＊加15蚊有餐湯同麵包。
＊牛肝菌意大利飯。
＊芒果乳酪燒雞中東包配薯條。
＊西班牙咖啡雪糕，無糖水，好苦。
＊雪糕加心太軟蛋糕。
＊戶外環境唔錯，但一定要天氣轉涼至好幫襯。
＊晚餐70多至80多元，加15蚊有餐湯同麵包，若想再加飲品，每人預150元埋單。
朋友相約葵芳晚飯，揀的係位於葵芳劇院旁的牧羊少年。若唔係朋友介紹，經常遊走於葵芳新都會同葵涌廣場的我，都唔會知道在葵芳劇院旁，有間咁環境咁舒適又靜局的餐廳。
餐廳分室內和戶外兩部分，朋友千叮萬囑叫我一定坐戶外。果然，戶外情調溫馨同寬敞，座位之間距離也算適中；加上天氣唔熱，就算無冷氣也覺通爽。
食物方面，晚餐有六款選擇，我地揀左牛肝菌意大利飯同芒果乳酪燒雞中東包配薯條。我地另加15蚊就有埋餐湯同麵包，不過飲品就要另外原價俾錢。
餐湯係雜菜湯，唔係非常熱，麵包就好軟熟而且暖暖地。牛肝菌意大利飯的意大利飯偏硬身，牛肝菌唔太入味，水準不過不失。芒果乳酪燒雞中東包配薯條則唔錯，中東包好軟熟，而且分量都幾大份，幸好我地兩個share來吃。
食完晚餐，我地仲另加甜品同飲品。甜品係雪糕加心太軟蛋糕，兩個雪糕球配一個心太軟蛋糕，40幾蚊算合理價，心太軟唔係極流心的狀態，但味道合格有餘。至於飲品，我地點單時，侍應解釋錯左，令到我地誤會左義式咖啡雪糕係飲品，奉上來時，赫然發現係甜品，幸好侍應係退回，改上過西班牙咖啡雪糕，呢款飲品咖啡味極濃，但無加糖水，只用雪糕當甜味，飲唔慣的我就覺得太苦。
埋單，二人合共300多元，以價錢計，算好合理，味道中規中矩，不過環境就極不錯，尤其天氣清涼時幫襯，坐在戶外好寫意，係朋友聊天的好地方。
牧羊少年咖啡．茶．酒館 The Alchemist Cafe Bistro
地址：葵芳興寧路12號葵青劇院地下2號舖
電話：2439 5669
沒有留言:
張貼留言