深圳網紅熱店：奈雪の茶嘆霸氣果茶加軟歐包

＊我地的下午茶：霸氣楊梅再加一個抹茶芝士紅豆。

＊下午茶時段座無虛席。

＊大大個的軟歐包，一定要試。

＊蛋糕的式又可愛。

＊奈雪の茶是網紅熱店，在全國有幾十間分店。

＊萬象天地的戶外大象藝術裝置「抱抱象Bubblecoat Elephant」。

在桃園站的逸塔．花園餐廳嘆過東南亞美食，坐地鐵兩個站到高新園站的萬象天地（Mixc World）。呢個2017年9月開幕的新商場，共有23萬平米，打造「街區＋mall」的概念，近300家商店，逾千家品牌，商場最大的標誌就係AllRightsReserved聯同霍夫曼創作的戶外大象藝術裝置「抱抱象Bubblecoat Elephant」。

我在4月來過，只在商場內的唐宮嘆午飯，後尾經過奈雪の茶已被店內的麵包和飲品吸引，所以今次決定要幫襯一下，嘆個「一杯好茶 ，一口軟歐包」的美味下午茶。估唔到星期五的下午茶時段，店內店外都坐滿客人，排隊亦見人龍，果然係網紅熱店。店舖右邊有麵包櫃，裡面有餅房，定時新鮮出爐各式麵包。店舖採取自助形式，自己搵位，揀完麵包，再排隊一併買飲品，然後俾錢。

店舖的口號是「一杯好茶 ，一口軟歐包」，我地揀左時令限定的霸氣楊梅（30元人民幣），再加一個抹茶芝士紅豆（15元人民幣）。楊梅為5月應節水果，加入上等的茉莉毛尖茶底、果醬、冰塊一起攪製而成，霸氣楊梅酸中帶甜，非常濃郁多料，絕對真材實料，非常解渴。抹茶芝士紅豆超級軟熟又大個，餡料的芝士紅豆甜中帶微鹹，好好味。飲品和麵包質素都咁好，難怪客似雲來啦。

奈雪の茶（萬象天地分店）

地址：深南大道9668號萬象天地NL115（高新園站A出口，直行3分鐘直達）

電話：0755-86525129

深圳網紅熱店：逸塔．花園餐廳嘆東南亞美食

＊餐廳入口已見繽紛花束。

＊花園部分的座位，完全被大大小小盆栽包圍。

＊我地就揀左坐靠窗的卡位，非常闊落。

＊據講好多人鍾意坐鳥籠座位坐，

我坐過就覺得唔多舒服，盪來盪去唔多定，而且太陽光直曬唔多盞。

＊書店內有各類圖書，內有不少座位任坐。

＊泰式小食拼盤配左三種唔同醬汁。水果茶的水果唔少，味道偏淡，不太甜。

＊泰式炒金邊粉，有大小蝦和魷魚等海鮮，味道偏辣。

前幾日，同老友北上尋歡，在深圳來個一日遊。今次為補祝老友生日，特登揀左兩間網紅熱店湊熱鬧。

第一間就係位於桃園站的逸塔．花園餐廳（ETA Garden Restaurant）。餐廳集音樂、花舍、餐廳和書店於一店，環境非常寬敞，空間感十足，座位又大又舒適，樓底尤其花園部分，大大小小的盆栽擺放在各個角落，非常雅致，絕對係呃LIKE的必去熱店。

餐廳主要售賣東南亞美食，再加各式水果茶。我地揀左一個泰式小食拼盤，一個泰式炒金邊粉，兩杯水果茶，盛惠176元人民幣。味道方面，泰式小食拼盤熱辣即整，有炸蝦餅、雞翼、春卷和雞肉串燒，炸蝦餅最好味，春卷和雞翼亦唔差，最差係雞肉串，雖然好大串但肉質偏鞋，若換做魚餅就完美。泰式炒金邊粉有大小蝦和魷魚等海鮮，味道偏辣。水果茶較淡，比我地飲過的Lady 7 café或Hello Kitty café略為遜色。

醫完肚兼埋完單後，我地就在餐廳每個角落慢慢影相，最鍾意就係花園和書店兩個部分，星期五午飯時間人唔算多，可以大影特影過足癮。

整體來講，餐廳環境好舒服，布置的確好花心思，食物的質素就普普通通。

逸塔．花園餐廳 ETA Garden Restaurant（南山店）

地址：金雞路田廈翡翠明珠七巧國2樓（KFC旁）（桃園站B出口直行，見金雞路轉左，約10分鐘）

營業時間：9:00-22:30

電話：0755-33151836

深圳大劇院站Lady 7 Cafe嘆精緻下午茶

＊Lady 7 Cafe位於KK Mall二樓

＊餐廳入口放左個大大個厚多士。

＊必飲的招牌水果茶。

＊秘製照燒雞翼。

＊花生鬆餅份量唔簡單。

＊餐廳的裝修以白色為主調，樓底極高，雅致清新。

＊餐廳好適合閨蜜歡聚，甜品尤其令女士著迷。

逛完荷蘭花卉小鎮，改往大劇院站的Lady 7 Cafe。餐廳位於KK Mall的二樓，由地鐵站的通道可以直達商場，非常方便。

Lady 7 Cafe裝修好雅致清新，以白色為主調，座位闊落，樓底亦高，最適合一大班閨蜜聚會聊天、情侶拍拖約會「撐枱腳」享受二人世界！

食物方面，有飯類、小吃、甜品、飲料等，最吸引我地的當然係甜品同飲料啦。我地點左兩杯招牌水果茶，一客秘製照燒雞翼，一客花生鬆餅（即窩夫）。招牌水果茶果然材料充足，大大杯之餘，裡面仲有多達七八種水果肉，甜度適中。照燒雞翼共五隻，秘製醬汁帶微辣。花生鬆餅有四塊，附送花生醬、煉奶同忌廉，即烤出來的鬆餅暖笠笠又夠厚，極富質感，搽埋花生醬同忌廉，非常美味。

埋單合共155元人民幣，約港幣175元，完全跟香港的消費水平睇齊，但以環境和食物質素而言，就絕對合理，相信下次我地都會再幫襯。

Lady 7 Cafe (KK Mall 店)
地址：深南東路5016號KK Mall京基百納空間 L227/227a/228a號舗
電話：0755-2227987
營業時間：早上10點至晚上10點
前住方法：羅寶線大劇院站B出口直達

深圳后海站遇上Hello Kitty

＊下午茶時分，人客唔多，非常寧靜，唔講唔知係Hello Kitty Cafe的深圳分店。

＊兩件蛋糕加兩杯飲品，盛惠140多元人民幣。左上角的繽紛水果茶超正，絕對值得推介。

＊同韓國及日本咖啡室一樣，當電鈴閃閃下時，就可以去櫃枱取食物啦～

＊Hello Kitty當然梗有一隻在你左近。

＊另一隻在店後方位置，完全無人影，我地係咁大影特影。

＊門外相。

前兩日，同老友深圳一日遊，行程同以前差不多，由落馬洲過關，坐地鐵到后海站搵間酒樓嘆午茶，然後再到南山書城買下書，回程返回會展中心站逛家樂福，最後在CoCo Park（購物公園站）嘆南小館精緻晚餐作結。

今次唯一驚喜的係竟然在海岸城的地下遇到吉蒂（Hello Kitty）。呢間Hello Kitty Cafe咖啡室應該係新開，因舊年上址都唔見有佢的蹤影。咖啡室的裝修好簇新，窗明几淨，布置雅致，當然唔少得吉蒂貓的蹤跡。下午茶時分客人唔多，女生為主，非常寧靜，座位任坐，難得係大大隻吉蒂貓擺設可以任得我地兩個大鄉里大影特影。

食物方面，我地點左兩件蛋糕加兩杯飲品，盛惠140多元人民幣，完全係香港價錢。質素方面，則同樣媲美香港的水準，非常好味，兩件蛋糕分別係鳳梨味味榛子味，甜度適中，蛋糕鬆軟。飲品方面，我點的繽紛水果茶果然好七彩繽紛，大大瓶，裡面有五六款水果，飲落又係甜度適中，果味剛好，水果件件都食得落肚，以33元人民幣來計，都算貨真價實。

整體來講，自己唔係吉蒂粉絲，今次係生平第一次幫襯Hello Kitty Cafe，感覺非常好。下次再返深圳，可能去幫襯埋CoCo Park（購物公園站）個邊的另一間分店也話唔埋。

Hello Kitty Cafe

地址：深圳后海站海岸城地下

深圳宿一宵（四）：江南廚子蒓菜羮超好味

 

大閘蟹當造的季節，最適合品嘗蟹肉蒓菜羮。

餛飩湯底極清。

蟹粉小籠包皮薄湯多，又係必吃推介。

腐皮雞毛菜味道偏清淡。

蘿蔔絲酥餅同樣值得推介。

離開酒店後，經過地鐵通道轉往中心城廣場搵食，今次目的地係去久違了的江南廚子。自從唔行萬象城後，都好耐無幫襯，估唔到中心城內有分店。

江南廚子以小菜為主，點心的選擇唔多，細食的我們真係好難取捨，結果只係揀左幾款輕食的小吃做午餐。

＊餛飩：清湯內的餛飩有六粒，皮唔太厚，尚算美味。

＊蟹粉小籠包：皮薄湯多，挾起唔爆，一啖可以連湯吞埋，湯唔太熱剛剛好，不錯。

＊蘿蔔絲酥餅：蘿蔔絲切得極幼細，酥餅皮好鬆化，好值得推介的點心！

＊腐皮雞毛菜：雞毛菜似小白菜，腐皮太少，炒得較清，味道偏淡口。

＊蟹肉蒓菜羮：另一道必味的時令湯羮，濃稠的湯羮內啖啖蟹高和蟹肉，滑滑的蒓菜口感好特別，整個湯羮絕不欺場，正！

埋單合共150元人民幣，合理價錢。

江南廚子（福華店）
地址：深圳市福華區福華一路中心城廣場FUG層FUG003號（會展中心站直達）