為懷舊而來的老夫子餐館

＊餐廳唔少得意大公仔。

＊大廈地下有大番薯孤伶伶又嬲爆爆企定定在迎賓。

＊店外有多個主角老夫子俾大家任影唔嬲。

＊老夫子做廚師，唔好有太大期望。

＊店內的汽車座位差不多人人都走過去影番張相。

＊店外放左老夫子漫畫，話無睇過肯定呃你。

＊天花板、座椅旁，老夫子無處不在，陪住你進餐。

＊豉油西餐之一的熰豬扒飯，正常水準。

＊番茄鮮蝦意大利粉的意粉煙韌有勁，不過三隻大蝦的肉質就霉霉地。

＊最吸睛的就係呢杯膽大包天啦！

好知己為我慶生，我提議試老夫子餐館撐枱腳。好知己一早叮囑愈早去愈好，否則等上一粒鐘是閒事。結果我地五點幾到達，原本可以即時入座，但為左想坐卡位，寧願等多陣，反正門外的老夫子主角（老夫子、大番薯等）得意又可愛，同佢地合照都謀殺唔少時間。

終於可以入座，店員卻聲明只可以坐90分鐘（！！），於是快快點菜為上：番茄鮮蝦意大利粉、焗豬扒飯，同埋兩杯「膽大包天」（其實係忌廉溝鮮奶再加大大的棉花糖造型）。

食物質素方面，其實類似懷舊豉油西餐，唔算好驚喜，但幸好都唔驚嚇，不過不失啦！番茄鮮蝦意大利粉的意粉煙韌有勁，不過三隻大蝦的肉質就霉霉地，焗豬扒飯就絕對正常，亦新鮮焗製。最吸睛的當然係杯飲品－－「膽大包天」，杯上大大朵棉花糖唔搶鏡都唔得，吸引唔少鄰座的食客注意，不過飲時就有點老鼠拉龜無從入手，大大朵棉花糖搞到隻手黐立立，食完就有一天都光晒的感覺，可以慢慢嘆忌廉溝鮮奶啦！

食到90分鐘，店員已自動送上帳單，睇到門外長長的人龍，想唔走都唔得。埋單300幾蚊，並非物有所值，不過計埋環境氣氛同老夫子幾個唔同造型，就加多好多分！

當然，最後仲要多謝好知己的美意和盛情啦！

老夫子餐館

地址：太子彌敦道777-781號安寶樓1樓（港鐵太子站 E 出口步行約1分鐘）

電話：3702 1678