東涌大澳四粒鐘密密行

前日嘉道理郊遊見到小青蛇，今日撞到呢隻小動物，唔知係草龍定變色龍呢？！

 侯王廟。

 沿路見到好多行山友，有大有細。

遠眺機場。

除左海景外，仲有綠油油靚景任你睇。

 清溪配落花，意境好美！

穿過呢條小徑，就係大澳外圍了。

 大澳特色棚屋。

大澳貓舍外的可愛貓公仔。

復活節郊遊第二擊，行程係由東涌前往大澳。作為東涌友，呢條路久唔久都會翻炒，因為難度唔高，但全程足足四個鐘，趁天氣未完全轉熱前，決定相約老友狠狠行一次。

今日雖然無風，濕度又高，但天色暗暗地，都算係郊遊的好日子。所以，我地十點幾由東涌出發，沿途人來人往，有大有細，有中有西，非常熱鬧。

先經過侯王廟，遠眺機場景，再去䃟石灣，指示清晰，大部分都係沿海而行，又係石屎路，雖然有斜路和石級，但唔太難行。

行到大半段路時，仲有三間士多可以補給糧水甚至吃個午飯，我地就幫襯左汽水（$7）、清水（$7）同綠豆沙（$13），價錢算公道，綠豆沙尤其足料，值得推介。

小休過後，再繼續穿過樹叢竹林，然後再沿海經泥路行多一個小時，即見大澳外圍的紅樹林和棚屋。經過新基大橋，終於完成四小時郊遊樂。

入到大澳市中心，哇，遊人絡繹不絕，仲旺過旺角，原以為兩點半後，食店應該唔多人，點知間間爆滿。最後去左間叫老友記的茶餐廳，每人食左碟超足料又惹味的大澳蝦醬海鮮炒飯（$40），再加凍飲（$14），54大元下午茶當午飯兼晚飯，完全抵食！

食飽後，行多一陣，但實在太多人，決定打道回府。點知巴士總站的人龍長到打蛇餅，好在巴士密密開，等左五六班車都只係17分鐘，即可執死雞上到車。相信愈夜人龍愈長，真係走得快好世界！

五點正返到東涌港鐵站，落車時發覺雙腳累到無命！今次復活節郊遊樂，真係夠晒盡興！

復活節亂遊嘉道理三粒鐘

＊在山腳有溫室，裡面有好多唔同品種的植物，蘭花尤其多。

＊ 溫室外有好多鮮花盛放。

 

＊溫室蘭花之一。

 ＊齊人後，我地開始登山之旅。最初一段係大斜路。

 ＊大斜路之後，係幾百級石級，雖然有樹蔭，

但無乜風，若平日少郁動的人可能頂唔順！

 ＊行完無敵石級後，又到開闊的石屎斜路，然後到達四柱擎天，有Ｄ似北京圓明園。

 ＊雖然未到山頂，但我地隱約可以遠眺元朗平原。

 ＊時間關係，要趕在關門前返回山腳，唯一經呢條天梯急急下山，搞到腳仔軟晒。

 ＊行完天梯，再打橫行，經山路下山，真係快好多。半粒鐘左右，已到達山腳。

＊最後，同嘉道理先生影番張相，完結左呢三個鐘頭亂遊之旅。

復活節假期留港嬉戲，第一擊就係相約十幾年的老友一行九人齊齊遊大埔嘉道理農場。

亂遊嘉道理之旅由下午兩點開始，由於無穿梭巴士，我地徒步由山腳經蝴蝶園一直向上行，希望上到山頂可以遠眺元朗平原。由山腳入口先要上斜路，然後轉入樹蔭內的數百級石級，行左唔夠半個鐘，其中一對母女已經頂唔順，話要折返，寧願之後再會合我地晚飯。於是一行九人變左七人，繼續經蝴蝶園向上行。左行行右望望，雖然無乜風，而且要默默向上行，但樹蔭多，其實唔算好難行。

過埋四柱擎天，又行多半個鐘，眼見已經四點，距離關門時間只有一粒鐘，應該趕唔切上到嘉道理兄弟紀念亭，然後再落返山。睇過農場地圖後，決定經天梯short cut直落，然後再橫行返回山腳，果然，不用半小時，就到達入口處，不過腳仔就軟晒啦～

三個小時亂遊嘉道理農場其實唔太夠喉，希望下次秋涼時早Ｄ出發，可以行到上山頂慢慢欣賞風景啦！

嘉道理農場前往方法
在大埔火車站坐64K可直達嘉道理農場門口。