，都幾搞笑。我地當然集中影自己熟悉同喜愛的名人蠟像，老友尤其鍾意毛主席、胡錦濤同成龍，我就鍾意戴安娜王妃、昂山素姬、奧巴馬夫婦等。

最奇怪係入場時，明明在領袖區擠滿左遊客，點知愈行愈少人，去到睇蠟像館歷史資料部分甚至一個人都無，點解佢地會影得咁快？！我地都只不過係玩左一個半小時而已！實在好奇怪！

曼谷杜莎夫人蠟像館(Madame Tussauds Bangkok)

地址：Siam Discovery, 6th Floor, 989 Rama 1 Road, Pathumwan, Bangkok 10330

電話：+66 (0) 2658 0060

營業時間：10:00-21:00

網址：https://www.madametussauds.com/bangkok/en/

門票：800銖（網上訂購Early Bird Ticket，然後只需在中午12時入場，即可享半價優惠，只係400銖，不過記得要帶信用卡和電郵顯示訂購編號）

曼谷寫意遊（五）：The Roof 38樓露天酒吧嘆Happy Hour

＊酒吧在2014年5月才開幕，絕對係曼谷最新的露天酒吧。

＊我地無訂枱，所以安排坐較闢靜的一角，不過反而覺幾靜局添。

＊俯瞰黃昏過後的Silom夜色。

＊來到酒吧，當然要嘆番杯Cocktail啦～

＊墨西哥雞塊。

＊Scallop & Crab Meat Dumpling貌似廣東燒賣，不過變左綠色～

由酒店步行往Surasak站只係10分鐘左右，所以我睇中站旁的Mode Sathon酒店38樓的露天酒吧，做我地第二日傍晚時分的Happy Hour落腳點。呢間酒吧在2014年5月才開幕，絕對係曼谷最新的露天酒吧。

星期五黃昏6點幾到達，我地無訂枱，所以只被安排坐高桌枱，聊勝於無，好過無得坐啦！酒吧享有360度全景觀，我地可以一邊睇住日落，一直到華燈初上至夜幕低垂，俯瞰Silom夜色，亦可以遠眺Chao Praya河的景致，涼風吹來，吹走晒曼谷的暑氣，十分舒服寫意。

食物方面，我地各自點左一杯Peach-Apple-Ginger Juice Cocktail，飲落有點話梅味，但幾好飲，甜度亦適中。另外叫左兩款小食，一款外形類似燒賣的Scallop & Crab Meat Dumpling，賣相似廣東燒賣，不過變左綠色，食落只覺蟹肉與魚漿之類，但唔覺干貝；另一款墨西哥雞塊，微辣，用來送酒應該唔錯。坦白講，呢兩款小食的質素普通，但酒吧環境的確唔錯，就當食環境都好值得。

埋單合共約1,300銖左右，約310港元，都幾貴，亦係全程最貴的一餐。

The Roof @38ᵗʰ Bar（Mode Sathon 酒店 38 樓）

地址：144 Sathon Nuea Rd, Bang Rak, Bangkok

電話：(66) 02-623 4555

營業時間：18:00-01:00

Dress Code：不可著短褲、背心、拖鞋

前往方法：BTS Surasak 站1號出口前行數步即達 Mode Sathon 酒店

曼谷寫意遊（四）：韓式Bon Chon炸雞脆過薯片

＊左邊的炸餃子，右邊的炸雞翼，同樣炸得脆卜卜，好惹味！

＊韓式泡菜豬肉飯定食，甜而帶微辣，充滿韓國風味，正！

＊味道似凍檸檬茶，配炸雞一流。

＊呢間炸雞店已在全球多個城市遍地開花，我地有眼不識泰山，真係太背啦！

＊下午三點時分，仍不時有人幫襯。

＊門外有餐牌可以看看。

玩完「Art in Paradise」3D美術館，唔想周圍騰，所以在商場內直接搵餐廳醫肚，商場內都有好多唔同菜式的餐廳，最後以人氣指數決定，Bon Chon Chicken炸雞店勝出。

Bon Chon來自南韓，早已在南韓遍地開花，甚至開到去亞洲其他國家，如今在美國已經有幾十家分店，分布在東西兩岸。坦白講，雖然兩年之內去過四次韓國，但居然一次都無幫襯過，就算今次幫襯亦都唔係慕名而至，純粹誤打誤撞，真係有眼不識泰山。

我地點左六件蒜味醬汁（Soy Garlic，不辣）炸雞翼、一客炸餃子同埋韓式泡菜豬肉飯定食（Pork Bulgogi Rice Bowl），另加兩杯飲品和一樽水。

＊蒜味醬汁（不辣）炸雞翼（150銖）：味道超正，皮脆肉嫩，咬落雞皮直頭脆過薯片，而且帶甜味，有點似蜜糖雞翼，據講餐廳堅持只用植物油來煎炸，所以好健康。

＊炸餃子（120銖）：同樣炸得好脆口，不過相比雞翼，當然失色啦。

＊韓式泡菜豬肉飯定食（Pork Bulgogi Rice Bowl）（180銖）：泡菜飯甜中帶微辣，好惹味，，奉送紫菜幾片同小碟Kimchi，食落令人懷念首爾的遊玩日子。

＊飲品（各85銖）：唔記得叫咩名，但飲落解渴透心涼，邊食炸物邊飲冰凍飲品，正到痺！

埋單約800銖，即每人不用100元港幣，絕對物超所值，難怪人氣咁旺（後尾在Siam Center四樓分店發現人龍更長添！）

Bon Chon Chicken炸雞店（曼谷共有8間分店）

地址：曼谷Esplanade購物商場地下

電話：02.660.9380

網址：www.bonchonthailand.com/
前往方法：在Thailand Cultural Centre MRT站的4號出口出來後，往左邊走，步行2分鐘即到

曼谷寫意遊（三）：3D美術館畫靚超值又好玩

＊呢隻超級大大貓好可愛，同佢合照的話，立時變成一名「小人」。

＊走進呢幅色彩繽紛的巨型大畫，恍如置身愛麗斯夢幻仙境之內。

＊星期五的早上，遊客唔多，想影幾耐都得！

 ＊館內經常見員工清潔打掃，所以好乾淨。

＊想試試舉起左上角的跑車？無難度啦！

＊仲有錯體畫。你見到乜東東呢？

玩過韓國濟州同首爾的3D立體畫之後，我同老友都上左癮，所以今次行程的亮點一定係「Art in Paradise」3D美術館。

曼谷有兩間呢類立體畫美術館，論方便就腳一定係位於MBK商場的一間，不過睇過網友的評價之後，決定都係去遠少少的「Art in Paradise」3D美術館。該館位於Thailand Cultural Centre站旁的Esplanade商場內。

我地預先在泰友營列印左100銖的優惠券，所以門票折實只係200銖（約49港元），仲平過韓國！

在美術館的入口，會有工作人員免費為我地二人拍攝左一張大小人趣怪照片（呢張照片會放在最後放在門口旁的位置，免費送俾訪客留念，而且仲要係過埋膠的5R大相，令人好驚喜！），佢除左用佢部專業相機同我地影之外，仲會用我地的相機再影多兩三張，服務一流。提提大家，入場前必須除鞋，保管鞋的人員會每人派發一個鞋袋裝鞋，逛完後在出口處憑號碼牌來領鞋就可以。

美術館唔算好大，分兩層樓，作品超過150件，分為六個地帶，各有唔同主題，有歐洲景色、森林原野、浪漫同經典等有大有細，細如牆上小掛畫，大如畫滿整面牆的超級大畫，令人恍如走進愛麗斯夢遊仙境之內，部分作品仲配上電子設計，好似你走近一塊熒光幕，就會有兩個大公仔出現並且落在你身上，只要你伸出手腳手舞足蹈的話，就會和大公仔混為一體，在螢幕上出現，睇起來好似像大公仔在跳舞咁，好有趣。

最值得一讚的是，工作人員仲好主動走上前來充當我地的攝影師，兼且教埋我地點擺甫士，影得快而準，於是好多張合照都係由佢地幫我地操刀！加上場內不停見清潔工作拖抹地下，所以環境好乾淨，就算瞓身影相都唔驚！

結果，在美術館足足消磨左兩個半小時，各自影左近200張相。臨走時，再收到美術館免費送的5R過膠靚相，更加喜出望外，好滿足！

Art in Paradise Bangkok

地址：99 Esplanade Room No408 4th Floor Rachadapisek Road Din Daeng Bangkok 10400

電話：662-6609130

營業時間：10:00-22:00

網址：www.artinparadise.co.th

前往方法：在Thailand Cultural Centre MRT站的3號出口出來後，往左手邊看，「Art in Paradise」就在旁邊 Esplanade 購物商場的4樓，玩完後，可以在商場的左面前行 5 分鐘，到 Robinson 百貨公司和Big C Extra 超市掃貨。
門票：300銖

泰友營Art in Paradise優惠券（慳100銖）：http://www.thailandfans.com/blogs/details/156

曼谷寫意遊（二）：Novotel Silom Hotel尚算就腳服務佳

＊以曼谷酒店而言，呢間房間實在好迷你，

拍埋兩張單人床後，僅餘左右兩邊有少少走動位。

＊相對而言，廁所和浴室好大間，左面係廁所，中間係洗手盆，

右面係浴室，佔左房間超過三分一以上的空間。

＊淋浴的位置無門，最初以為一定會整濕晒四周；不過，只要小心沖涼的話，

出面洗手盆位置原來可以滴水不沾。

＊酒店出品的沐浴用品（欠牙膏和牙刷）。

＊六樓餐廳就係食自助早餐的地方，住客唔算好多。

＊大路的早餐食物，合格有餘。

＊大堂酒吧一瞥。

＊酒店與State Tower相距好近，步行應該5分鐘之內可到達。

今次入住的酒店係Novotel Bangkok Fenix Silom Hotel，位置的確比住在Siam、Chitlom或Asok等站較遠，亦唔近Silom區，兼且距離最近的BTS站（BTS Surasak (S5)）要行10分鐘左右，不過價錢吸引（機票連三晚住宿只係$2,549），而且酒店每小時有一班免費接駁專車前往Sala Daeng站，該站除左係BTS站之外，仲有天穚連接地鐵（MRT）Silom站，加上站旁有大型商場Silom Complex和Central百貨公司，附近又多食肆，所以都好方便。

至於酒店房間，面積唔大，以曼谷酒店而言甚至可以講得上好迷你，兩張單人床拍埋擺放，走動空間都唔多，反而廁所和浴室相對佔的比例過大。不過，被鋪地氊用具新淨整潔，沐浴用品齊備（無牙刷牙膏），而且包自助早餐，實在很不錯。另外，職員服務態度相當殷勤，試過叫housekeeping上房調整冷氣又或預訂接駁車等，都好有效率又周到！

早餐方面，食物質素普通，種類齊備，以價錢而言，無得挑剔。

唯一最大的問題係房間只有一張匙卡，房間電源須插匙卡之外，升降機又要scan匙卡先至可以按掣上樓，唔可能雙人房的住客分頭行動。結果三日之內，在升降機內見盡住客因為無匙卡而慘遭「遊Lift河」的眾生相，外國遊客當發現jump過自己的樓層時只會流露無奈神情，反而兩次見唔同的香港女子按完樓層燈掣後，又唔確認燈掣有無著就低頭玩手機，結果飛Lift後爆粗，實在失禮又無品，哎，香港人！

另外，我地第三晚仲試埋酒店二樓的Chantrara Spa，一小時的Hot Oil Massage，原價1,350銖，特價只係800銖，兩位按摩師傅的手勢都好好，有力度之餘又唔覺痛，而且按摩房間好舒適，做完成身鬆晒，然後再嘆杯暖茶，所以我地都有俾貼士。

整體來講，呢間酒店算中上啦！

Novotel Bangkok Fenix Silom Hotel

地址：320 Silom Road

前往方法：在BTS Surasak（BTS Surasak (S5)）站1號出口向Silom Road方向前行，步行約10分鐘

*酒店每小時有一班免費接駁巴士前往Sala Daeng站，但座位只有9個，必須提早預訂。

Chantrara Spa Silom

地址：Novotel Bangkok Fenix Silom Hotel 2 樓

電話：(+66) 08-1837-9193

營業時間：11:00-22:00