首爾冬遊記（七）：東大門吃迷你部隊鍋＋海鮮綠豆餅

 ＊我地想食的係烚下烚下部隊鍋，點知來的是一個熱辣辣的石鍋！

旁邊奉送幾碟冷菜，當然唔少得泡菜啦！

 ＊迷你的石鍋內有齊部隊鍋的食品（午餐肉、香腸、拉麵等），雖然唔可以烚下烚下，但同樣熱辣辣，湯底好濃郁，辣辣地好惹味！而且分量反而適中，可以多叫其他食品。

 ＊海鮮綠豆煎餅好大塊，味道不錯，不過最尾要監生先食得晒！

 ＊店內以本地人為主，而且都係點烤肉。

＊店舖位於我地酒店通過各大商場必經之路，

而且店外牆有齊各式各樣式食品，所以吸引我地幫襯。

逛完仁寺洞，原打算返回東大門食部隊鍋，點知在商場旁的挪夫家部隊鍋（即奸詐宰相頭的那間）原來唔賣部隊鍋，只買泡菜包豬肉，結果退而求其次，在旁邊是但搵間有人幫襯而又賣地道韓式食品的小店吃晚飯。

我地見有部隊鍋，當然照點，以為一個就搞掂晒，點知店員話份量好少，兩人只吃一個唔夠飽！原來呢度賣的唔係網上見到的超大號部隊鍋，亦唔係開住爐烚下烚下的；奉上的其實係一個迷你石鍋，鍋內有齊部隊鍋的食品（午餐肉、香腸、拉麵等），不過同樣熱辣辣，湯底好濃郁惹味。食完後，果然唔多夠喉，於是追加多一個海鮮綠豆煎餅。

海鮮綠豆煎餅超大塊，海鮮其實主要得八爪魚，勝在又係熱辣辣，煎得好香口。結果，兩人要監生先食得晒成塊煎餅，真係當堂飽晒！

埋單，合共28,000韓元，唔貴，亦好味！難怪咁多本地人幫襯啦！